1 थिस्सलुनीकियों 5:8 - चम्बयाली नौआ नियम

⁸ ते जे असी दिन जदेय धार्मिकता रे मणू हिन, असा जो प्यार ते विश्वास जो अपणी रक्षा तांइ लैणी चाएदी, जिय्यां इक्क सिपाई अपणी रक्षा तांइ इक्क झीलम जो पांदा, ते इस आस रे टोप जो तिस सिपाई सांई पाई करी इस उम्मीद बिच चुकन्ने रैह्णा चाएदा कि असी हमेसा री सजा का बचाए गेरे हिन।

1 थिस्सलुनीकियों 5:8 ပူးပေါင်းရင်းမြစ်များ

1 कुरुन्थियों 13:13

पर अवे ए त्रै तरिक्के री चीजां हिन जे असा जो करणा चाएदी। परमेश्वर बिच विश्वास रखणा, परमेश्वर रे वादेयां री आस रखणा ते सारेयां जो प्यार करणा। पर इन्हा त्रैन्नी चीजां बिच का परमेश्वर ते सारेयां जो प्यार करणा सबका जादा जरुरी है।

2 कुरुन्थियों 6:7

असी सच्चे प्यार कने, सच्चाई रे वचनां कने, परमेश्वर री ताकत कने, धार्मिकता रे हथियारां कने जे हमला करणे ते अपणी रक्षा करणे तांइ हिन, ते लोक्कां रा असा री इज्जत या बेइज्जती करणे रे जरिये, ते तिन्हेरे असा रे बारे बिच ठीक या बुरी गल्लां बोलणे रे जरिये भी अप्पु जो परमेश्वर रे चुणे रे दास साबित करदे। ते हालांकि असा जो ढोंगी समजेया गेया, पर असी सच ही बोलदे।

गलातियों 5:5

किजोकी पवित्रात्मा री वजह कने असी विश्वास कने, आस कित्ते री धार्मिकता री भाल रखदे जे परमेश्वर ने तिन्हा लोक्कां जो दैणे रा वादा कित्ते रा ओ जे तिन्हा पर विश्वास करदे।

इफिसियों 6:11

असी मणूआं रे खिलाफ नी लड़ेया करदे हिन। असी न्याहरे रे अधिकारी, अधिपति, शासक ते आत्मिक दुनिया री ताकतां रे खिलाफ लड़ेया करदे हिन। इधेरे तांइ परमेश्वर रे दित्ते री झीलम पाई लेयो ताकि जां से बुरा दिन आए तां तुसा अप्पु जो शैतान री चलाकियां का बचाई सको। ते जां ए लड़ाई मुकी जाओ, तां भी तुसा मजबूती कने खड़ी रेयो।

इफिसियों 6:23

मैं परमेश्वर पिता ते प्रभु मसीह यीशु का ए प्रार्थना करदा कि से तुसा जो सांती दे। ते इस कने तुसा बिच प्यार बधे ते तुसा मसीह यीशु बिच विश्वास करणे बिच बणी रेयो।

1 थिस्सलुनीकियों 5:5

किजोकी तुसा सारे दिन री लौ जदेय धार्मिकता रे मणू हिन। असी न्याहरे जैसी बुराई ते रात रे मणू नी हिन।

2 थिस्सलुनीकियों 2:16

असी अपणे प्रभु यीशु मसीह ते पिता परमेश्वर का प्रार्थना करदे जे असा कने प्यार करदे ते जिन्हा ने अपणे अनुग्रह रे जरिये असा जो कदी ना मुकणे वाली हिम्मत ते इक्क पक्की आस भी दित्ते री है।

इब्रानियों 6:19

ए आस जे असा का है ते कदी भी टुटी नी सकदी, ते असा जो परमेश्वर का दुर भटकणे नी दिंदी, पर ए असा जो परमेश्वर का मन्दिर बिच, स्वर्ग अंदर, सबका जादा पवित्र जगाह् पर पुजांदा।

1 पतरस 1:13

इधेरे तांइ अपणे मन जो इय्यां तैयार करी लेयो कि जिय्यां मणू अपणी कमर बन्नी करी कम्म करणे तांइ तैयार हुंदे। इसेरा मतलब ए है कि तुसा जो अपणी सोच पर काबू रखणा चाएदा। बड़े हौसंले कने तिस छुटकारे री पूरी आस रख्खी करी अपणी बोल-चाल जो सही रख्खो जे परमेश्वर ने तुसा जो मसीह यीशु रे स्वर्ग हटणे रे समय पर बड़े अनुग्रह कने दैणा।

1 पतरस 2:9

पर तुसा मणू तैसे नी हिन किजोकी तुसा परमेश्वर रे चुणे रे मणू हिन, तुसा तिस परमेश्वर रे पुरोत्त हिन जे राज्जा है। तुसा सारे परमेश्वर जो समर्पित हिन ते तुसा परमेश्वर रे ही हिन। तिन्हा ने तुसा जो न्याहरे का बाहर अपणी अनौखी रौसनी बिच अंदे रा है ताकि तुसा तिन्हेरे महान कम्मां रा प्रचार करी सको।

1 यूहन्ना 1:7

पर जिय्यां परमेश्वर रौसनी बिच हिन जे अगर असी भी तिय्यां ही रौसनी बिच जिन्दगी बिताण ते असी परमेश्वर कने अप्पु मिते इक्क-दूए कने मेल-मिलाप रखगे, ते तां मसीह यीशु रे खून ने असा रे पाप्पां का साफ करणा।