1 यूहन्ना 5:18 - चम्बयाली नौआ नियम

¹⁸ असा जो पता है कि जे कोई परमेश्वर री औलाद है, से पाप करणा छड्डी दिंदा किजोकी परमेश्वर रा पुत्तर मसीह यीशु तिन्हा लोक्कां जो बचाई रखदा: ते शैतान तिन्हा लोक्कां जो छुई नी सकदा।

1 यूहन्ना 5:18 ပူးပေါင်းရင်းမြစ်များ

मत्ती 5:37

पर जे तू हाँ चाह्‍ंदा तां हाँ बोल अते नां चाह्‍ंदा तां सिर्फ नां बोल, किजोकी जे किच्‍छ भी इसका जादा हुन्दा से शैतान रे पास्से का हुन्दा।”

मत्ती 6:13

अते असा जो परखदे मत, पर शैतान का बचाई रख्खेयो, (किजोकी राज, पराक्रम ते महिमा हमेसा तुसा रा ही है, आमीन)!

यूहन्ना 1:13

से मणू ना तां अपणे मां-प्यो री मर्जी कने, ना सरीर री इच्छा कने ते ना ही लोक्कां री बच्चे पैदा करणे री इच्छा री वजह कने पैदा होए रे हिन पर से परमेश्वर री इच्छा कने पैदा होए रे हिन।

यूहन्ना 14:30

मैं अवे तुसा कने जादा गल्लां नी करणी, किजोकी इस दुनिया रा सरदार जे शैतान है, आया करदा है, मेरे पर तिसेरा कोई हक्क नी है,

यूहन्ना 15:4

तुसा मेरे बिच बणी रेयो ते मैं तुसा रे बिच बणी रैहन्गा, जिय्यां से डाली जे अंगूर री बेल कने जुड़ी ना रे तां अप्पु से फली नी सकदी, तिय्यां ही तुसा भी जे मेरे कने जुड़ी नी रैहन्गे तां नी फली सकदे।

यूहन्ना 15:7

जे तुसा मेरे बिच बणी रैहन्गे, अते मेरी सिखाए री शिक्षा तुसा रे बिच बणी रैहन्गी, तां तुसा किच्‍छ भी मंगो, मेरे पिता ने तुसा री हर जरुरत जो पूरा करणा।

यूहन्ना 15:9

जदेया मेरे पिता ने मेरे कने प्यार कित्तेया, मैं भी तिय्यां ही तुसा रे कने प्यार कित्तेया मेरे प्यार बिच बणी रेयो

प्रेरितां रे कम्म 11:23

से तित्ते पूज्जी करी परमेश्वर रे अनुग्रह जो दिख्खी करी बड़ा खुस होया ते सब जो शिक्षा दित्ती की तन मन लगाई करी प्रभु यीशु कने लिपटी रेयो,

याकूब 1:18

तिन्हा ने अपणी ही मर्जी कने असा जो सच्चाई रे वचन रे जरिए असा जो अपणी औलाद बणाया, ताकि असी तिन्हेरे बणाए री सृष्टि रे पैल्ले फल्ल सांई सृष्टि रे सबका खास हिस्सा बणन।

याकूब 1:27

असा रे परमेश्वर पिता री नजर बिच सच्ची ते सुच्ची भक्ति ए है कि अनाथ ते विधवा रे दुख बिच तिन्हेरा ख्याल रखणा, ते अप्पु दुनिया रे बुरे कम्मां का दुर रैह्ण जे तुसा जो बिगाड़दे।

1 पतरस 1:23

तुसा जो अप्पु-मिते प्यार रखणा चाएदा किजोकी तुसा जो परमेश्वर का इक्क नौई जिन्दगी मिल्ले री है। तुसा जो ए जिन्दगी कुसकी इदेइ चीज रे जरिये नी मिल्ले री है जे इक्क दिन मुकी जाणी पर कुसकी इदेइ चीज रे जरिये मिल्ले री है जे हमेसा-हमेसा तिकर रैह्णी ते से परमेश्वर रा जिंदा ते हमेसा तिकर रैह्णे वाला वचन है।

1 यूहन्ना 2:29

तुसा जाणदे कि मसीह यीशु धार्मिक हिन ते जे कोई धार्मिकता रा कम्म करदा से परमेश्वर रे बच्चे हिन।

