2 कुरुन्थियों 1:12 - चम्बयाली नौआ नियम

¹² किजोकी असी अपणे विवेक री इस गवाई पर असी पूरी बुड़ख कने बोलदे कि असी अपणे हर काम्म-काज बिच परमेश्वर री दित्ते री पवित्रता ते सच्चाई कने जिन्दगी जिन्दे, खासतौर पर जां असी तुसा कने थिये। असी अपणी इन्सानी समझ पर नी पर परमेश्वर रे अनुग्रह पर निर्भर रैहन्दे।

2 कुरुन्थियों 1:12 ပူးပေါင်းရင်းမြစ်များ

प्रेरितां रे कम्म 23:1

पौलुस ने महासभा पास्से नझाई करी दिख्खेया ते बोल्लेया, ओ संगी विश्वासियों, मैं अज्ज तक परमेश्वर तांइ बिल्कुल सच्चे विवेक कने जिन्दगी बिताये री है।

प्रेरितां रे कम्म 24:16

इस तांइ मैं अप्पु भी कोसीस करदा कि परमेश्वर रे, ते मणूआं रे पास्से मेरा मन हमेसा बेकसूर रेयो

रोमियों 9:1

मैं सच बोलदा किजोकी मैं मसीह यीशु रा मणू है, मैं झूठ नी बोल्लेया करदा है, मेरा विवेक पवित्रात्मा रे जरिये इस गल्ल जो पक्का करदा,

1 कुरुन्थियों 1:17

किजोकी मसीह यीशु ने मेरे जो बपतिस्मा दैणे तांइ नी, पर सुब बसेख सुनाणे जो भेज्जे रा है, जां मैं सुब बसेख सुणांदा तां मैं अपणे गल्ल-बात करणे री खूबी रा इस्तेमाल नी करदा, नी ता लोक्कां ने सिर्फ मेरे गल्ल-बात करणे रे तरिक्के कने ही मेरा भरोस्सा करी लैणा थिया ते शायद तिन्हा लोक्कां ने सुली पर मसीह यीशु री मौत री ताकत का अनजाण रैह्णा थिया।

1 कुरुन्थियों 12:8

पवित्रात्मा इक्क जणे जो तिन्हेरे बसेख रे बारे बोलणे री खूबी दिंदे जे कि ज्ञान कने भरपूर हुंदी, ते से ही आत्‍मा दूए मणू जो तिन्हेरा बसेख बोलणे री खूबी दिंदे जे समझ कने भरपूर हुंदा।

1 कुरुन्थियों 15:10

परमेश्वर रे अनुग्रह री वजह कने ही मैं प्रेरित बणेया, तिन्हेरा से अनुग्रह जे मेरे पर होया, तिसेरा मेरी जिन्दगी बिच बड़ा जादा असर रेया। मैं तिन्हा सारे प्रेरितां का बधी करी मैहनत भी कित्ती: तां भी ए मेरे पास्से का नी होया पर परमेश्वर रे अनुग्रह री वजह जे मेरे पर है।

1 कुरुन्थियों 2:13

हर इक्क गल्ल जे असी बोलदे से असा जो इन्सान कने नी बल्कि परमेश्वर रे आत्‍मा रे जरिये सिखाया गे रा है। ते से ही आत्‍मा आत्मिक लोक्कां जो आत्मिक गल्लां सिखाणे तांइ असा री मदद करदा।

1 कुरुन्थियों 4:4

किजोकी मेरा विवेक साफ है, फिरी भी मैं बेकसूर नी है, किजोकी मेरे जो परखणे वाला मेरा प्रभु है।

1 कुरुन्थियों 5:8

इधेरे तांइ आओ असा अपणा फसह रा त्योहर मनांदे जिय्यां कि यहूदी मणू तराक्क जो कड्डी करी सूटी दिंदे ते अखमीरी रोट्टी खांदे थिये, तिय्यां ही असा जो भी जिन्दगी तिस हिसाब कने नी जीणा चाएदी जिय्यां असी मसीह यीशु बिच विश्वास करणे का पैल्ले जिंदे थिये।

2 कुरुन्थियों 1:17

मेरा मन पूरे तरिक्के कने तैयार थिया कि ए ही योजना होणी। मैं तुसा कदी “हाँ” ते कदी “ना” नी थिया बोलदा। मैं दुनिया रे लोक्कां सांई योजना नी बणांदा।

2 कुरुन्थियों 11:3

पर मैं डरदा कि जिय्यां शैतान ने कीड़े रे रुप बिच, अपणी चलाकी कने हव्वा जो बैह्काया थिया, तिय्यां ही तुसा रे मन तिस सिधाई ते पवित्रता, जिस कने तुसा जो मसीह यीशु रा आदरमान करणा चाएदा, कुदखी भ्रष्ट नी कित्ते जाण।

