1 तीमुथियुस 5:17 - चम्बयाली नौआ नियम

¹⁷ कलीसिया रा कोई भी मुखिया जे अगर अपणा कम्म सही तरिक्के कने करदा तां तिसेरी इज्जत होणा चाएदी खासतौर पर कलीसिया रे से बुजुर्ग मणू जे परमेश्वर रे बसेख जो सिखांदे ते प्रचार करदे।

1 तीमुथियुस 5:17 ပူးပေါင်းရင်းမြစ်များ

मत्ती 24:25

दिख्खो मैं पैल्ले का ही तुसा जो सब किच्‍छ दस्सी रख्खे रा है।

लूका 10:7

तिसी घर बिच रेयो, ते जे किच्‍छ तिन्हा का मिल्ले, से ही खाओ, किजोकी मजदूर जो तिसेरी मजदूरी मिलणा चाएदी, घर-घर मत फिरदे।

लूका 12:42

यीशु ने जवाब दित्तेया, इदेया विश्वास लायक अते समजदार मुंशी कुण है, जिसेरा मालक तिसजो तिसेरे घर री देखभाल ते तिन्हेरे नौक्करां जो रोट्टी दैणे री जिम्मेदारी देई सको?

यूहन्ना 4:38

मैं तुसा जो से खेतर कटणे तांइ भेज्जेया जिस बिच तुसा कोई मैहनत नी कित्ती। दूज्जेयां ने मैहनत कित्ती कने तुसा तिसेरी मैहनत रे फल्ल रे हिस्सेदार होए।

प्रेरितां रे कम्म 11:30

ते तिन्हा ने तिय्यां ही कित्तेया, ते बरनबास ते शाऊल रे हत्थां बुजुर्ग मणू का किच्‍छ पैसे भेजी दित्ते।

प्रेरितां रे कम्म 20:35

मैं तुसा जो सब किच्‍छ करी के दस्सेया कि इस तरिक्के कने मैह्नत करी के कमजोर मणूआं जो सम्भालणा ते प्रभु यीशु रे वचनां जो याद रखणा जरुरी है, जे तिन्हा ने अप्पु ही बोल्ले रा है, लैणे का दैणा धन्न है

प्रेरितां रे कम्म 28:10

तिन्हा ने असा री बड़ा आदर कित्ता, ते त्रै महिन्ने बाद जिस बेल्ले असी चलणा लगे तां जे किच्‍छ भी असा तांइ जरुरी थिया, जहाज पर रख्खी दित्तेया।

रोमियों 12:8

जे अगर कुसकी जो लोक्कां प्रोत्साहित करणे रा वरदान मिल्ले रा हो, तां से लोक्कां जो प्रोत्साहित करणे बिच लग्गी रेयो। जिस जो दान दैणे रा वरदान मिल्ले रा हो, ता से खुले मन कने दान दे। जिस जो लोक्कां री अगुवाई करणे रा वरदान मिल्ले रा हो, से पूरी मैहनत कने लोक्कां री अगुवाई करे। जिस जो दया करणे रा वरदान मिल्ले रा हो, से खुसी कने करेया करे।

रोमियों 15:27

तिन्हा ने ए सब किच्‍छ अपणी मर्जी कने कित्तेया। से यरुशलेम रे विश्वासियां रे कर्जदार हिन। किजोकी जां गैर यहूदी विश्वासियां ने यरुशलेम रे विश्वासियां रे जरिये परमेश्वर रे सुब बसेख री आत्मिक आशीषां जो हासिल कित्तेया, तां तिन्हा जो ए महसूस हुंदा कि तिन्हेरी आर्थिक मदद करी के तिन्हेरा कर्जा चुकाई दैण।

रोमियों 16:12

असा री विश्वासी बहणा, त्रूफैना कने त्रुफोसा जो भी मेरा नमस्कार, जे प्रभु री सेवा तांइ बड़ी मैहनत करदी। प्यारी भैण पिरसिस जो भी मेरा नमस्कार, जिनिए प्रभु तांइ बड़ी जादा मैहनत कित्ते री है।

1 कुरुन्थियों 15:10

परमेश्वर रे अनुग्रह री वजह कने ही मैं प्रेरित बणेया, तिन्हेरा से अनुग्रह जे मेरे पर होया, तिसेरा मेरी जिन्दगी बिच बड़ा जादा असर रेया। मैं तिन्हा सारे प्रेरितां का बधी करी मैहनत भी कित्ती: तां भी ए मेरे पास्से का नी होया पर परमेश्वर रे अनुग्रह री वजह जे मेरे पर है।

1 कुरुन्थियों 16:16

इधेरे तांइ मैं तुसा कने बिनती करदा कि ऐसे मणूआं रे अधीन रेयो जे इदेइ सच्ची भक्ति कने मैहनत करदे।

1 कुरुन्थियों 3:9

किजोकी असी मणू परमेश्वर रे सहकर्मी हिन ते तुसा विश्वासी मणू परमेश्वर रे खेत्तर सांई हिन, ते तुसा परमेश्वर रे घर सांई हिन।

2 कुरुन्थियों 6:1

असी जे परमेश्वर रे सहकर्मी हिन, छंदे करी के समझादें की परमेश्वर री अनुग्रह जे तुसा पर है, तिसजो बेकार मत जाणा देयो।

गलातियों 6:6

जे मणू परमेश्वर रे वचन री शिक्षा पाया करदे हिन, तिन्हा जो हर इक्क ठीक चीजां अपणे सिखाणे वालेयां कने बडंणी चाएदी।

