1 तीमुथियुस 6:12 - चम्बयाली नौआ नियम

¹² जिय्यां इक्क खरा सिपाई लड़ाई रे मैदान बिच कदी हार नी मनदा तिय्यां ही तुसा जो भी परमेश्वर बिच विश्वास करणा ते तिन्हा रे हुकमां जो मनणा नी छडणा चाएदा ते हमेसा री जिन्दगी जो थाम्मि लेयो।

1 तीमुथियुस 6:12 ပူးပေါင်းရင်းမြစ်များ

2 कुरुन्थियों 6:7

असी सच्चे प्यार कने, सच्चाई रे वचनां कने, परमेश्वर री ताकत कने, धार्मिकता रे हथियारां कने जे हमला करणे ते अपणी रक्षा करणे तांइ हिन, ते लोक्कां रा असा री इज्जत या बेइज्जती करणे रे जरिये, ते तिन्हेरे असा रे बारे बिच ठीक या बुरी गल्लां बोलणे रे जरिये भी अप्पु जो परमेश्वर रे चुणे रे दास साबित करदे। ते हालांकि असा जो ढोंगी समजेया गेया, पर असी सच ही बोलदे।

2 कुरुन्थियों 9:13

किजोकी दूज्जेयां जो आर्थिक रीति कने सेवा करणे जो सबूत मन्नी करी तिन्हा ने परमेश्वर री महिमा करणी किजोकी तुसा ने मसीह यीशु रे सुब बसेख जो मन्नी करी तिन्हेरे अधीन रैहन्दे, ते से गरीब विश्वासी भाईयां री ते सारेयां री मदद करणे बिच बड़े उदार रैहन्दे। ते तुसा जो मिलणे री बड़ी लालसा करदे।

फिलिप्पियों 1:30

ते तुसा जो तैसा ही संघर्ष करणा पैणा, जदेई तुसा ने मेरे जो तां भी करदे दिख्खे रा है जां मैं तुसा कने फिलिप्पी सहर बिच थिया, ते अब्बे भी सूणदे कि मैं तिय्यां ही इत्ते कैद बिच संघर्ष करेया करदा।

कुलुस्सियों 3:15

अप्पु जो तिस सांती रे वस बिच करी देयो जे मसीह का मिलदी, किजोकी तुसा सारे ही इक्क ही सरीर रे हिस्सा हिन ते तुसा सारे इक्क-दूए कने सांती कने रैह्णे तांइ सद्दे गेरे हिन।

1 थिस्सलुनीकियों 2:12

कि तुसा इदेइ जिन्दगी जियो जे परमेश्वर जो आदर दिंदी हो, जे तुसा जो अपणे राज ते महिमा बिच हिस्सेदार बणने तांइ सददे।

1 तीमुथियुस 1:18

मेरे पुत्तर तीमुथियुस, मेरे तेरे जो ए सलाह देया करदा है, मैं चाह्‍ंदा कि तू भविष्यद्वक्ता रे बोल्ले री गल्लां याद करे कि तेरे कने कै होणा। तेरे जो तिसेरी बोल्ली री गल्लां जो तिन्हा झूठ्ठी शिक्षा दैणे वाले लोक्कां रे खिलाफ हथियार सांई इस्तेमाल करणा जरुरी है।

1 तीमुथियुस 1:19

तुसा मसीह यीशु बिच अपणे विश्वास जो बणाई रख्खो ते अपणा विवेक साफ रख्खो। किच्‍छ लोक्कां ने अपणे साफ विवेक जो छड्डी दित्ते रा है जिसेरी वजह कने मसीह यीशु बिच तिन्हेरा विश्वास मुकी गेरा है।

1 तीमुथियुस 4:14

तुसा बिच जे आत्मिक वरदान है तिसजो नजरंदाज मत करो जे तुसा जो भविष्यवाणी रे जरिये तिस बेल्ले दित्तेया गेया थिया जां कलीसिया रे बुजुर्गां ने तुसा पर हत्थ रख्खे थिये।

1 तीमुथियुस 6:13

परमेश्वर जे सारी चीजां जो जिन्दगी दिंदे ते मसीह यीशु जिन्हा पर पुन्तियुस पिलातुस रे सामणे मुकद्दमा चलणे रे बावजूद भी सच बोल्लेया थिया तिन्हा दोन्नों जो मैं अपणा गवाह बणाई करी तिज्जो ए हुकम दिंदा,

1 तीमुथियुस 6:19

जे अगर से मणू इय्यां करदे तां ए इदेया होणा कि जिय्यां से अपणी आणे वाली जिन्दगी तांइ अप्पु तांइ स्वर्ग बिच दौलत कठेरेया करेया करदे होण ते से दौलत कदी भी नी गोचणा। ते तिन्हा जो सच्ची जिन्दगी दित्ती जाणी जे कि हमेसा री जिन्दगी है।

