1 पतरस 3:15 - चम्बयाली नौआ नियम

¹⁵ पर मसीह तांइ अपणे मन बिच आदरमान रख्खो, ते प्रभु रे तौर पर तिन्हेरी इज्जत करो। जे अगर कोई मणू तुसा का तिस आस रे बारे बिच किच्‍छ पुच्छे जे असा सारे जणेया बिच है, तां तिसजो नरमी ते इज्जत कने जवाब दैणे तांइ हमेसा तैयार रेयो।

1 पतरस 3:15 ပူးပေါင်းရင်းမြစ်များ

प्रेरितां रे कम्म 21:39

पौलुस ने बोल्लेया, मैं तां तरसुस रा यहूदी मणू है! किलिकिया रे मस्हूर सहर रा रैह्णे वाला मैं तेरे छन्दे करदा कि तू मेरे जो मणूआं कने गल्लां करणा दे

प्रेरितां रे कम्म 24:25

जां पौलुस ने परमेश्वर री धार्मिकता, ते सबर, ते लोक्कां रा हिसाब-किताब करणे रे बारे बिच बोल्लेया करदा थिया, तां फेलिक्स ने डरी करी जवाब दित्तेया, अब्बे ता चली जा, मौक्का दिख्खी करी मैं तिज्जो फिरी सद्दी लिन्गा।

कुलुस्सियों 1:23

मसीह बिच तुसा रा विश्वास, नीं बणे रे मजबूत घर सांई होणा चाएदा। मसीह रे सुब बसेख जो सुणी करी जे आस तुसा जो मिल्ली थी, तिसजो मत छड्डो, ते जिस सुब बसेख रा प्रचार दुनिया रे सारे लोक्कां बिच कित्ता गे रा है। ते मैं पौलुस जिस सुब बसेख रा दास बणेया।

कुलुस्सियों 1:27

किजोकी परमेश्वर ने चाएया कि तिन्हेरे मणू जाणे कि मसीह री शोहरत ते महिमा गैर यहूदियां तांइ भी है, ते से राज़ मसीह है, जे तुसा बिच वास करदे जे असा री परमेश्वर री महिमा बिच हिस्सेदार बणने री आस है।

कुलुस्सियों 1:5

तुसा ए सब इधेरे तांइ करदे किजोकी तुसा रा विश्वास ते आस, तिन्हा चीजां पर आधारित है जे परमेश्वर ने तुसा तांइ स्वर्ग बिच संभाली करी रख्खे री है। तुसा जो तिसेरी उम्मीद तिस बेल्ले का थी जां तुसा पैल्ली वरी मसीह यीशु रा सुब बसेख सूणेया थिया, जे परमेश्वर रा सच्चा बसेख है।

कुलुस्सियों 4:6

तुसा री गल्ल-बात सोह्णि ते आकर्षित हो, ताकि तुसा मसीह बिच अपणे विश्वास रे बारे बिच हर मणू जो जवाब देई सको।

तीतुस 1:2

इसेरे अंजाम रे तौर पर से मणू परमेश्वर कने जीणे री आस बिच रैहन्दे किजोकी परमेश्वर जे कदी झूठ नी बोलदे तिन्हा ने दुनिया बणाणे का पैल्ले ही इस गल्ल रा वादा करी दित्तेया थिया कि तिन्हेरे मणूआं ने हमेसा-हमेसा तांइ जीणा।

इब्रानियों 3:6

पर मसीह यीशु, परमेश्वर रे पुत्र होणे रे तौर पर, तिन्हेरे पूरे टब्बर बिच विश्वासयोग्य हिन, जे अगर असी हिम्मत ते आस कने विश्वास बिच बणी रैह्ण तां असी ही तिन्हेरा टब्बर हिन।

इब्रानियों 6:1

आओ असी मसीही बसेख रे पैल्ली शिक्षां जो छड्डी करी परिपक्व शिक्षां पास्से बधी चलन। असा जो तिन्हा फालतू रे कम्मां का घड़ी-घड़ी तौबा करी के परमेश्वर बिच विश्वास करणे री जरुरत नी है।

1 पतरस 1:17

परमेश्वर जाणदे कि हर इक्क मणू ने क्‍या-क्‍या कित्ते रा है, ते से हर इक्क मणू का बगैर कोई पक्षपात कित्ते हिसाब-किताब लिंदे। जां तुसा परमेश्वर का प्रार्थना करदे तां तुसा तिन्हा जो पिता बोल्ली करी पुकारदे। इधेरे तांइ जां तिकर तुसा इस धरती पर इक्क अजनबी सांई रैह्‍न्दे तुसा हमेसा तिन्हेरा आदरमान करो।

1 पतरस 3:4

निम्ते ते चुप्प रेई करी अपणे दिल का खूबसुरत बणो। इदेइ खूबसुरती हमेसा तांइ रेह्न्दी ते परमेश्वर री नजर बिच ए कीमती है।