1 पतरस 4:2 - चम्बयाली नौआ नियम

² इसेरे अंजाम रे तौर पर तिस मणू ने इस दुनिया बिच अपणी बाकि री जिन्दगी अपणे सरीर री बुरी इच्छा जो पूरा करदे होए नी बिताणी, पर तिसने से ही कम्म करणा जे परमेश्वर तिसका करवाणा चाह्‍ंदे।

1 पतरस 4:2 ပူးပေါင်းရင်းမြစ်များ

मत्ती 12:50

किजोकी जे कोई मेरे परम-पिता री जे स्वर्ग बिच हिन मर्जी पूरी करदा, सेह्ई मेरा भाई, भैण अते मेरी मां है।

मत्ती 20:4

ते उन्हा जो बोल्लेया, तुसा भी अंगूर रे बगीच्चे बिच जाओ, ते जिन्नी धियाड़ी बणगी, तुसा जो दिंगा अते से भी गे।

मत्ती 21:31

इन्हा दोन्नां बिच का कुसने पिता री मर्जी पूरी कित्ती? तिन्हा ने बोल्लेया, पैल्ले मुंडे ने, यीशु ने बोल्लेया, मैं तुसा कने सच बोलदा की महसुल लैणे वाले ते वेश्या तुसा का पैल्ले स्वर्ग रे राज बिच पुजदे।

मत्ती 7:21

“प्रभु-प्रभु बोलणे वाला हर मणू स्वर्ग रे राज अन्दर नी जाई पाणा बल्कि से जे मेरे स्वर्ग अन्दर रैह्णे वाले परम-पिता री मरजी पर चलदा तिन्ने अन्दर जाई पाणा।”

मरकुस 3:35

किजोकी जे कोई परमेश्वर री इच्छा पर चलदे सेह्ई मेरा भाई, ते भैण ते माता है।”

मरकुस 7:21

किजोकी मणू रे मन का, बुरी-बुरी गल्लां, व्यभिचार, चोरी, खून करणा,

यूहन्ना 1:13

से मणू ना तां अपणे मां-प्यो री मर्जी कने, ना सरीर री इच्छा कने ते ना ही लोक्कां री बच्चे पैदा करणे री इच्छा री वजह कने पैदा होए रे हिन पर से परमेश्वर री इच्छा कने पैदा होए रे हिन।

यूहन्ना 7:17

जे कोई मणू परमेश्वर री इच्छा पर चलणा चाए तिसने ए समजी जाणा कि मेरी शिक्षा परमेश्वर रे पास्से का है या मैं अपणी मर्जी कने बोलदा।

रोमियों 12:2

इस दुनिया रे लोक्कां सांई मत बणो, पर तुसा रे मन रे बदली जाणे री वजह कने तुसा रा चाल-चलन भी बदलदा रे, जिस कने तुसा परमेश्वर री भली, ते ठीक लगणे वाली, ते सिद्ध इच्छा जो तजुरबे कने जाणदे रेयो।

रोमियों 14:7

असी सारे परमेश्वर रे हिन। इधेरे तांइ असा जो अपणे जीणे-मरणे बिच अप्पु जो नी, पर परमेश्वर जो खुस करणा चाएदा।

रोमियों 6:11

इय्यां ही तुसा जो अप्पु जो पाप रे काबू तांइ ता मरे रा ते मसीह यीशु रे जरिये परमेश्वर री महिमा तांइ जिन्दा समझणा चाएदा।

रोमियों 6:2

नी! बिल्कुल भी नी, असी जे पाप तांइ मरी गेरे हिन तां फिरी अग्गे जो पाप बिच जिन्दगी नी बिताई सकदे।

रोमियों 7:4

तां ओ मेरे संगी विश्वासियों, जां तुसा मसीह यीशु कने मरी गे, तां तुसा कानूनां रे काबू का अजाद होई गे। अवे तुसा मसीह यीशु रे होई गेरे हिन जे मुर्देयां बिच का जिन्दे होई गेरे हिन ताकि तुसा तिन्हा कने परमेश्वर तांइ धार्मिक जिन्दगी जी सको।

2 कुरुन्थियों 5:15

ते मसीह इधेरे तांइ सारेयां तांइ मरेया कि जे मणू जिन्दे हिन, से अग्गे जो अपणे तांइ ना जिन्दगी ना जीण पर तिन्हेरे तांइ जीण जे तिन्हेरे तांइ मरेया ते फिरी मरे रे लोक्कां बिच का जिन्दा होई गेया।