2 तीमुथियुस 1:9

परमेश्वर ने असा जो छुटकारा दित्तेया ते असा जो इक्क पवित्र जिन्दगी जीणे तांइ सद्दे रा है। तिन्हा ने असा जो इधेरे तांइ नी चुणेया कि असी कोई भलाई रे कम्म कित्ते थिये, पर तिन्हा ने असा जो अपणे मकसद ते अनुग्रह री वजह कने चुणेया। परमेश्वर ने मसीह यीशु जो धरती पर भेजणे रे जरिये असा जो अपणा अनुग्रह दिखाणे रा मकसद इस दुनिया जो बणाणे का पैल्ले ही करी लित्तेया थिया।

2 तीमुथियुस 2:2

तुसा ने मते लोक्कां सामणे मेरे का मसीह रे बसेख रे बारे बिच सुणे रा है। इधेरे तांइ मैं चाह्‍ंदा कि तुसा भी तिस ही बसेख री शिक्षा तिन्हा भरोस्सेमंद विश्वासियां जो देयो जे होर लोक्कां जो सिखाणे रे काबिल हिन।

2 तीमुथियुस 4:7

इक्क पहलवान सांई मैं भी इक्क ठीक लड़ाई लड़े री है, मैं से कम्म पूरा कित्ते रा है जे मेरे जो मसीह ने दित्तेया थिया जिय्यां कि इक्क दौड़ लाणे वाला अपणी दौड़ पूरी करदा ते मैं आखिर तिकर भरोस्सेमंद रेया।

इब्रानियों 13:23

तुसा इस गल्ल जो जाणदे कि तीमुथियुस असा रा विश्वासी भ्याल जेल का छुटी गे रा है, जे अगर से तौले आंदा, तां मैं तिस कने तुसा कने मिलणे जो आणा।

इब्रानियों 3:14

जे अगर असी परमेश्वर बिच विश्वास करणे अंदर आखिर तिकर तिय्यां ही मजबूत बणे रे, जां तिस बेल्ले थिये जा असी पैल्ली वरी तिन्हा बिच विश्वास कित्तेया थिया, तां असा जो मसीह री हर चीज बिच हिस्सा मिलणा।

इब्रानियों 6:18

इधेरे तांइ परमेश्वर ने असा कने वादा कित्तेया, ते तिन्हा ने असा कने कसम खाई। ए दो गल्लां बदली नी सकदी, किजोकी ए नामुमकिन है कि परमेश्वर झूठ बोल्ले। इधेरे तांइ असी जे तिन्हा का शरण लैणे तांइ, तिन्हा का गेरे हिन, ते जे आस तिन्हा ने असा जो दित्ते री है, तिसजो पाणे तांइ बड़े प्रोत्साहित हिन।

1 पतरस 3:9

बुराई रे बदले बुराई मत करो ते ना गाली रे बदले गाली देयो, पर इसेरे उलट आशीर्वाद ही देया करो, किजोकी परमेश्वर ने तुसा जो इधेरे तांइ सद्दे रा है ताकि तुसा सारेयां जो आशीष देयो। जे अगर तुसा इय्यां करगे, तां परमेश्वर ने तुसा जो आशीष दैणी।

1 पतरस 5:10

परमेश्वर जे पूरे तरिक्के कने अनुग्रह कने भरित्ते रे हिन, तिन्हा ने असा रा मसीह कने रिस्ता होणे री वजह कने अपणी हमेसा तिकर रैह्णी वाली महिमा बिच हिस्सेदार बणने तांइ सद्दे रा है। तुसा रे थोड़े समय तिकर जुल्म सैह्णे का बाद परमेश्वर ने तुसा जो खरा मणू बनाणा ताकि तुसा बिच कोई खोट ना रे ते तिन्हा ने तुसा रे दिल जो मजबूत बनाणा ताकि तुसा तिन्हा बिच विश्वास करणे बिच मजबूत बणो।

1 यूहन्ना 2:25

जिसेरा वादा पिता परमेश्वर ने असा कने कित्ते रा थिया से हमेसा री जिन्दगी है।

यहूदा 1:3

मेरे प्यारे दोस्तों, मैं तुसा जो तिस छुटकारे रे बारे बिच चीठ्ठी लिखणे री बड़ी कोसीस कित्ती जे असा जो परमेश्वर रे पास्से का मसीह यीशु रे जरिये मिल्ले रा है ते जिस बिच असी सारे हिस्सेदार हिन। पर अवे मैं तुसा जो इस चीठ्ठी रे जरिये प्रोत्साहित करणा चाह्‍ंदा ताकि तुसा अपणे मसीही विश्वास बिच होर भी जादा मजबूत होणे री कोसीस करो। परमेश्वर ने अपणे लोक्कां जो ए विश्वास इक्क ही वरी तांइ देई दित्ते रा है, ते ए कदी बदली नी सकदा।

प्रकाशित वाक्य 3:3

तिन्हा शिक्षां जो याद करो जे तुसा ने लम्बे समय पैल्ले सुणी ते मन्नी थी। जे गल्लां तुसा जो सिखाई गे थी, तिन्हेरे मुताबिक चलो, अपणी लापरवाही का तौबा करो। जे अगर तुसा अपणी लापरवाही का बाज नी आए, तां मैं कुसकी चोर सांई चाणचक्के ही आणा, ते तुसा जो तिस बेल्ले रा पता भी नी चलणा जां मैं अचानक ही तुसा जो सजा दैणे तांइ आई जाणा।