1 पतरस 2:24 - चम्बयाली नौआ नियम

²⁴ जां मसीह मरे, तां तिन्हा जो असा रे पाप्पां री सजा तांइ सुली पर चढाया गेया थिया। तिन्हा ने ए इधेरे तांइ कित्तेया थिया ताकि असी पाप करणा छड्डी दैण ते धार्मिकता कने जीणा सुरु करी दैण। जिन्हा जख्मां जो तिन्हा ने सहन कित्तेया, तिन्हेरी वजह कने असी ठीक होए।

1 पतरस 2:24 ပူးပေါင်းရင်းမြစ်များ

मत्ती 27:26

इस पर तिसने बरअब्बा जो तिन्हेरे तांइ छड्डी दित्तेया, ते यीशु जो कोड़े लगवाई करी तिन्हेरे जो देई दित्ता की सुली पर चढ़ाया जाए।

मत्ती 5:20

किजोकी मैं तुसा जो बोलदा, जां तांइ तुसा री धार्मिकता, शास्त्रियां अते फरीसी लोक्कां री धार्मिकता का बधी करी ना हो, तां तांइ तुसा स्वर्ग रे राज अन्दर नी जाई सकदे।”

मत्ती 8:17

ताकि जे वचन यशायाह भविष्यद्वक्ता रे जरिए बोल्लेया गेया थिया से पूरा हो: तिसने अप्पु ही असा री कमजोरियां जो लेई लित्तेया अते असा री बमारियाँ जो चुक्की लित्तेया।

मरकुस 15:15

तां पिलातुस ने मणूआं री भीड़ जो खुस करणे तांइ बरअब्बा जो तिन्हा तांइ छड्डी दित्तेया, ते यीशु जो कोड़े लगवाई करी सुली पर चढ़ाणे तांइ भेज्जी दित्तेया।

लूका 4:18

“प्रभु रा आत्‍मा मेरे अन्दर है, किजोकी तिन्हा ने मेरा अभिषेक कित्ते रा है कि मैं गरीब मणूआं जो परमेश्वर रे राज रे सुब बसेख जो सूणां, ते परमेश्वर ने मेरे जो गुलाम मणूआं जो ए बोलणे तांइ भेज्जेया कि से अजाद हिन, ते अन्नेयां जो रौसनी दैणे तांइ भेज्जे रा है, अते दुख-तकलिफां अन्दर फसे रे लोक्कां जो छुटकारा दैणे,

यूहन्ना 1:29

दूए दिन तिसने यीशु जो अपणे पास्से आंदे दिख्खी करी बोल्लेया, “दिख्खो! ए परमेश्वर रा मेमना है, जे दुनिया रे पाप्पां जो मिटाणे तांइ आए रा है।”

यूहन्ना 19:1

“तां पिलातुस ने यीशु जो पकड़वाई करी कोड़े मारणे रा हुकम दित्ता।

प्रेरितां रे कम्म 10:35

पर परमेश्वर हर जाति जे रा डर मनदे ते भले कम्म करदे, तिन्हा जो से अपणाई लिंदे।

प्रेरितां रे कम्म 10:39

अते असा उन्हा सबणी कम्मां रे गवाह हिन, जे तिन्हा ने यहूदियां प्रदेश ते यरुशलेम सहर बिच भी कित्ते थिये, ते यहूदी अधिकारियां ने यीशु जो सुली पर टंगी करी मारी छड्डेया।

प्रेरितां रे कम्म 13:29

तिन्हा ने यीशु जो सुली पर चढ़ाई करी मारी दित्तेया ते इसी तरिक्के कने शास्त्र बिच मसीह बारे लिख्खे री हर गल्ल जो पूरा करी दित्ता। ते जां से सब किच्‍छ पूरा करी बैठ्ठे तां तिन्हा जो सुली का उतारी करी इक्क कब्र बिच रख्खी दित्तेया।

प्रेरितां रे कम्म 5:30

असा रे बाबे-दादेयां रे परमेश्वर ने यीशु जो जिन्दा कित्तेया, जिस जो तुसा ने सुली पर लटकाई करी मारी रख्खेया थिया।

