2 कुरुन्थियों 3:7 - चम्बयाली नौआ नियम

^7-8 जां मूसा रा कानून जे पत्थर री सलेटां पर लिख्खेया गेया थिया, तां तिस बेल्ले परमेश्वर री महिमा दिख्खी गयी थी, इस्राएल रे मणू मूसा रे चेहरे जो जादा देर तिकर नी दिख्खी सके, किजोकी से बड़ा चमकेया करदा थिया पर तिसेरी चमक भी जादा देर तिकर नी रेई, इधेरे तांइ जे अगर मूसा रे कानून पर आधारित सेवकाई जे मौत पास्से लेई जांदी, अगर इन्नी जादा चमकदार है, तां फिरी नौई वाचा रे अधीन होई करी परमेश्वर री पवित्रात्मा री सेवकाई करणे बिच इसका भी जादा महिमा होणी।

2 कुरुन्थियों 3:7 ပူးပေါင်းရင်းမြစ်များ

प्रेरितां रे कम्म 6:15

तां सारे लोक्कां ने जे सभा बिच बैठ्ठे रे थिये, तिस पर नजरां टिकाई ते तिसेरा मुँह स्वर्गदूत सांई रौसनी कने चमकेया करदा थिया।

रोमियों 10:4

मसीह यीशु ने मूसा रे कानूनां जो पूरा कित्तेया जिस मकसद तांइ से दित्ते गेया थिया, ताकि हर इक्क मणू जे मसीह यीशु बिच विश्वास करे, से परमेश्वर री नजर बिच धार्मिक ठैहरे।

रोमियों 4:15

किजोकी परमेश्वर ने तिस हर मणू जो सजा दैणी जे कानून जो पूरे तरिक्के कने नी मनदा। जित्ते कानून नी, तित्ते तिसेरा कोई उल्लंघन भी नी।

रोमियों 5:20

परमेश्वर ने लोक्कां जो मूसा रे जरिये कानून इधेरे तांइ दित्तेया गेया ताकि से जाणी सके कि से किन्ने पाप कने भरे रे थिये, पर जां मणू जादा का जादा पाप करणा लग्गे, तां परमेश्वर रा अनुग्रह भी जादा बदधी करी होया।

रोमियों 7:10

ते से ही कानून जे मेरे जो जिन्दगी दैणे तांइ थिया, से ही कानून मेरे मौत री सजा री वजह बणी गेया।

रोमियों 7:22

मैं पूरे दिल कने परमेश्वर रे कानून कने तां बड़ा खुस रैहन्दा,

रोमियों 7:5

किजोकी जां असी अपणे पाप करणे रे स्वभाव रे काबू बिच थिये, तां असा री पाप करणे रे स्वभाव, असा बिच कम्म करेया करदा थिया, ते कानूनां ने तिसजो होर बढ़ावा दित्ता ते तिस कने इदेय कम्म होए, जिसेरा नतीज्जा मौत हुंदा।

2 कुरुन्थियों 3:3

साफ तौर पर तुसा मसीह यीशु रे पास्से का चीठ्ठियां सांई हिन जे असा री सेवकाई रा नतीज्जा है, जे सलेट पर नी लिख्खे गेरे हिन पर परमेश्वर री आत्‍मा कने असा रे दिल री सलेट पर लिख्खे गेरे हिन।

2 कुरुन्थियों 3:6

तिन्हा ने असा जो परमेश्वर रे नौए वाचा रे सेवक होणे रे काबिल बणाए रा है, ए नौई वाचा मूसा रे कानून बिच लिख्खे री गल्लां रा नी है पवित्रात्मा रा है। किजोकी मूसा रे कानून पर ना चलणे पर ता मौत मिलदी, पर परमेश्वर री नौई वाचा रे जरिये पवित्रात्मा असा जो हमेसा री जिन्दगी दिंदा।

गलातियों 3:10

इधेरे तांइ तिन्हा लोक्कां पर लाणत है जे मणू मूसा रे कानून जो मनणे पर भरोसा रखदे, किजोकी पवित्रशास्त्र बिच ए लिख्खे रा है, “लाणत है तिन्हा लोक्कां पर जे मणू मूसा रे कानून रे इक्क-इक्क नियम जो नी निभांदे।”

गलातियों 3:21

इसेरा मतलब ए बिल्कुल भी नी है कि मूसा रा कानून परमेश्वर रे वादेयां रे खिलाफ है। किजोकी जे अगर मूसा रा कानून असा जो हमेसा री जिन्दगी दिंदा तां फिरी असी तिन्हा कानूनां जो मनणे कने धार्मिक ठैहराए जांदे।

इब्रानियों 12:18

तुसा इक्क असली पहाड़ का नी आए रे हिन, ना ही इक्क धधकदी आग्ग का, ना ही न्याहरे बिच, ना ही धुंधलेपन का, ना ही बवण्डर का, ते तुसा ना तुरही री अवाज का आए रे हिन, जिय्यां इस्राएल रे सीने पहाड़ का आए थिये।

इब्रानियों 3:3

जिस तरिक्के कने घर रा बणाणे वाला, घर का जादा आदर पांदा, तिय्यां ही मसीह यीशु भी, जिन्हेरे जरिये परमेश्वर रा टब्बर बसे रा है, मूसा का जादा आदर पाणे रे लायक हिन।

इब्रानियों 9:4

ते तित्ते धूप फुकणे तांइ सबका जादा पवित्र जगाह् बिच सोन्ने री वेदी थी। सोन्ने कने ढके रा वाचा रा सन्दूक भी तित्ते थिया, ते तिसेरे बिच त्रै चीजां थी। पैल्ले ता मन्ने कने भरे रा भांडा। दूज्जी चीज हारून रा डंडा थिया, जिस बिच फूल्ल-पत्तियां लग्गी गे री थी। ते आखिरकार, दस हुकमां री बट्टे री बणे री पट्टियां भी तिस बिच थी।