1 थिस्सलुनीकियों 2:9 - चम्बयाली नौआ नियम

⁹ किजोकी ओ भाईयों, तुसा ने असा री कड़ी मैहनत जो याद रख्खेया ते असा ने इस तांइ रात-दिन कम्म करी के तुसा बिच परमेश्वर रा सुब बसेख प्रचार कित्ता ताकि असी अपणी जरुरतां तांइ तुसा पर बोझ ना बनण।

1 थिस्सलुनीकियों 2:9 ပူးပေါင်းရင်းမြစ်များ

लूका 18:7

तां कै परमेश्वर अपणे चुणे दे मणूआं पर ध्यान नी दिह्गां, जे तिन्हा जो रात-ध्याड़ी चेता करदे अते मन्गदे कि असा जो फैसला कर? कै परमेश्वर ने तिन्हेरी सुनणे तांइ बड़ी हाण लगागाँ?

लूका 2:37

ते से फिरी चुरास्सी साल्लां तांइ विधवा ही रेई। तिनिए मन्दिर जो कदी भी नी छड्डेया, ब्रत्त अते प्रार्थना करदे परमेश्वर री भक्ति करदी रेह्न्दी थी।

प्रेरितां रे कम्म 18:3

ते पौलुस तिन्हा जो दिखणे तांइ गेया किजोकी से तिन्हेरे सांई तम्बू रे व्यापारी थिये ते से तित्ते रुकी करी तिन्हेरे कने कम्म करदा थिया।

प्रेरितां रे कम्म 20:24

पर मैं अपणी जान जो किच्‍छ भी नी समजदा कि तिसजो प्यारा समजां, पर तां ए कि, मैं अपणी दौड़ जो ते तिस सेवा जो पूरा करां, जे मैं परमेश्वर रे अनुग्रह री सुब बसेख पर गवाई दैणे तांइ प्रभु यीशु का पाए री है।

प्रेरितां रे कम्म 20:31

इधेरे तांइ चुकन्ने रेयो ते याद रख्खो कि मैं तुसा कने त्रै साल रेया ते हर बेल्ले तुसा री फिकर कित्ती ते कदी भी समझाणा नी छड्डेया।

रोमियों 1:1

मैं पौलुस, मसीह यीशु रा दास है, ते परमेश्वर ने मेरे जो प्रेरित बणने तांइ चुणे रा है। ते तिन्हा ने तिस सुब बसेख रा प्रचार करणे तांइ अलग कित्ते रा है,

रोमियों 15:16

कि मैं गैर यहूदियां तांइ मसीह यीशु रा दास होई करी, परमेश्वर रे सुब बसेख री सेवा इक्क पुरोत्त सांई करां। ताकि मैं तुसा गैर यहूदियां जो पवित्रात्मा रे जरिये पवित्र कित्ते रे इक्क कुर्बानी सांई परमेश्वर जो चढां जिस कने से खुस हुंदे।

रोमियों 15:19

जे ताकत पवित्रात्मा ने मेरे जो दित्ते री है, तिस कने मैं चिन्ह-चमत्कार दिखांदा। इधेरे तांइ मैं यरुशलेम का लेई करी इल्लिरिकुम प्रदेश तिकर जित्ते भी गेया, तित्ते लोक्कां जो मसीह यीशु रा सुब बसेख सुणाया।

1 कुरुन्थियों 4:12

अपणे हत्थां कने मैहनत-मजदूरी करदे हिन, जां मणू असा जो बुरा-भला बोलदे तां असी तिन्हा जो आशीष दिंदे, से असा जो तंग करदे अते असी तिन्हा जो सहन करदे।

1 कुरुन्थियों 9:15

पर मैं इन्हा बिच कुसकी भी हक जो अपणी जरुरतां जो पूरा करणे तांइ इस्तेमाल नी कित्तेया, ते मैं ए गल्लां इधेरे तांइ बिल्कुल भी नी लिख्खेया करदा है कि तुसा मेरे तांइ किच्‍छ करो, किजोकी मैं इसका जादा मरणा पसंद करगा कि कोई मेरे घमंड जो फिजुल ठेहराओ।

1 कुरुन्थियों 9:18

तां मेरी मजूरी ए है कि मैं मुफ्त बिच मसीह यीशु रा सुब बसेख सूणां ते हालांकि मेरे जो तुसा का आर्थिक मदद लैणे रा हक है तां भी मैं इस काबिल है कि बगैर तिसेरे मैं सुब बसेख रा प्रचार करां।