रोमियों 6:11

इय्यां ही तुसा जो अप्पु जो पाप रे काबू तांइ ता मरे रा ते मसीह यीशु रे जरिये परमेश्वर री महिमा तांइ जिन्दा समझणा चाएदा।

रोमियों 6:13

अते अपणे जिस्म रे कुसकी भी अंग जो बुरे कम्मां री सेवा करणे तांइ हवाले मत करो, बल्कि, अप्पु जो पूरे तरिक्के कने परमेश्वर रे हवाले करी देयो। किजोकी तुसा मरी गे थिये, पर अवे तुसा का नौई जिन्दगी है। इधेरे तांइ अपणे पूरे जिस्म जो इक्क औजार रे तौर पर परमेश्वर री महिमा तांइ इस्तेमाल करो।

रोमियों 6:16

तुसा जाणदे कि जां तुसा अप्पु जो कुसकी रा गुलाम बणने तांइ सौंप्पि दिंदे, तां से मणू तुसा रा मालिक बणी जांदा। जे अगर तुसा चाओ ता पाप रे गुलाम बणी सकदे जे मौत दिंदा, या तुसा अप्पु जो परमेश्वर रे हुकम मनणे तांइ सौंप्पि सकदे जे तुसा जो धार्मिक ठैहरांदे।

रोमियों 6:2

नी! बिल्कुल भी नी, असी जे पाप तांइ मरी गेरे हिन तां फिरी अग्गे जो पाप बिच जिन्दगी नी बिताई सकदे।

रोमियों 6:22

पर अवे तुसा पाप रे काबू का अजाद होई गेरे हिन ते परमेश्वर रे गुलाम बणी गेरे हिन। तुसा अवे पवित्र कम्म करदे जिस कने तुसा जो हमेसा री जिन्दगी मिलदी।

रोमियों 6:7

जां असी मसीह यीशु कने मरी गे, तां असी पाप रे काबू का अजाद करी दित्ते गे थिये।

रोमियों 7:6

पर अवे असी कानूनां रे काबू बिच नी हिन जिस ने असा जो कैदियां सांई रख्खे रा थिया, किजोकी असी तिस तांइ मरी गेरे हिन। अवे असी परमेश्वर री सेवा कानूनां जो मनणे रे पुराणे तरिक्के कने नी, पर पवित्रात्मा बिच जीणे कने करी सकदे।

1 कुरुन्थियों 15:3

इसी वजह कने मैं सबका पैल्ले तुसा जो से ही गल्ल दस्सी दित्ती, जे मेरे जो मसीह ने दस्सी थी कि पवित्रशास्त्र रे वचन रे हिसाब कने यीशु मसीह असा रे पाप्पां तांइ मरे,

2 कुरुन्थियों 6:17

इस तांइ परमेश्वर पवित्रशास्त्र बिच असा जो बोलदे, “अविश्वासी लोक्कां रे बिच का निकलो ते बखरे रेयो ते भिठ्ठी चीजां री अराधना मत करो, तां मैं तुसा जो अपनाणा।

गलातियों 3:13

मसीह यीशु ने असा जो मूसा रे कानून रे श्राप का छुटकारा दैणे तांइ तिस श्राप जो अपणे उप्पर लेई करी सुली पर अपणी जान देई दित्ती, किजोकी पवित्रशास्त्र बिच लिख्खे रा है, “शापित है से मणू जे सुली पर मरदा।”

इफिसियों 5:9

किजोकी रौसनी बिच जीणे वाले मणूआं रा स्वभाव हर तरिक्के कने भला, ते धार्मिकता ते भरोसेमंद है।

फिलिप्पियों 1:11

तुसा री जिन्दगी मसीह यीशु रे जरिए परमेश्वर री धार्मिकता रे कम्मां कने भरदी जाए जिस कने परमेश्वर री बड़ाई ते तारीफ हुंदी रे।

