1 तीमुथियुस 5:1 - चम्बयाली नौआ नियम

¹ कुसकी बुजुर्ग मणू जो बकी करी मती समझांदा, पर तिसजो अपणे प्यो जदेया मन्नी करी समजाए, ते जुआन मुंडेया जो अपणा भ्याल जदेया मन्नी करी समजाए।

1 तीमुथियुस 5:1 ပူးပေါင်းရင်းမြစ်များ

मत्ती 23:8

पर तुसा मणूआं बिच अप्पु जो गुरु मत बुलवान्दे, किजोकी तुसा रा इक्क ही गुरु है, ते तुसा सारे सिर्फ भैण भाई हिन।

प्रेरितां रे कम्म 14:23

ते तिन्हा ने हर-इक्क कलीसिया बिच तिन्हेरे तांइ बुजुर्ग मणू रख्खे, ते ब्रत रख्खी करी प्रार्थना करी के, तिन्हा जो प्रभु रे हत्थां बिच सौंपेया जिन्हा पर तिन्हा ने विश्वास कित्तेया थिया।

प्रेरितां रे कम्म 15:4

जां पौलुस ते बरनबास यरुशलेम सहर बिच पूज्जे, तां कलीसिया ते खास प्रेरितां ते बुजुर्ग मणू तिन्हा कने खुसी कने मिल्ले, ते तिन्हा ने दस्सेया कि परमेश्वर ने तिन्हा कने होई करी कदेय-कदेय कम्म कित्ते थिये

प्रेरितां रे कम्म 15:6

तां खास प्रेरित ते बुजुर्ग मणू इस गल्ल रे बारे सोच-विचार करणे तांइ कठ्ठी गे

प्रेरितां रे कम्म 20:17

तिनिए मिलेतुस सहर का इफिसुस सहर बिच बसेख भेज्जी करी कलीसिया रे बुजुर्ग लोक्कां जो सदाया।

रोमियों 13:7

इधेरे तांइ तुसा जो तिन्हा अधिकारियां जो से सारी चीजां दैणा चाएदी जे तिन्हेरा हक है। तुसा जो हर तरिक्के री चुंगी, आदर-सम्मान दैणा चाएदा।

गलातियों 6:1

ओ संगी विश्वासियों, जे अगर कोई मणू कुसकी गलत कम्म करदा पकड़ेया भी जाओ, तां तुसा मणू जे पवित्रात्मा रे कहे मुताबिक चलदे, निम्तेपन कने इदेय मणू जो सही रस्ते पर वापिस लेयो, ते अपणे तांइ भी चुकन्ने रेयो ताकि तुसा पाप करणे री परिक्षा बिच ना पेई जाओ।

1 तीमुथियुस 5:17

कलीसिया रा कोई भी मुखिया जे अगर अपणा कम्म सही तरिक्के कने करदा तां तिसेरी इज्जत होणा चाएदी खासतौर पर कलीसिया रे से बुजुर्ग मणू जे परमेश्वर रे बसेख जो सिखांदे ते प्रचार करदे।

1 तीमुथियुस 5:2

बुजुर्ग जनानियां जो अपणी मां जदेया मन्नी करी तिन्हा जो सलाह देया करो ते जुआन कुड़ियां जो अपणी भैण मन्नी करी समजाया कर। ए सब किच्‍छ अपणे पूरे दिल कने करेया करो।

तीतुस 2:2

बुजुर्ग मणू अप्पु जो काबू बिच रखणे वाले होण, ते सोच्ची-समजी करी बर्ताव करणे वाले होण ताकि मणू तिन्हेरी इज्जत करण, परमेश्वर बिच तिन्हेरा विश्वास मजबूत हो, ते दूए लोक्कां कने बड़ा रखणे वाले होण, ते सहनशील होण।

तीतुस 2:6

इय्यां ही जुआन मर्दां जो भी समजाया कर कि से सोच्ची-समजी करी बर्ताव करण।

याकूब 3:17

पर परमेश्वर रे पास्से का मिलणे वाला ज्ञान सबका पैल्ले तां से पवित्र हुन्दा, फिरी मिलनसार, भद्र, दया कने भरितेरा अते ठीक कम्मां कने लद्दितेरा, अते बगैर भेद-भाव रे ते सच्चा भी हुन्दा।

याकूब 5:14

तुसा बिच जे अगर कोई बिमार है तां कलीसिया रे बुजुर्ग लोक्कां जो सद्दो, ते से प्रभु रे नां कने तिस पर तेल मली करी तिसेरे तांइ प्रार्थना करण,

1 पतरस 5:1

तुसा रे कलीसिया रे बुजुर्ग लोक्कां कने मैं इक्क संगी मुखिया ते मसीह पर होए जुल्मां रा इक्क इदेया गवाह होणे रे नात्ते, जिनिये तिन्हेरी महिमा बिच हिस्सेदार भी होणा ए बिनती करदा,

2 यूहन्ना 1:1

मैं यूहन्ना, जे कलीसिया रा बुजुर्ग है, तिस जनानी जो जिस जो परमेश्वर ने चुणे रा है ते तिसेरे बच्चेयां जो ए चीठ्ठी लिख्खेया करदा है। मैं तिन्हा कने प्यार करदा, बल्कि सिर्फ मैं ही नी पर सारे तिन्हा कने प्यार करदे किजोकी असी सारे परमेश्वर री सच्चाई बिच विश्वास करदे।

3 यूहन्ना 1:1

मैं यूहन्ना, जे कलीसिया रा बुजुर्ग है, अपणे प्यारे दोस्त गयुस जो ए चीठ्ठी लिख्खेया करदा है, जिस कने मैं सच्चा प्यार करदा।

प्रकाशित वाक्य 4:4

तिस सिंहासन रे चौं पास्से होर चौबी सिंहासन थिये जिन्हा पर चौबी बुजुर्ग मणू बैठ्ठे रे थिये तिन्हा ने चिट्टा कपड़ा ते अपणे सिर पर सोन्ने रा मुकुट पाए रा थिया।