1 पतरस 5:5 - चम्बयाली नौआ नियम

⁵ तिय्यां ही, तुसा जवान मणू भी अपणे का बड्डे विश्वासियां रे कहे मुताबिक चलेया करो। तुसा जो निम्तेपन कने इक्क-दूए री सेवा करणा चाएदी, जिय्यां कि पवित्रशास्त्र बिच लिख्खे रा है, “परमेश्वर घमंडी मणूआं रे खिलाफ हिन, पर से निम्ते मणूआं कने ठीक हिन।”

1 पतरस 5:5 ပူးပေါင်းရင်းမြစ်များ

लूका 22:26

पर तुसा जो तां इय्यां बिल्कुल भी नी करणा चाएदा, तुसा बिच जे सबणी का बड्डा है तिसजो सबणी का निमता बणी करी रैह्णा चाएदा अते जे सबणी रा प्रधान है, तिसजो तां इक्क नौक्कर सांई बणी करी रैह्णा चाएदा

रोमियों 12:10

भाईचारे रे प्यार कने इक्क-दूज्जे कने लगाव रख्खो। अप्पु-मिते इक्क दूए री इज्जत दैणे बिच इक्क-दूज्जे का बदधे चलो।

रोमियों 13:14

बल्कि प्रभु यीशु मसीह जो इक्क कवच सांई पाई लेयो, ते अपणी पाप रे स्वभाव कने जिन्दगी मत जियो।

इफिसियों 5:21

मसीह यीशु रा आदरमान करणे तांइ इक्क-दूए रे अधीन रेया करो।

फिलिप्पियों 2:3

मतलबीपन या झूठ्ठी बड़ाई तिकर किच्‍छ मत करो, पर दीनता कने इक्क दुजे जो अप्पु का बदिया समझो।

कुलुस्सियों 3:12

किजोकी परमेश्वर तुसा जो प्यार करदे ते तिन्हा ने तुसा जो अपणे पवित्र मणू बणने तांइ चुणी लित्ते रा है, इधेरे तांइ तुसा बड़ी करुणा, निमतापन, भलाई, कने सहनशीलता ते दया रा स्वभाव धारण करी लेयो।

1 तीमुथियुस 5:1

कुसकी बुजुर्ग मणू जो बकी करी मती समझांदा, पर तिसजो अपणे प्यो जदेया मन्नी करी समजाए, ते जुआन मुंडेया जो अपणा भ्याल जदेया मन्नी करी समजाए।

इब्रानियों 13:17

अपणे अगुवे री गल्लां मन्नो, ते तिन्हेरे अधीन रेयो। से हमेसा तुसा तांइ चुकन्ने रैहन्दे, ताकि तुसा भटकी ना जाण। किजोकी तिन्हा जो अपणी सेवकाई रा हिसाब परमेश्वर जो दैणा जरुरी है। इय्यां ही करो, ताकि से अपणे कम्मां बिच र खुस ही होण, ना की दुखी होण, नी ता तुसा जो कोई फायदा नी होणा।

याकूब 4:6

से तां होर भी जादा दया करदे ताकि असी बुरी इच्छा रा विरोध करी सकण, इसी वजह कने पवित्रशास्त्र बिच ए लिख्खे रा है, “परमेश्वर घमंडिया रा विरोध करदे पर निमते मणूआं पर अनुग्रह करदे।”

1 पतरस 3:8

आखिरकार मैं तुसा सारेयां जो ए बोलणा चाह्‍ंदा कि तुसा सारे जणे इक्क-मन होई करी रेयो। इक्क दूए कने हमदर्दी रख्खो। इक्क-दूए जो अपणे परिवार रे मणूआं सांई प्यार करो, इक्क-दूए तांइ दयालू बणो ते सारेयां कने नरम बणो।

1 पतरस 4:1

इधेरे तांइ जिय्यां मसीह ने भी जुल्म सहन कित्ते जां तिकर से अपणे सरीर बिच रे, तिय्यां ही तुसा भी तिस्सी व्यवहार कने जुल्म सैह्ण करणे तांइ तैयार रेयो जदेया मसीह रा थिया। किजोकी जे अगर तुसा मसीह तांइ जुल्म सैह्‍ण करणे रा फैसला करी लित्ते रा है, तां इधेरा मतलब है कि तुसा पाप ना करणे रा फैसला कित्ते रा है।

1 पतरस 4:5

पर इक्क दिन परमेश्वर ने तिन्हा सारेयां का हिसाब-किताब लैणे तांइ तिन्हा जो अपणे मुहाग्गर खड़ा करणा, ते परमेश्वर ने तिन्हा सारे मणूआं का तिन्हा कम्मां रे बारे बिच पूच्छणा जे तिन्हा ने इस धरती पर रैह्‍न्दे बेल्ले कित्ते। परमेश्वर ने कै जिन्दा ते कै मुर्दा, हर इक्क जणे का हिसाब-किताब लैणा।