1 थिस्सलुनीकियों 2:13 - चम्बयाली नौआ नियम

¹³ इस तांइ असी भी परमेश्वर रा शुक्रिया लगातार करदे की जां असा रे जरिए परमेश्वर रे सुब बसेख रा वचन तुसा ने सूणेया, तां तुसा तिसजो मणूआं रा नी पर परमेश्वर रा वचन समजी करी अपणाया कि से हकीकत बिच तिन्हेरे हिन, ते ए ही सुब बसेख तुसा विश्वास करणे वालेयां लोक्कां री जिन्दगी बिच कम्म करदा।

1 थिस्सलुनीकियों 2:13 ပူးပေါင်းရင်းမြစ်များ

मत्ती 10:20

किजोकी बोलणे वाले तुसा नी हिन, पर तुसा रे परम-पिता री आत्‍मा ने तुसा रे अन्दर का बोलणा।

मत्ती 10:40

जे तुसा जो अपणाई लिंदा, से मेरे जो अपणाई लिंदा, अते जे मेरे जो अपणांदा से मेरे भेजणे वाले जो अपणाई लिंदा।

लूका 11:28

इस गल्ल पर यीशु ने बोल्लेया, हाँ, पर जादा धन्न से हिन जे जे परमेश्वर रे वचनां जो ध्यान कने सूणदे ते तिन्हा पर मनदे भी।

लूका 5:1

जां भीड़ परमेश्वर रा वचन सुनणे तांइ यीशु रे उप्पर पेया करदी थी, ते से गन्नेसरत रे समुन्द्र रे किनारे पर खड़ित्ते रे थिये, तां इय्यां होया कि

लूका 8:11

इस उदारण रा मतलब ए बीह् परमेश्वर रा वचन है।

लूका 8:21

यीशु ने बोल्लेया, मेरी मां अते भ्याल तां ए हिन जे परमेश्वर रे वचन जो सूणदे अते तिन्हा पर चलदे

यूहन्ना 15:3

मैं जे शिक्षा तुसा जो दित्ते री है तुसा तिस कने पवित्र होई गेरे हिन।

यूहन्ना 17:17

तुसा रा वचन सच्चा है, सच्चाई बिच तिन्हा जो पवित्र करो।

यूहन्ना 17:19

ते मैं अप्पु जो तिन्हेरी भलाई तांइ पवित्तर कुर्बानी बणी करी देई दिंदा।

प्रेरितां रे कम्म 10:33

तां मैं झट तेरे का मणू भेज्जी दित्ते, ते तुसा खरा कित्ता, जे आई गे, अवे असा सब परमेश्वर रे सामणे हिन, ताकि जे किच्‍छ परमेश्वर ने तुसा कने बोल्लेया तिसजो सूणन।

प्रेरितां रे कम्म 13:48

ए सुणी करी गैर यहूदियां रे मणू खुस होई गे, ते परमेश्वर रे वचन री बड़ाई करणा लग्गे, ते जित्तणे हमेसा री जिन्दगी तांइ ठहराये गेरे थिये, तिन्हा ने विश्वास कित्तेया

प्रेरितां रे कम्म 16:14

थुआतीरा बिच ही लीदिया नां री इक्क जनानी थी, से बैंगणी रांग रे कपड़े बेचदी थी, से परमेश्वर री भक्तणी थी से बड़े ध्यान कने असा री गल्लां सूणेया करदी थी, प्रभु ने तिसेरे मन रे दुआर खोली दित्ते थिये ताकि जे किच्‍छ पौलुस बोल्लेया करदा थिया, से तिन्हा गल्लां पर ध्यान देई सकण

प्रेरितां रे कम्म 17:11

ए मणू थिस्सलुनीके सहर रे मणूआं का जादा ठीक थिये इन्हा ने पूरा मन लगाई करी वचन सूणेया ते हर रोज पवित्रशास्त्र जो उलटदे पलटदे ए जांचदे रे कि पौलुस ने जे गल्लां दस्सी, कै से सच हिन।

प्रेरितां रे कम्म 17:32

मरे रेयां रे फिरी जिन्दा होई जाणे री गल्ल सुणी करी किन्ने ही मजाक उड़ाणा लग्गे, ते कित्तणेया ने बोल्लेया, ए गल्ल असा तुसा का फिरी कदी सुणगे

प्रेरितां रे कम्म 2:41

अते जिन्हा ने तिसेरा बसेख सूणेया ते विश्वास कित्ता, तिन्हा ने बपतिस्मा लित्ता ते तिसी दिन त्रै हजार लोक्कां रे लगभग तिन्हा विश्वासियां रे दल बिच मिली गे।

प्रेरितां रे कम्म 8:14

जां यरुशलेम बिच रैह्णे वाले प्रेरितां ने सूणेया कि सामरिया प्रदेश रे लोक्कां ने परमेश्वर रे वचन जो अपणाई लित्ते रा है, तां तिन्हा ने पतरस ते यूहन्ना जो तिन्हा का भेज्जेया।