इफिसियों 2:3

असी भी तिन्हा लोक्कां सांई जिन्दगी जिंदे थिये जे अपणे सरीर री बुरी इच्छां जो पूरा करेया करदे ते बाकि मणू कुदरती तौर पर बुरे मणू थिये ते परमेश्वर रे गुस्से रे हिस्सेदार थिये।

इफिसियों 4:17

इधेरे तांइ मैं परमेश्वर का मिल्ले रे अधिकार कने ए बोलदा कि जिय्यां परमेश्वर बिच विश्वास ना करणे वाले मणू बेकार गल्लां बिच जिन्दगी जिन्दे, तुसा अज्ज का बाद तिय्यां मत जिन्दे।

इफिसियों 5:17

इस तांइ बेफकुफ मत बणो, पर ध्यान कने समझो की परमेश्वर री मर्जी कै है?

इफिसियों 6:6

ते मणूआं जो खुस करणे वालेयां सांई दिखावे री सेवा मत करो, पर मसीह यीशु रे दास सांई मन लाई करी परमेश्वर री मर्जी पर चलो,

कुलुस्सियों 1:9

इधेरे तांइ जां रा असी तुसा रे बारे बिच सुणे रा है, तां का ही असी तुसा तांइ प्रार्थना करदे रैहन्दे। असी परमेश्वर का हमेसा प्रार्थना करदे कि से तुसा जो पूरी समझ ते आत्मिक बुद्वी ते समजदारी दैण ताकि तुसा तिन्हेरी इच्छा जो समजी सको।

कुलुस्सियों 3:3

किजोकी तुसा तां अपणे पाप रे स्वभाव बिच मरी चुके रे हिन, अवे तुसा री जिन्दगी मसीह यीशु कने परमेश्वर बिच लुके री है।

कुलुस्सियों 4:12

इपफ्रास भी जे तुसा रे ही सहर का है। ते से मसीह यीशु रा दास है, तुसा जो प्रणाम बोल्लेया करदा है। से बड़ी लगन कने तुसा तांइ प्रार्थना करदा रैहन्दा ताकि तुसा मसीह यीशु बिच विश्वास करणे बिच मजबूत होई करी, सिद्व होई करी ते पक्के तौर पर पूरे विश्वास कने परमेश्वर री मर्जी जो पूरा करो।

1 थिस्सलुनीकियों 5:18

हर हालात बिच परमेश्वर रा शुकर करो किजोकी तुसा तांइ मसीह यीशु बिच परमेश्वर री ए ही मर्जी है।

इब्रानियों 13:21

ते परमेश्वर प्रभु यीशु मसीह री ताकत कने तुसा बिच से हर इक्क ठीक चीज पैदा करे, जिस कने से खुस हुंदे, जिस कने तिन्हेरी महिमा हमेसा-हमेसा तिकर हुंदी रेयो। आमीन।

याकूब 1:18

तिन्हा ने अपणी ही मर्जी कने असा जो सच्चाई रे वचन रे जरिए असा जो अपणी औलाद बणाया, ताकि असी तिन्हेरे बणाए री सृष्टि रे पैल्ले फल्ल सांई सृष्टि रे सबका खास हिस्सा बणन।

1 पतरस 1:14

परमेश्वर रे हुकमां जो इस तरिक्के कने मन्नेया करो जिय्यां अच्छे बच्चे अपणे प्यो रे हुकमां जो मनदे। तिन्हा बुराई रे कम्मां जो करणे री चाह्‍त मत रख्खो जे तुसा तिस बेल्ले करणा चाह्‍ंदे थिये जां तुसा परमेश्वर जो नी जाणदे थिये।

1 पतरस 2:1

इधेरे तांइ हर तरिक्के री नफरत, धोख्खेबाजी, ढोंग, हिर्स ते लोक्कां री बदनामी करणा छड्डी देयो।

1 यूहन्ना 2:17

दुनिया ते तिसेरी चीजां री लालसा दोन्नों मिटणे वाली हिन, पर जे परमेश्वर री इच्छा रे हिसाब कने जिन्दगी जिन्दे, तिन्हा ने हमेसा तिकर बणी रैह्णा।