2 कुरुन्थियों 11:27 - चम्बयाली नौआ नियम

²⁷ मैहनत ते दुख अन्दर, घड़ी-घड़ी जागदे रैह्णे बिच ते भूख्ख-प्यास बिच भी रेया ते सर्दी बिच बगैर निग्गे कपड़े रे भी रेया।

2 कुरुन्थियों 11:27 ပူးပေါင်းရင်းမြစ်များ

मत्ती 17:21

पर ए जाति बगैर प्रार्थना अते ब्रत्त रे नी निकलदी।

प्रेरितां रे कम्म 14:23

ते तिन्हा ने हर-इक्क कलीसिया बिच तिन्हेरे तांइ बुजुर्ग मणू रख्खे, ते ब्रत रख्खी करी प्रार्थना करी के, तिन्हा जो प्रभु रे हत्थां बिच सौंपेया जिन्हा पर तिन्हा ने विश्वास कित्तेया थिया।

प्रेरितां रे कम्म 20:31

इधेरे तांइ चुकन्ने रेयो ते याद रख्खो कि मैं तुसा कने त्रै साल रेया ते हर बेल्ले तुसा री फिकर कित्ती ते कदी भी समझाणा नी छड्डेया।

1 कुरुन्थियों 7:5

प्रार्थना बिच समय गुजारणे रे अलावा कुसकी होर गल्ल तांइ लाड़ा ते लाड़ी इक्क दूए जो अप्पु-मिते सम्बध बणाणे का मना ना करे, पर तिसेरे बाद से मणू अपणी आम ब्यात्ती री जिन्दगी जो तिय्यां ही जिन्दे रैह्ण। इस तरिक्के कने तुसा संयम री कमी री वजह कने शैतान री परिक्षा बिच पैणे का बची रैह्णा।

2 कुरुन्थियों 11:23

कै से ही मसीह यीशु री सेवा करणे वाले मणू हिन? मैं बोलदा कि मैं तिन्हा का बधी करी है! मैं पागल मणू सांई बोलदा कि मैं तिन्हा का जादा मैहनत कित्ते री है, मैं तिन्हा का जादा कैद होए रा है, मैं तिन्हा का जादा कोड़े खाए, ते मैं तिन्हा का जादा मौत रे खतरे बिच पेरा है।

2 कुरुन्थियों 6:5

ते असी कोड़े खाणे कने, कैद होणे कने, हगांमेया कने, मैहनत करदे होए, जागदे रैह्णे कने, भूख्ख बिच, पवित्रता कने, ज्ञान कने, सबर कने, रहम कने, पवित्रात्मा कने अप्पु जो परमेश्वर रे चुणे रे दास साबित करदे।

फिलिप्पियों 4:12

मैं अमीरी बिच भी जीणा जाणदा ते गरीब्बी बिच भी जीणा जाणदा; मैं हर हालात बिच संतुष्ट रही सकदा, चाए मैं भूखा हो या मैं रजे रा हो, ते या चाए मेरे का सब किच्‍छ हो या किच्‍छ भी ना हो।

1 थिस्सलुनीकियों 2:9

किजोकी ओ भाईयों, तुसा ने असा री कड़ी मैहनत जो याद रख्खेया ते असा ने इस तांइ रात-दिन कम्म करी के तुसा बिच परमेश्वर रा सुब बसेख प्रचार कित्ता ताकि असी अपणी जरुरतां तांइ तुसा पर बोझ ना बनण।

2 थिस्सलुनीकियों 3:8

ते कुसकी का मुफ्त बिच रोट्टी नी खाई पर मैहनत-मजदूरी करी के रात-दिन कम्म-काज करदे थिये ताकि असी तुसा बिच का कुसकी पर अपणी जरुरतां तांइ निर्भर ना हो।

इब्रानियों 11:37

तिन्हा बिच किच्‍छ विश्वास करणे वाले लोक्कां जो बट्टे मारी करी मुकाई दित्ता, मते जणेया दो हिस्सेयां बिच कट्टी दित्ता। किच्‍छ जणेया जो तलवारां कने मारी छड्डेया। विश्वास करणे वाले किच्‍छ मणू बकरे रे चमड़े रे कपड़े पाई करी इत्ते उत्ते भटकदे रे। तिन्हा का पैसे नी थिये। तिन्हा पर लगातार जुल्म कित्ते गे।