1 तीमुथियुस 4:6 - चम्बयाली नौआ नियम

⁶ जे अगर तू संगी विश्वासियां जो इन्हा गल्लां री शिक्षां दिंदा रैह्‍ंगा, तां तैं मसीह यीशु रा खरा दास ठैहराणा ते तैं अपणे मन जो परमेश्वर रे वचन कने मजबूत करणा जिस जो असी बदिया का बदिया शिक्षा कने मनदे भी।

1 तीमुथियुस 4:6 ပူးပေါင်းရင်းမြစ်များ

मत्ती 13:52

यीशु ने उन्हा जो बोल्लेया, दिख्खो, इधेरे तांइ हर इक्क शास्त्रि जे मेरे पर विश्वास करदा, से इक्क घर रे मालक सांई है, जे अपणे ज्ञान रे भण्डार बिच का पुराणी ते नौई शिक्षा लोक्कां जो सिखांदा।

लूका 1:3

मैं भी इन्हा गल्लां रे बारे बिच ठीक तरिक्के कने जांच-पड़ताल कित्ते री है, ते मेरे जो ए ही खरा लग्गेया कि मैं ए सारी गल्लां तुसा जो क्रमनुसार लिख्खी करी भेज्जी देयां।

प्रेरितां रे कम्म 1:15

तिन्हा ही दिनां बिच पतरस संगी विश्वासियां रे बिच जे इक्क सौ भी लोक्कां रे नेड़े-तेड़े थिये, खड़ी करी बोलणा लगेया,

प्रेरितां रे कम्म 20:31

इधेरे तांइ चुकन्ने रेयो ते याद रख्खो कि मैं तुसा कने त्रै साल रेया ते हर बेल्ले तुसा री फिकर कित्ती ते कदी भी समझाणा नी छड्डेया।

प्रेरितां रे कम्म 20:35

मैं तुसा जो सब किच्‍छ करी के दस्सेया कि इस तरिक्के कने मैह्नत करी के कमजोर मणूआं जो सम्भालणा ते प्रभु यीशु रे वचनां जो याद रखणा जरुरी है, जे तिन्हा ने अप्पु ही बोल्ले रा है, लैणे का दैणा धन्न है

रोमियों 15:15

तां भी मैं किच्‍छ गल्लां तुसा जो याद दुआणे तांइ खुली करी लिख्खी। ए तिस अनुग्रह री वजह कने होया, जे परमेश्वर ने मेरे जो दित्ते रा है,

1 कुरुन्थियों 4:17

इधेरे तांइ मैं तीमुथियुस जो जे प्रभु बिच मेरा प्यारा अते भरोस्सेमंद पुत्तर सांई है, तुसा का भेज्जेया। तिन्ने तुसा जो दसणा कि इक्क मसीही मणू रे तौर पर मैं किय्यां जिन्दगी जिया करदा है, जदेया कि मैं हर इक्क जगाह् ते हर इक्क कलीसिया बिच दसदा भी।

2 कुरुन्थियों 11:23

कै से ही मसीह यीशु री सेवा करणे वाले मणू हिन? मैं बोलदा कि मैं तिन्हा का बधी करी है! मैं पागल मणू सांई बोलदा कि मैं तिन्हा का जादा मैहनत कित्ते री है, मैं तिन्हा का जादा कैद होए रा है, मैं तिन्हा का जादा कोड़े खाए, ते मैं तिन्हा का जादा मौत रे खतरे बिच पेरा है।

2 कुरुन्थियों 3:6

तिन्हा ने असा जो परमेश्वर रे नौए वाचा रे सेवक होणे रे काबिल बणाए रा है, ए नौई वाचा मूसा रे कानून बिच लिख्खे री गल्लां रा नी है पवित्रात्मा रा है। किजोकी मूसा रे कानून पर ना चलणे पर ता मौत मिलदी, पर परमेश्वर री नौई वाचा रे जरिये पवित्रात्मा असा जो हमेसा री जिन्दगी दिंदा।

2 कुरुन्थियों 6:4

हर तरिक्के कने असी ए ज़ाहिर करदे कि असी परमेश्वर रे चुणे रे दास हिन, असी बड़े सबर कने दुखां, कमी-घटियां ते मुसीबतां जो सैह्‍ंदे।

इफिसियों 6:21

मैं तुखिकुस जो तुसा का भेज्जेया करदा है जे प्यारा संगी विश्वासी ते प्रभु बिच भरोस्सेमंद सेवक है। तिसने तुसा जो मेरे बारे बिच सारा किच्‍छ दस्सी दैणा कि असी कदेय हिन ते मैं किय्यां रैंह्दा।

फिलिप्पियों 2:20

किजोकी मेरे का तीमुथियुस रे अलावा इदेय स्वभाव रा होर कोई मणू नी है कि से ठीक मन कने तुसा री चिन्ता करे।

फिलिप्पियों 2:22

पर तुसा तां जाणदे कि तीमुथियुस ने किय्यां साबित कित्ते रा है कि से विश्वासयोग्य है। ते जिय्यां इक्क पुत्तर अपणे प्यो कने मैहनत करदा, तिय्यां ही तीमुथियुस ने सुब बसेख फैलाणे अन्दर मेरे कने मैहनत कित्ती है।

फिलिप्पियों 3:16

असा जो तिस सच रे हिसाब कने जिन्दगी बिताणी चाएदी जे परमेश्वर ने असा पर ज़ाहिर कित्ते री है।