1 यूहन्ना 3:12

असा जो आदम रे पुत्तर कैन सांई नी बणना जे उस शैतान रे पास्से का थिया, ते जिनिए अपणे भ्याल जो मारी रख्खेया, तिसने अपणे भ्याल जो भला किजो मारेया? तिसने इधेरे तांइ इदेया कित्तेया कि तिसेरे कम्म बुरे थिये अते तिसेरे भ्याल रे कम्म धार्मिक थिये।

1 यूहन्ना 3:3

हर कोई जे मसीह पर इदेयी आस रखदा, से अप्पु जो तिय्यां ही पवित्र रखदा, जिय्यां मसीह यीशु पवित्र है।

1 यूहन्ना 3:9

जे कोई परमेश्वर री औलाद हिन, से पाप करणा छड्डी दिंदा किजोकी परमेश्वर रा स्वभाव तिस मणू बिच बणी रैहन्दा, इधेरे तांइ से पाप नी करी सकदा, किजोकी से परमेश्वर रा पुत्तर है।

1 यूहन्ना 4:6

असी परमेश्वर रे मणू हिन ते जे परमेश्वर जो जाणदा, से असा री सूणदा, जे परमेश्वर जो नी जाणदा, से असा री नी सूणदा। इय्यां ही असी सच री आत्‍मा ते भटकाणे वाली आत्‍मा बिच फरक पैछाणदे।

1 यूहन्ना 5:1

जे मणू ए विश्वास करदा कि यीशु ही मसीह हिन, से मणू परमेश्वर री औलाद ठैहरदा ते जे कोई अपणे पिता परमेश्वर कने प्यार रखदा से तिन्हेरी औलाद्दां कने भी प्यार रखदा।

1 यूहन्ना 5:15

जां असी जाणदे कि, जे किच्‍छ असी परमेश्वर का मंगदे तां से असा री सूणदा, तां ए भी जाणदे कि जे किच्‍छ भी असा तिसका मंगेया, से असा जो मिल्लेया भी।

1 यूहन्ना 5:19

असा जो पता है कि असी परमेश्वर कने हिन ते सारी दुनिया तिस शैतान रे वस अन्दर पेरी है।

1 यूहन्ना 5:20

ते ए भी जाणदे कि परमेश्वर रा पुत्तर मसीह यीशु आई गे रा है ते तिनिये असा जो समझ दित्ते री है कि, असी तिस सच्चे परमेश्वर कने गहरे रिश्ते बिच हिन किजोकी असी मसीह यीशु कने गहरे रिश्ते हिन जे सच है, सच्चा परमेश्वर ते हमेसा री जिन्दगी ए ही है।

1 यूहन्ना 5:21

ओ बच्चेयों, अप्पु जो हर तिस चीज का दुर रख्खो जे तुसा रे दिल बिच परमेश्वर री जगाह् लेई सकदी।

1 यूहन्ना 5:4

किजोकी जे कोई परमेश्वर री औलाद है, तिसने दुनिया पर जीत हासिल कित्ती ते असी से जीत अपणे विश्वास रे जरिए हासिल करदे।

यहूदा 1:21

जिय्यां कि तुसा इस गल्ल रा इंतजार करेया करदे हिन कि मसीह यीशु ने अपणे दया कने तुसा जो हमेसा री जिन्दगी दैणी इधेरे तांइ तुसा जो अपणी जिन्दगी ए जाणदे होए गुजारणा चाएदी कि परमेश्वर तुसा कने प्यार करदे।

यहूदा 1:24

से ही इकलौत्ते परमेश्वर हिन जिन्हा ने असा जो मसीह यीशु रे सुली पर कुर्बानी दैणे रे जरिये कने बचाए रा है। असा रे प्रभु मसीह यीशु री वजह कने मणू परमेश्वर रा आदरमान ते महिमा करण। मणू ए समजी सकण कि दुनिया रे बणने रे पैल्ले का ही ते अज्ज रे समय तिकर परमेश्वर री ही ताकत ते हक है ते से हमेसा-हमेसा तिकर रैह्णी। आमीन!

प्रकाशित वाक्य 2:13

मैं जाणदा कि तुसा रा कस्बा शैतान रे वस बिच है, पर इय्यां हुंदे होए भी तुसा ने मेरे बिच अपणा विश्वास मजबूती कने बणाई रख्खेया ते मेरे पर विश्वास करणा नी छड्डेया, तिस बेल्ले भी नी जां लम्बे समय पैल्ले अन्तिपास जो मारी दित्तेया गेया थिया। से मेरा बसेख सुनाणे बिच भरोस्सेमंद थिया, इधेरे तांइ तिसजो तुसा रे कस्बे बिच मारी रख्खेया गेया जित्ते शैतान रा काबू है।