1 तीमुथियुस 5:20 - चम्बयाली नौआ नियम

²⁰ जे मणू पाप करदे तिन्हा जो पूरी कलीसिया रे लोक्कां सामणे बको ताकि कलीसिया रे बाकि लोक्कां पर डर बणेया रे।

1 तीमुथियुस 5:20 ပူးပေါင်းရင်းမြစ်များ

प्रेरितां रे कम्म 19:17

ते ए गल्ल इफिसुस सहर रे रैह्णे वाले यहूदी ते यूनानी भी जाणी गे, ते सब जणे बड़े डरी गे, ते प्रभु यीशु रे नां री बड़ाई होर जादा होणा लग्गी।

प्रेरितां रे कम्म 5:11

यरुशलेम सहर री सारी कलीसिया रे मणू ते इन्हा गल्लां जो मनणे वाले सब मणू बड़े वरी डरी गे।

प्रेरितां रे कम्म 5:5

ए गल्लां सूणदे ही हनन्याह छुड़की पेया ते तिसेरी जान निकली गई ते सारे सुनणे वाले बड़े डरी गे।

2 कुरुन्थियों 7:11

ध्यान देयो कि परमेश्वर रे पास्से का मिल्ले रे दुख कने तुसा किन्ने गुणवान बणी गेरे हिन: तुसा बिच किन्नी जादा लगन, अपणी सफाई दैणे तांइ तुसा री उत्सुकता, नाइन्साफी रे खिलाफ तुसा रा गुस्सा, कुसकी खतरे तांइ तुसा रा चुकन्नापन, मेरे कने मिलणे तांइ तुसा री चाह्‍त, सेवा करणे तांइ तुसा रा लगाव, ते गलत कम्म करणे वाले जो सजा दैणे बिच तुसा री फुर्ती। इन्हा सारी चीजां कने तुसा ने ए साबित करी दित्तेया हर इक्क चीज ठीक तरिक्के कने करणे बिच तुसा ने कोई कसर नी छड्डी।

इफिसियों 5:11

न्याहरे रे नाकाम पाप्पां बिच हिस्सेदार मत बणो, बल्कि लोक्कां जो फटकार लाई करी दस्सो कि से कम्म गलत हिन।

1 तीमुथियुस 1:20

उन्ही बिच का हुमिनयुस ते सिकन्दर हिन जिन्हा जो मैं कलीसिया बिच का कड्डी दित्ते रा है ते तिन्हा जो शैतान रे वस बिच छड्डी दित्ते रा है ताकि से मणू समजी जाण कि तिन्हा जो परमेश्वर री बेजती नी करणी चाएदी।

2 तीमुथियुस 4:2

कि तू परमेश्वर रे बसेख रा प्रचार कर, ते चाए हालात ठीक होण या बुरे, हर बेल्ले प्रचार करणे तांइ तैयार रे, जरुरी है कि तू तिन्हा जो दस्से कि तिन्हा ने कै गलती कित्ते री है, ते तेरे जो तिन्हा जो तिन्हेरे पाप्पां तांइ बकणा जरुरी है। पर तेरे जो लोक्कां जो बड़े सबर कने सिखांदे होए प्रोत्साहित करणा भी जरुरी है।

तीतुस 1:13

क्रेते टापू पर रैह्णे वाले लोक्कां रे बारे बिच ए गल्लां सच हिन, इधेरे तांइ तिन्हा जो ठीक तरिक्के कने चितौणी देई करी समझा ताकि से मणू मसीह रे बारे बिच सच्ची शिक्षा पर विश्वास करण।

तीतुस 2:15

तेरे जो विश्वासी लोक्कां जो गल्लां सिखाणी चाएदी ते तिन्हा जो ए मनणे तांइ प्रोत्साहित करणा चाएदा। जरुरत पैणे पर तेरे का तिन्हा जो सुधारणे रा भी हक है। कुसकी जो भी तेरी सिखाए री गल्लां जो बेकार ना समजे।