कुलुस्सियों 2:19

तिन्हा ने मसीह जो छड्डी दित्ते रा है, जे सरीर रूपी कलीसिया रे सिर सांई हिन। किजोकी से ही पूरे सरीर जो अप्पु-मिते तिसेरे जोड़ ते नसां कने जोड़ी करी रखदे, ते से तिय्यां ही बदधे रैहन्दे जिय्यां परमेश्वर चाह्‍ंदे।

कुलुस्सियों 3:16

जिय्यां कि तुसा इक्क दूए जो बड़ी समजदारी ते ज्ञान कने सिखांदे हिन, ते बड़ी शुकरगुज़ारी कने परमेश्वर तांइ भजन, स्तुतीगान ते आत्मिक गीत गाया करदे हिन, तिस कने कने ही मसीह रे वचनां जो अप्पु अंदर भरपुरी कने बसणा देयो।

कुलुस्सियों 4:7

तुखिकुस मसीह बिच मेरा प्यारा विश्वासी भ्याल ते भरोस्सेमंद साथी है, जे मसीह री सेवकाई रे कम्म बिच मेरा साथी है। तिनिये तुसा जो मेरी हर गल्ल दस्सी दैणी।

1 थिस्सलुनीकियों 3:2

ते असी तुसा जो उत्साहित करणे तांइ ते विश्वास बिच मजबूत करणे तांइ अपणे इक्क विश्वासी भाई, मसीह रा सुब बसेख सुनाणे वाले असा रे साथी ते परमेश्वर रे सेवादार तीमुथियुस जो तुसा का भेज्जेया।

1 तीमुथियुस 1:10

व्यभिचारियां तांइ, दूए मर्दां कने अस्वभाविक रिश्ते बणाणे वाले मर्दां तांइ, गुलामी तांइ मणूआं जो बेचणे वाले लोक्कां तांइ, झूठ बोलणे वाले लोक्कां तांइ, झूठ्ठी कसम खाणे वाले लोक्कां तांइ ते सही शिक्षा रे उलट कुसकी भी तरिक्के रा कम्म करणे वाले लोक्कां तांइ है।

1 तीमुथियुस 4:16

इधेरे तांइ चुकन्ने रेयो कि तुसा किय्यां अपणी जिन्दगी जिया करदे हिन ते तुसा कै सिखांदे। इन्हा गल्लां पर टिकी रेय किजोकी जे अगर इय्यां करदा रैह्‍ंगा तां इसेरे नतीज्जे रे तौर पर परमेश्वर तेरे जो तेरे सुनणे वाले लोक्कां जो सजा का बचाणा।

1 तीमुथियुस 6:3

जे अगर कोई मणू गलत शिक्षा सिखांदा ते मसीह यीशु री दित्ते री सही शिक्षा जो नी मनदा,

2 तीमुथियुस 1:6

इधेरे तांइ मैं तुसा जो तिन्हा वरदान्नां रा फिरी चेत्ता दुआया करदा है जे तुसा जो परमेश्वर ने तां दित्ते थिये जां मैं तुसा रे सिर पर अपणा हत्थ रख्खेया थिया।

2 तीमुथियुस 3:10

पर तीमुथियुस तू साफ तौर पर जाणदा कि मैं कै सिखांदा ते मैं जिन्दगी किय्यां जिन्दा, ते मेरा मकसद कै है ते मैं कुस पर विश्वास करदा। तू जाणदा कि मैं सारे जणेया कने बड़ा सबर ते प्यार रख्खेया, मैं मुसीबतां भी सहन कित्ती, लोक्कां ने मेरे पर जुल्म भी कित्ते।

2 तीमुथियुस 4:3

किजोकी इदेया बेल्ला आणा जां लोक्कां ने सही शिक्षा जो सुनणा नी चाह्‍णा, पर तिन्हा ने अपणी मर्जी रे हिसाब कने चलणा ते तिन्हा शिक्षकां जो तोपणा जिन्हा ने से ही बोलणा जे से मणू सुनणा चाह्‍ंदे।

तीतुस 2:1

पर तीतुस, तेरे जो लोक्कां जो सिर्फ मसीह यीशु रे बारे बिच सही शिक्षा ही सिखाणा जरुरी है।

1 पतरस 2:2

जिय्यां कि नौए जम्मे रे बच्चे अपणी मां रे दूद्द जो तोपदे, जे कि इक्कदम खरा हुंदा, तिय्यां ही तुसा जो भी परमेश्वर रे वचन जो सिखणी री चाह्‍त रखणा चाएदी ताकि तुसा आत्मिक तौर पर परिपक्व होई जाओ। तां फिरी आखिर बिच, परमेश्वर ने तुसा जो इस दुनिया री बुरी चीजां का बचाणा।

2 यूहन्ना 1:9

मैं तुसा जो बोलदा कि जे अगर कोई मणू मसीह यीशु री शिक्षा पर चलणा छड्डी दिंदा पर तिस शिक्षा बिच अपणी गल्लां भी जोड़ी दिंदा तां तिसेरा परमेश्वर कने कोई रिस्ता नी है। पर जे अगर कोई मणू मसीह री शिक्षा पर बराबर चलदा रैहन्दा तां तिस मणू रा पिता परमेश्वर ते तिन्हेरे पुत्तर मसीह यीशु कने रिस्ता है।

यहूदा 1:5

हालांकि तुसा इन्हा सारी गल्लां जो समजी गेरे हिन, पर फिरी भी मैं तुसा जो ए गल्लां चेत्ता कराणा चाह्‍ंदा कि प्रभु इस्राएल देस रे लोक्कां जो मिस्र देस री गुलाम्मी का छुटकारा देई करी लेई आया पर बाद बिच विश्वास ना करणे वाले जो बियाबान बिच मुकाई दित्तेया थिया।