कुलुस्सियों 2:14

तिन्हा ने असा रे पाप्पां रे लेखे-जोखे जो रद्द करी दित्ता, ते तिसजो सुली पर मेखां कने जड़ी करी दुर करी दित्ता।

कुलुस्सियों 2:20

किजोकी तुसा रा पापी स्वभाव मसीह यीशु कने मारी दित्तेया गे रा है, इधेरे तांइ अवे तुसा जो दुनियावी रीति-रीवाज्जां जो मनणे री जरुरत नी है, फिरी भी तुसा तिन्हा गल्लां जो इय्यां मनदे कि जिय्यां कि से हल्ले भी तुसा जो काबू बिच रखदे,

कुलुस्सियों 3:3

किजोकी तुसा तां अपणे पाप रे स्वभाव बिच मरी चुके रे हिन, अवे तुसा री जिन्दगी मसीह यीशु कने परमेश्वर बिच लुके री है।

इब्रानियों 10:10

किजोकी परमेश्वर री मर्जी रे हिसाब कने असा जो मसीह यीशु री इक्क ही कुर्बानी रे जरिये पवित्र बणाया जाणा थिया।

इब्रानियों 10:5

इधेरे तांइ जां मसीह यीशु दुनिया बिच आए, तां तिन्हा ने बोल्लेया, “भेंट ते कुर्बानियां तुसा ने नी चाही, पर तुसा ने मेरे जो तुसा री सेवा करणे तांइ सरीर दित्ते रा है।”

इब्रानियों 12:13

इत्ते-उत्ते दिखणे रे बजाए, सीद्दे रस्ते पर चलदे रेयो जे यीशु का पुजदा, ताकि जे मणू असा बिच आत्मिक तौर पर कमजोर हिन, से भटकी ना जाण, पर तिन्हेरा विश्वास मजबूत बणी जाणा चाएदा।

इब्रानियों 7:26

इदेया ही प्रधान पुरोत्त असा री जरुरतां जो पूरा करी सकदा, जे पवित्र, बेगुनाह, सुच्चा, पाप करणे वालेयां सांई ना हो ते जिस जो आसमान का भी उच्चा चुक्केया गे रा हो।

इब्रानियों 9:28

तिय्यां ही मसीह भी मते जणेया रे पाप्पां री माफी तांइ इक्क वरी कुर्बानी होए। तिन्हा ने इक्क वरी फिरी हटी करी आणा, पर असा रे पाप्पां तांइ नी, पर तिन्हा लोक्कां जो बचाए जाणे तांइ जे बड़ी लगन कने तिन्हेरा इंतजार करेया करदे हिन।

याकूब 5:16

इधेरे तांइ तुसा अप्पु बिच इक्क-दूए रे सामणे अपणे-अपणे पाप्पां जो मन्नी लेयो, ते इक्क-दूए तांइ प्रार्थना करो, जिस कने तुसा अपणी बिमारियां का ठीक होई जाओ। धार्मिक मणू री प्रार्थना रे असर कने सब कुछ होई सकदा।

1 यूहन्ना 2:29

तुसा जाणदे कि मसीह यीशु धार्मिक हिन ते जे कोई धार्मिकता रा कम्म करदा से परमेश्वर रे बच्चे हिन।

1 यूहन्ना 3:7

ओ प्यारे बच्चो, तुसा जो कोई धोखा ना देयो, जे कोई नेक कम्म करदा, से मसीह यीशु सांई धार्मिक है।

प्रकाशित वाक्य 22:2

नदी सहर रे बिचो-बिच बैहंदी थी, ते तिस नदी रे दोन्नों किनारे पास्से बूट्टे लग्गे रे थिये जे जिन्दगी दिंदे थिये। तदेय बूट्टेयां पर बारा किस्मां रे फल्ल लगदे थिये, ते हर महिन्ने तिन्हा बूट्टेयां पर नौए किस्म रे फल्ल लगदे थिये, ते तिन्हा बूट्टेयां रे पत्ते दवाई सांई थिये जे देस-देस रे रैह्णे वाले मणूआं री बीमारी जो ठीक करी सकदे।