2 कुरुन्थियों 2:17

असी उन्हा केई मणूआं सांई नी हिन, जे पैसे रे लालच बिच परमेश्वर रे वचन बिच हेराफेरी करदे हिन, पर असी ए जाणदे होए कि परमेश्वर असा जो भेज्जे रा है, ते से असा जो दिख्खेया करदे हिन, ते असी मसीह रे हक कने हमेसा सच्चाई कने शिक्षा दिंदे।

2 कुरुन्थियों 4:2

पर असा ने शरम रे ते गुप्त कम्मां जो छड्डी दित्तेया, अते न चलाकी कने चलदे, अते ना परमेश्वर रे वचन बिच हेराफेरी करदे, पर परमेश्वर रे सामणे असी सिर्फ सच बोलदे, ते असी लोक्कां रे विवेक बिच ए बिठाई दिंदे कि जे असी बोल्लेया करदे हिन से सच है।

2 कुरुन्थियों 8:8

मैं तुसा जो हुकम नी है देया करदा, पर मैं तुसा रे प्यार री सच्चाई जो दूज्जेयां री गहरी इच्छा कने तुलना करी के परखणा चाह्‍ंदा।

गलातियों 6:4

पर हर इक्क जणा अपणे-अपणे कम्मां जो परखी लै कि से ठीक हिन कि नी। जे अगर तिन्हेरे कम्म सही होए तां से अप्पु तांइ गर्व करी सकदे पर तिन्हा जो अपणे कम्मां जो दूज्जेयां कने बराबरी ना करे।

इफिसियों 6:14

तैयार रेयो! सच्चाई जो अपणी कमर रा पटुका बणाओ, ते तुसा री धार्मिकता जो इक्क झीलम सांई तुसा री रक्षा करणा देयो। परमेश्वर रा सांती रा सुब बसेख सुनाणे री तुसा री इच्छा तुसा रे पैरां बिच तैयारी रे जूत्ते सांई होणे चाएदे। तुसा रा विश्वास इक्क ढाल सांई होणा चाएदा, तां तुसा ने शैतान रे भखदे तीरां जो रोक्की सकणा। परमेश्वर री तुसा जो बचाणे री ताकत तुसा तांइ इक्क टोप सांई होणी चाएदी, ते परमेश्वर रे सुब बसेख रे वचन जो इक्क तलवार सांई इस्तेमाल करो जो पवित्रात्मा रे पास्से का मिल्ले रा है।

फिलिप्पियों 1:10

ताकि तुसा जिन्दगी बिच अप्पु तांइ सही चीजां जो चुणी सको ताकि तुसा मसीह यीशु रे हटणे रे दिन तांइ निर्मैल ते बेकसूर रेयो।

1 थिस्सलुनीकियों 2:10

तुसा अप्पु ही गवाह हिन, ते परमेश्वर भी गवाह है की तुसा संगी विश्वासियों रे मझाटे असा रा बर्ताव कदेया पवित्र, धार्मिक ते बेकसूर रे रा है।

1 तीमुथियुस 1:5

ए हुकम दैणे रा मकसद ए है कि तुसा साफ मन, साफ विवेक अते सच्चे विश्वास कने इक्क-दूए कने प्यार करो।

तीतुस 2:7

तुसा अप्पु हर गल्ल बिच दूज्जेयां तांइ ठीक बर्ताव रा इक्क उदारण बणो कि से भी तिय्यां ही करण।

इब्रानियों 13:18

इस तिकर असा तांइ प्रार्थना करदे रेयो। किजोकी असी पक्के तौर पर जाणदे कि असा रा विवेक साफ है, ते असी सारी गल्लां अन्दर परमेश्वर जो आदर दैणा चाह्‍ंदे।

याकूब 4:6

से तां होर भी जादा दया करदे ताकि असी बुरी इच्छा रा विरोध करी सकण, इसी वजह कने पवित्रशास्त्र बिच ए लिख्खे रा है, “परमेश्वर घमंडिया रा विरोध करदे पर निमते मणूआं पर अनुग्रह करदे।”

1 पतरस 3:16

हमेसा भलाई रे कम्म करणे तांइ तैयार रेयो, तिन्हा ने तुसा रे बदिया बोल-चाल जो दिख्खी करी शर्मिंदा होणा किजोकी तुसा मसीह रे मणू हिन।

1 पतरस 3:21

पुराणे जमान्ने बिच तिन्हेरा छुटकारा अवे अज्ज रे जमान्ने बिच तिस छुटकारे रा उदारण है जे असा जो बपतिस्मा लैणे रे जरिये मिलदा। जिस पाणी बिच असी बपतिस्मा लिंदे से सरीर री गंदगी जो दुर नी करदा, पर ए इस गल्ल री निशानी है कि असा ने परमेश्वर का अपणे पाप्पां री माफी मंगे री है, ते असा रे मन तिन्हा पाप्पां री वजह कने अवे परेशान नी हिन। असा जो अवे असा रे पाप्पां का माफी मिल्ली सकदी किजोकी मसीह यीशु मुर्देयां बिच का फिरी जिन्दा होई गेरे हिन,