1 कुरुन्थियों 9:4

जित्ते तिकर असा रा सवाल है, असा जो अपणी सेवकाई रे कम्म तांइ तुसा का आर्थिक मदद लैणे रा पूरा हक्क है।

2 कुरुन्थियों 11:27

मैहनत ते दुख अन्दर, घड़ी-घड़ी जागदे रैह्णे बिच ते भूख्ख-प्यास बिच भी रेया ते सर्दी बिच बगैर निग्गे कपड़े रे भी रेया।

2 कुरुन्थियों 11:9

ते जिस बेल्ले मैं तुसा कने थिया ते मेरे जो पैसे री कमी होई, तां मैं कुसकी पर भार नी पाया, किजोकी विश्वासी भ्यालां ने मकिदुनिया प्रदेश का आई करी मेरे कमी जो पूरा कित्तेया, ते मैं हर गल्ल बिच अप्पु जो तुसा पर भार बणने का रोक्केया, ते तिय्यां ही रोक्की रैह्णा।

2 कुरुन्थियों 6:5

ते असी कोड़े खाणे कने, कैद होणे कने, हगांमेया कने, मैहनत करदे होए, जागदे रैह्णे कने, भूख्ख बिच, पवित्रता कने, ज्ञान कने, सबर कने, रहम कने, पवित्रात्मा कने अप्पु जो परमेश्वर रे चुणे रे दास साबित करदे।

फिलिप्पियों 4:16

इसी तरिक्के कने जां मैं थिस्सलुनीके प्रदेश बिच थिया, तां भी तुसा मेरी जरुरतां री कमी पूरी करणे तांइ इक्क बाहर कै पर दो वरी दान भेज्जेया थिया।

1 थिस्सलुनीकियों 1:3

जां असी पिता परमेश्वर का प्रार्थना करदे तां असी तुसा लोक्कां रे विश्वास रे हिसाब रे कम्मां जो, ते विश्वासी लोक्कां तांइ तुसा रे प्यार भरे कम्मां जो, ते मसीह यीशु रे हटणे री आस बिच मुसीबतां रे दौरान तुसा रे सबर रखणे जो भी याद करदे।

1 थिस्सलुनीकियों 2:2

बल्कि तुसा अप्पु ही जाणदे की असा ने पैल्ले फिलिप्पी सहर बिच दुख चुक्कणे ते तकलीफ सहणे पर भी असा रे परमेश्वर ने असा जो इदेइ हिम्मत दित्ती, की असी तुसा रे सहर बिच वरी विरोध रे हुदें होए भी तुसा जो परमेश्वर रा सुब बसेख सुनाण

1 थिस्सलुनीकियों 2:6

असी मणूआं का आदर नी चाह्‍ंदे थिये, ते ना तुसा का, ना होर कुसकी का, हालांकि असी चाह्‍ंदे तां मसीह यीशु रे प्रेरित होणे रे वजह कने तुसा पर बोझ पाई सकदे थिये

1 थिस्सलुनीकियों 3:10

परमेश्वर रे सामणे असी लगातार प्रार्थना करदे कि तुसा कने मिलण, अते मसीह यीशु बिच तुसा रा विश्वास बधाणे तांइ तुसा री मदद करण।

1 तीमुथियुस 1:11

सुब बसेख री ए महिमामय शिक्षा असा रे धन्न परमेश्वर रे पास्से का है जे लोक्कां जो सुनाणे तांइ मेरे जो सौंप्पि गे री है।

1 तीमुथियुस 4:10

किजोकी असी जिंदा परमेश्वर बिच विश्वास करदे इधेरे तांइ असी संघर्ष ते मैहनत करदे ताकि तिस जिन्दगी जो हासिल करी सकण। परमेश्वर असा मणूआं जो छुटकारा दिंदे ते खासतौर पर तिन्हा लोक्कां जो जे तिन्हा बिच विश्वास करदे।

1 तीमुथियुस 5:5

विधवा जनानियां परमेश्वर बिच विश्वास रखदी किजोकी तिन्हेरे जो संभालणे वाला कोई नी हुंदा ते से दिन-रात अपणी मदद तांइ परमेश्वर का छंदे-मिन्नतां ते प्रार्थना करणे बिच लग्गी रेह्न्दी।

2 तीमुथियुस 1:3

मैं हमेसा अपणी प्रार्थनां बिच तुसा जो याद करदा ते तुसा तांइ परमेश्वर रा शुकर करदा। मैं ते मेरे पूरखां ने तिस्सी परमेश्वर री साफ विवेक कने अराधना कित्ते री है।