2 कुरुन्थियों 12:1 - चम्बयाली नौआ नियम

¹ हालांकि मेरे तांइ घमंड करणा फायदेमंद ता नी है, पर मेरे जो घमंड करणा पैंदा। पर अवे मैं परमेश्वर रे पास्से का मिल्ले रे दर्शनां ते दस्से री गल्लां रे बारे बिच चर्चा करणी।

2 कुरुन्थियों 12:1 ပူးပေါင်းရင်းမြစ်များ

यूहन्ना 16:7

पर मैं तुसा रे कने सच-सच बोलदा कि तुसा तांइ भला है कि मैं जाया करदा है, किजोकी जे अगर मैं नी जांगा तां पवित्रात्मा ने जे तुसा रा मददगार है, तुसा का नी आणा, पर जे अगर मैं चली जांगा तां तिसजो तुसा रे का भेजी दिंगा।

यूहन्ना 18:14

ए काईफा सेह्ई मणू थिया जिनिए यहूदी मन्त्रियां जो सलाह दित्ती थी कि सब मणूआं तांइ इक्क रा मरणा खरा है।

प्रेरितां रे कम्म 18:9

राती प्रभु जी ने दर्शन रे जरिए पौलुस जो बोल्लेया, मत डर प्रचार करदा जा ते चुप मत हो

प्रेरितां रे कम्म 23:11

तिस्सी रात्ती प्रभु यीशु ने तिसेरे नेड़े खड़े होई करी बोल्लेया, ओ पौलुस, हिम्मत कर किजोकी जिय्यां तैं यरुशलेम अन्दर मेरी गवाई दित्ती, तिय्यां गवाई तिज्जो रोम अन्दर भी दैणा पैणी।

1 कुरुन्थियों 10:23

जिय्यां कि तुसा बोलदे कि असा जो सब किच्‍छ करणे री अजादी है, हाँ, पर सब किच्‍छ करणा असा तांइ खरा नी है। असा जो सब किच्‍छ करणे री अजादी ता है, पर सब किच्‍छ परमेश्वर बिच असा रे विश्वास जो मजबूत नी करदा।

1 कुरुन्थियों 14:6

ओ संगी विश्वासियों जे अगर मैं तुसा का आई करी बखरी-बखरी भाषा बिच गल्लां करणे रे बजाए प्रकाशन, ज्ञान या परमेश्वर रे बसेख री शिक्षा री गल्लां करां, तां तुसा जो मेरे का फायदा होणा।

1 कुरुन्थियों 6:12

तुसा बिच का किच्‍छ मणू बोलदे कि असी जे मर्जी चाए से करी सकदे, पर मैं तुसा जो बोलदा कि हर किच्‍छ असा तांइ खरा नी है। इधेरे तांइ मैं कुसकी भी चीज रे वस बिच नी होणा चाह्‍ंदा।

2 कुरुन्थियों 12:11

मैं इक्क बेवकूफ मणू सांई ता बणेया, पर तुसा ने ही मेरे जो ए करणे पर मजबूर कित्तेया, तुसा जो तां मेरी तारिफ करणी चाएदी थी, हालांकि मैं किच्‍छ भी नी है, तां भी तिन्हा प्रेरितां का जादा बदिया ही है जे अप्पु जो बड़ा बड्डा समजदे।

2 कुरुन्थियों 12:5

इदेय मणू पर तां मैं गर्व करणा, पर अप्पु पर अपणी कमजोरियां जो छड्डी करी, अपणी होर कुसकी गल्ल रे बारे बिच गर्व नी करणा।

2 कुरुन्थियों 12:7

मेरे सरीर बिच इक्क बड़ी वरी पीड़ कुसकी कंडे सांई लग्गे री है, ते शैतान रा इक्क दूत मेरे जो तड़पांदा रैहन्दा, ताकि मैं परमेश्वर का मिल्ले रे बड़े सारे प्रकाशन पाणे री वजह कने घमंडी ना बणी जां।

2 कुरुन्थियों 12:9

पर तिन्हा ने मेरे जो बोल्लेया, मेरा अनुग्रह तेरे तांइ मता है। इधेरे तांइ अवे मैं कमजोरियां पर गर्व करणे तांइ खुस है ताकि मसीह यीशु मेरे जो अपणी ताकत दिंदे रे।

2 कुरुन्थियों 8:10

इस गल्ल पर तुसा तांइ मेरी ए ही सलाह है कि ए ठीक गल्ल होणी कि जे तुसा इक्क साल पैल्ले सुरु कित्तेया थिया, तिस कम्म जो पूरा करो। पिछले साल तुसा पैल्ले मणू थिये जे दान दैणा चाह्‍ंदे थिये, ते तुसा मणू ही पैल्ले हिन जिन्हा ने दान दैणा सुरु भी कित्तेया थिया।

गलातियों 1:12

किजोकी मेरे जो से असा रे मणू का नी मिल्लेया, ते कुसकी धर्म गुरु ने मेरे जो इसेरी शिक्षा नी दित्ते री है, पर मेरे जो से यीशु मसीह रे जरिये मिल्लेया, जां से मेरे पर प्रकट होए थिये।

गलातियों 2:2

ते मैं तित्ते इधेरे तांइ गेया किजोकी परमेश्वर ने मेरे जो जाणे तांइ बोल्लेया थिया, अते जे सुब बसेख मैं गैर यहूदी लोक्कां बिच प्रचार करदा थिया, तिसजो मैं एकांत बिच कलीसिया रे प्रधान मणूआं जो सुणाया ताकि जे कम्म मैं पैल्ले कित्ते थिये से बेकार नी ठैहरे।

इफिसियों 3:3

जिय्यां कि मैं पैल्ले ही घट शब्दां बिच तुसा जो दस्सी चुके रा है कि परमेश्वर ने से राज़ मेरे पर ज़ाहिर कित्ते रा है।

1 थिस्सलुनीकियों 4:15

किजोकी असी तुसा जो प्रभु यीशु रे वचन रे हिसाब कने दस्सेया करदे हिन कि जां मसीह यीशु ने हटणा तां असा जिन्दे लोक्कां का पैल्ले मुर्देयां बिच का जिन्दे कित्ते गेरे लोक्कां ने मसीह यीशु कने मिलणा।

1 यूहन्ना 5:20

ते ए भी जाणदे कि परमेश्वर रा पुत्तर मसीह यीशु आई गे रा है ते तिनिये असा जो समझ दित्ते री है कि, असी तिस सच्चे परमेश्वर कने गहरे रिश्ते बिच हिन किजोकी असी मसीह यीशु कने गहरे रिश्ते हिन जे सच है, सच्चा परमेश्वर ते हमेसा री जिन्दगी ए ही है।