1 यूहन्ना 3:20 - चम्बयाली नौआ नियम

²⁰ भले ही असा रा मन असा जो दोषी ठेहरांदा तां भी असी परमेश्वर का हिम्मत कने प्रार्थना करी सकदे किजोकी परमेश्वर असा री सोच का बड्डे हिन ते से सब किच्‍छ जाणदे।

1 यूहन्ना 3:20 ပူးပေါင်းရင်းမြစ်များ

यूहन्ना 21:17

तिन्हा ने तिज्जी वरी तिसजो बोल्लेया, ओ शमौन, यूहन्ना रे पुत्तर, कै तू मेरे कने प्यार रखदा? पतरस उदास होई गेया कि यीशु ने तिसका तिज्जी वरी इय्यां बोल्लेया कि, कै तू मेरे कने प्यार रखदा? अते तिसने बोल्लेया, ओ प्रभु जी, तुसा तां सब किच्‍छ जाणदे तुसा जाणदे हिन कि मैं तुसा कने प्यार रखदा यीशु ने तिसजो बोल्लेया, मेरी शिक्षा जो मनणे वाले लोक्कां जो भेड़ां सांई चरा।

यूहन्ना 8:9

ए जाणदे होए कि से सारे ही पाप्पी हिन, इक्क-इक्क करी के, छोटे का लेई करी बड्डे तिकर सारे तिस जगाह् का चली गे, ते यीशु ते से जनानी तिस जगाह् पर किल्ले रेई गे।

प्रेरितां रे कम्म 5:33

ए सुणी करी सभा रे सदस्य मणू जलणा लग्गी पे ते प्रेरितां जो मारी रखणा चाएया।

रोमियों 8:34

इदेया कोई नी है जे असा पर सजा रा हुकम देई सके, किजोकी से मसीह यीशु ही हिन जे असा तांइ मरे ते मुर्देयां बिच का जिन्दे होई गे, ते परमेश्वर रे सज्जे पास्से बैठ्ठे रे हिन, ते असा तांइ बिनती करेया करदे हिन।

1 कुरुन्थियों 4:4

किजोकी मेरा विवेक साफ है, फिरी भी मैं बेकसूर नी है, किजोकी मेरे जो परखणे वाला मेरा प्रभु है।

तीतुस 3:11

तुसा जो साफ तौर पर पता है कि इदेया मणू जाणी करी गलत रस्ते पर चलेया करदा है, ते किजोकी से पाप्पी बणी गेरे हिन इधेरे तांइ तिन्हा ने अपणे गलत कम्मां री वजह कने गलत ठैहराणा।

इब्रानियों 4:13

परमेश्वर का किच्‍छ भी लुके रा नी है, ते असा ने जे किच्‍छ अपणी जिन्दगी बिच कित्ते रा है, तिसेरा लेखा-जोखा परमेश्वर जो दैणा पैणा।

इब्रानियों 6:13

जां परमेश्वर ने अब्राहम कने वादा कित्ता, तां तिन्हा ने अपणे ही नां री कसम खाई, किजोकी तिन्हा का बड्डा कोई नी थिया, जिसेरा नां लेई करी परमेश्वर कसम खाई करी बोल्लेया,

1 यूहन्ना 3:19

इसी कने ही असा जो ए पता चलदा कि असी सच्चाई रे हिसाब कने जिन्दगी जिया करदे हिन;

1 यूहन्ना 3:21

ओ प्यारे विश्वासियों, जे अगर असा रा मन असा जो दोषी नी ठेहरांदा तां असा जो परमेश्वर का प्रार्थना करणे री हिम्मत मिलदी।

1 यूहन्ना 4:4

ओ प्यारे बच्चेयों, तुसा परमेश्वर रे मणू हिन, तुसा तिन्हा झूठ्ठे भविष्यद्वक्तां पर जीत हासिल कित्ते री है, किजोकी पवित्रात्मा जे तुसा बिच बसदी से शैतान का जादा ताकतवर है जे इस दुनिया रे लोक्कां पर राज करदा।

प्रकाशित वाक्य 2:23

मैं तिन्हा लोक्कां जो मारी रखणा जे तिसेरी सीख पर चलदे, ते इस कने सारी कलीसिया रे मणूआं ने जाणी जाणा कि मैं इन्सान री सोच ते मकसद री छानबीन करदा। मैं तुसा बिच का हर इक्क जणे जो तिन्हेरे कम्मां रे हिसाब कने ईनाम दैणा।