रोमियों 10:17

सुब बसेख जो सुनणे कने विश्वास हुंदा, अते सुब बसेख मसीह रे बारे बिच है।

2 कुरुन्थियों 3:18

असी सारे प्रभु री महिमा जो अपणे उघाड़े रे चेहरे कने इक्क सीसा सांई प्रकाशित करदे। असा जो अपणे सांई बणाणे तांइ तिस चमकदार महिमा बिच जादा का जादा बदलेया करदे हिन। ते ए महिमा परमेश्वर रे पास्से का है, जे पवित्रात्मा रे रुप बिच असा का है।

गलातियों 4:14

हालांकि मेरी शरीरी कमजोरी तुसा तांइ परेसानी ही थी पर तुसा फिरी भी मेरे जो तुच्छ नी समजेया ते ना ही मेरे जो छड्डेया, पर तुसा ने मेरे जो इस तरिक्के कने अपणाया जिय्यां की परमेश्वर रे कुसकी स्वर्गदूत जो या फिरी अप्पु मसीह यीशु जो अपणाया हुंदा।

कुलुस्सियों 1:6

जे सुब बसेख तुसा जो सुणाया गेया थिया, से ही सुब बसेख अवे सारी दुनिया रे लोक्कां बिच सुणाया जांदा। ते जिय्यां इसने तुसा री जिन्दगी जो बदलेया थिया, जां तुसा ने पैल्ली वरी परमेश्वर रे बसेख जो सूणेया ते समजेया थिया कि तिस बिच किन्ना जादा अनुग्रह है, तिय्यां ही ए लोक्कां री जिन्दगी जो बदली करी जादा का जादा फल्ल लाया करदा है।

इब्रानियों 4:12

किजोकी परमेश्वर रा वचन जिन्दा, असरदार ते कुसकी भी दोधारी तलवार का जादा पैन्ना है, से आत्‍मा ते प्राण, ते जिस्म रे जोड़ां ते चर्बी रे आरपार छेदी रखदा, ते मन री इच्छा ते गल्लां जो परखदा।

इब्रानियों 4:2

जिय्यां असा ने यीशु मसीह रे बारे बिच सुब बसेख सूणेया, तिय्यां ही यहूदियां ने भी तिस अराम री जगाह् बिच जाणे रा सुब बसेख सूणेया, पर तिन्हा ने तिस पर विश्वास नी कित्तेया, इधेरे तांइ से सुब बसेख तिन्हा लोक्कां तांइ बेकार है।

याकूब 1:18

तिन्हा ने अपणी ही मर्जी कने असा जो सच्चाई रे वचन रे जरिए असा जो अपणी औलाद बणाया, ताकि असी तिन्हेरे बणाए री सृष्टि रे पैल्ले फल्ल सांई सृष्टि रे सबका खास हिस्सा बणन।

1 पतरस 1:23

तुसा जो अप्पु-मिते प्यार रखणा चाएदा किजोकी तुसा जो परमेश्वर का इक्क नौई जिन्दगी मिल्ले री है। तुसा जो ए जिन्दगी कुसकी इदेइ चीज रे जरिये नी मिल्ले री है जे इक्क दिन मुकी जाणी पर कुसकी इदेइ चीज रे जरिये मिल्ले री है जे हमेसा-हमेसा तिकर रैह्णी ते से परमेश्वर रा जिंदा ते हमेसा तिकर रैह्णे वाला वचन है।

1 पतरस 1:25

पर परमेश्वर रे वचन ने हमेसा-हमेसा तिकर बणी रैह्णा।” ए वचन मसीह यीशु रा सुब बसेख है जिसेरा प्रचार तुसा जो सुणाया गेया थिया।

1 पतरस 2:2

जिय्यां कि नौए जम्मे रे बच्चे अपणी मां रे दूद्द जो तोपदे, जे कि इक्कदम खरा हुंदा, तिय्यां ही तुसा जो भी परमेश्वर रे वचन जो सिखणी री चाह्‍त रखणा चाएदी ताकि तुसा आत्मिक तौर पर परिपक्व होई जाओ। तां फिरी आखिर बिच, परमेश्वर ने तुसा जो इस दुनिया री बुरी चीजां का बचाणा।

2 पतरस 3:2

मैं ए इधेरे तांइ करेया करदा है किजोकी मैं चाह्‍ंदा कि तुसा से गल्लां याद करो जे परमेश्वर रे भविष्यद्वक्ता ते असा जो छुटकारा दैणे वाले असा रे प्रभु मसीह यीशु ने लम्बे समय पैल्ले बोल्ली थी, जे तुसा जो प्रेरितां ने भी सिखाई थी जे तुसा का आए थिये।

1 यूहन्ना 3:3

हर कोई जे मसीह पर इदेयी आस रखदा, से अप्पु जो तिय्यां ही पवित्र रखदा, जिय्यां मसीह यीशु पवित्र है।