फिलिप्पियों 2:16

ताकि जिस दिन मसीह यीशु ने हटी आणा तिस दिन मेरे जो ए घमंड होणा कि मेरी कोशीशां ते मैहनत फायदेमंद होई।

फिलिप्पियों 2:29

इधेरे तांइ तुसा प्रभु बिच तिस कने बड़ी खुसी कने मिलणा ते तिसेरे जदेय लोक्कां रा आदर करेयो।

फिलिप्पियों 4:3

ते मैं मसीह री सेवा करणे वाले अपणे विश्वासी भ्याल सुजुगस का ए बिनती करदा, कि से तिन्हा जनानियां बिच भी सुलह कराई दये किजोकी तिन्हा जनानियां ने मसीह रा सुब बसेख फैलाणे बिच मेरे, क्लेमेंस ते मेरे बाकि रे साथियां कने बराबर मैहनत कित्ते री है। ते तिन्हेरे नां जिन्दगी री कताब बिच लिख्खे गेरे हिन।

1 तीमुथियुस 3:5

जे अगर से मणू अपणे परिवार जो ढंग कने ना चलाई सके तां पक्के तौर पर से मणू परमेश्वर रे लोक्कां री देख-रेख करणे रे काबिल भी नी होई सकदा।

1 तीमुथियुस 4:10

किजोकी असी जिंदा परमेश्वर बिच विश्वास करदे इधेरे तांइ असी संघर्ष ते मैहनत करदे ताकि तिस जिन्दगी जो हासिल करी सकण। परमेश्वर असा मणूआं जो छुटकारा दिंदे ते खासतौर पर तिन्हा लोक्कां जो जे तिन्हा बिच विश्वास करदे।

1 तीमुथियुस 4:14

तुसा बिच जे आत्मिक वरदान है तिसजो नजरंदाज मत करो जे तुसा जो भविष्यवाणी रे जरिये तिस बेल्ले दित्तेया गेया थिया जां कलीसिया रे बुजुर्गां ने तुसा पर हत्थ रख्खे थिये।

1 तीमुथियुस 4:16

इधेरे तांइ चुकन्ने रेयो कि तुसा किय्यां अपणी जिन्दगी जिया करदे हिन ते तुसा कै सिखांदे। इन्हा गल्लां पर टिकी रेय किजोकी जे अगर इय्यां करदा रैह्‍ंगा तां इसेरे नतीज्जे रे तौर पर परमेश्वर तेरे जो तेरे सुनणे वाले लोक्कां जो सजा का बचाणा।

1 तीमुथियुस 4:6

जे अगर तू संगी विश्वासियां जो इन्हा गल्लां री शिक्षां दिंदा रैह्‍ंगा, तां तैं मसीह यीशु रा खरा दास ठैहराणा ते तैं अपणे मन जो परमेश्वर रे वचन कने मजबूत करणा जिस जो असी बदिया का बदिया शिक्षा कने मनदे भी।

1 तीमुथियुस 5:19

जां तांइ दो या त्रै लोक्कां री गवाई ना हो तां तांइ कलीसिया रे कुसकी बुजुर्ग पर पाप करणे रे इल्जाम जो मत मन्नो।

1 तीमुथियुस 5:3

विधवा जनानियां री इज्जत करेया करो जिन्हा जो संभालणे ते तिन्हेरी देख-रेख करणे वाला कोई नी है।

2 तीमुथियुस 2:6

फसल रे पैल्ले हिस्से रा हकदार भी से किसान ही है जिनिये तिसजो बाणे बिच मैहनत कित्ते री है।

2 तीमुथियुस 4:2

कि तू परमेश्वर रे बसेख रा प्रचार कर, ते चाए हालात ठीक होण या बुरे, हर बेल्ले प्रचार करणे तांइ तैयार रे, जरुरी है कि तू तिन्हा जो दस्से कि तिन्हा ने कै गलती कित्ते री है, ते तेरे जो तिन्हा जो तिन्हेरे पाप्पां तांइ बकणा जरुरी है। पर तेरे जो लोक्कां जो बड़े सबर कने सिखांदे होए प्रोत्साहित करणा भी जरुरी है।

इब्रानियों 13:17

अपणे अगुवे री गल्लां मन्नो, ते तिन्हेरे अधीन रेयो। से हमेसा तुसा तांइ चुकन्ने रैहन्दे, ताकि तुसा भटकी ना जाण। किजोकी तिन्हा जो अपणी सेवकाई रा हिसाब परमेश्वर जो दैणा जरुरी है। इय्यां ही करो, ताकि से अपणे कम्मां बिच र खुस ही होण, ना की दुखी होण, नी ता तुसा जो कोई फायदा नी होणा।

इब्रानियों 13:24

अपणे सारे अगुवे जो नमस्ते ते परमेश्वर रे सारे लोक्कां जो नमस्ते बोल्लो। ईतालिया देस बिच रैह्णे वाले विश्वासी लोक्कां रा तुसा जो नमस्कार।

इब्रानियों 13:7

जे तुसा रे आत्मिक अगुवे थिये, ते जिन्हा ने तुसा जो परमेश्वर रे बारे बिच दस्सेया थिया, तिन्हा जो याद रख्खो; ते सोच्चो कि से किय्यां जिन्दगी जिन्दे थिये, ते फिरी मरे। जदेया विश्वास तिन्हा जो परमेश्वर बिच विश्वास थिया, तैसा ही विश्वास तुसा भी परमेश्वर बिच दिखाओ।