1 यूहन्ना 3:2 - चम्बयाली नौआ नियम

² ओ मेरे प्यारे दोस्तों, अवे असी परमेश्वर री औलाद हिन, पर कल जो कै हुंगे, ए हल्ले तिकर जाहिर नी होया पर असी ए जाणदे कि जां उसने आणा तां असी भी उसेरे ही सांई होई जाणा किजोकी जदेय से हिन, तिसजो असा तदेया ही दिखणा

1 यूहन्ना 3:2 ပူးပေါင်းရင်းမြစ်များ

मत्ती 5:8

धन्न हिन से, जिन्हेरे मन सुच्चे हिन, किजोकी तिन्हा ने परमेश्वर जो दिखणा।

लूका 17:30

तिस दिन भी इदेया ही होणा जां मणू रे पुत्तर, जे मैं ही है, चाणचक्के ही वापिस हटणा।

लूका 20:36

अते फिरी तिन्हा कदी मरणा भी नी, किजोकी से स्वर्गदूत सांई हिन, अते से नौई जिन्दगी बिच फिरी जिन्दे कित्ते गे परमेश्वर री औलाद हुणी

यूहन्ना 1:12

पर जितणेया ने तिसजो अपणाया, तिसने तिन्हा जो परमेश्वर रे पुत्तर होणे रा हक्क दिता, तिन्हा लोक्कां जो जे तिस पर विश्वास रखदे।

यूहन्ना 11:52

ते ना सिर्फ उस जाति तांइ पर इस तांइ भी परमेश्वर रे तित्तर-बित्तर बच्चेयां जो भी इक्क करी दे।

यूहन्ना 17:24

ओ पिता जी! जे मणू तुसा मेरे जो दित्ते हिन, मैं चाह्‍ंदा कि जित्ते मैं है, से भी मेरे कने हो ताकि से मेरी उस बड़ाई जो दिख्खी सकण जे तुसा ने मेरे जो दित्ती है किजोकी दुनिया री रचना का भी पैल्ले तुसा मेरे कने प्यार करदे हिन

रोमियों 8:16

पवित्रात्मा अप्पु ही असा री आत्‍मा कने ए गवाई दिंदी कि असी परमेश्वर री औलाद्दां हिन।

रोमियों 8:18

मेरे जो ए गल्ल पक्के तरिक्के कने पता है कि इस बेल्ले असी जे दुख-तकलिफां सहन करेया करदे हिन, से तिस महिमा रे सामणे किच्‍छ भी नी है जे परमेश्वर असा जो दैणे वाले हिन।

रोमियों 8:19

किजोकी परमेश्वर री सारी रचना बड़ी उम्मीद तिस दिन जो भालेया करदे हिन जां परमेश्वर ने ज़ाहिर करणा कि कुण तिन्हेरे असली औलाद्दां हिन।

रोमियों 8:29

किजोकी परमेश्वर अपणे लोक्कां जो पैल्ले का जाणदे, ते परमेश्वर ने तिन्हा लोक्कां जो अपणे पुत्र सांई बणने तांइ चुणे रा है, ताकि मसीह यीशु परमेश्वर रे बाकि मती औलाद्दां बिच तिन्हेरे जेठे पुत्तर ठैहरे।

1 कुरुन्थियों 13:12

ए असी विश्वास करणे वाले लोक्कां तांइ इक्क ही जदेया है किजोकी असी इक्क इदेय मणू सांई हिन जे इक्क धुंधले सीसा बिच अपणी परछाई दिख्खेया करदे हिन, सिर्फ अग्गे चली करी भविष्य बिच असा जो हकीकत बिच सब किच्‍छ समझ बिच आणा किजोकी असा ने परमेश्वर जो आमणे-सामणे दिखणा। परमेश्वर रे बारे बिच हल्ले मेरा ज्ञान अद्दा-अधुरा है पर से समय आणा जां मैं परमेश्वर जो तिन्ना ही जाणना, जिन्ना परमेश्वर मेरे जो जाणदे।

1 कुरुन्थियों 15:49

ते जिय्यां असा ने तिसेरा रुप धारण जे मिट्टी का बणे रा थिया, तिय्यां ही असा ने तिस स्वर्गीय मणू रा रुप भी धारण करी लैणा जे मसीह यीशु हिन।

1 कुरुन्थियों 2:9

पर जिय्यां की पवित्रशास्त्र बिच लिख्खे रा है, “जिन्हा गल्लां जो कुसकी ने नी दिख्खेया अते कुसकी ने नी सूणेया, अते कुसकी ने तिन्हा ठीक गल्लां जो नी समजेया जे परमेश्वर ने अपणे प्यार करणे वालेयां तांइ तैयार कित्तेया।”

2 कुरुन्थियों 3:18

असी सारे प्रभु री महिमा जो अपणे उघाड़े रे चेहरे कने इक्क सीसा सांई प्रकाशित करदे। असा जो अपणे सांई बणाणे तांइ तिस चमकदार महिमा बिच जादा का जादा बदलेया करदे हिन। ते ए महिमा परमेश्वर रे पास्से का है, जे पवित्रात्मा रे रुप बिच असा का है।

2 कुरुन्थियों 4:17

किजोकी असा री मुसीबतां छोटी हिन ते तिन्हा ने जादा हाण तांइ नी रैह्णा किजोकी तिन्हेरे अंजाम “हमेसा री महिमा” होणा, जे तिस हर कुसकी चीज का बड्डी भी है, जिसेरे बारे बिच असी कदी सोच्ची भी नी सकदे।

गलातियों 3:26

जां तुसा सारेयां ने मसीह यीशु रा बपतिस्मा लित्तेया, तां तुसा मसीह का मिले री नौई जिन्दगी जो इय्यां पाई लित्ता जिय्यां कोई नौए कपड़े पांदा, इधेरे तांइ जां तुसा ने मसीह यीशु बिच विश्वास कित्तेया तां तुसा सारे परमेश्वर री औलाद्दां बणी गे।

गलातियों 4:6

अवे असी जे तिन्हेरे अपणे औलाद हिन इधेरे तांइ परमेश्वर ने अपणे आत्‍मा जो असा रे दिल बिच पाए रा है, जे असा जो ओ अब्बा ते ओ पिता करी के पुकारदा।

फिलिप्पियों 3:21

तिन्हा ने अपणी तिस्सी ताकत कने जिस कने तिन्हा ने हर चीज पर अपणा काबू करी लैणा, असा रे कमजोर इन्सानी शरीरां जो बदली करी तिन्हा जो अपणे महिमामय सरीर सांई बणाई दैणा।

कुलुस्सियों 3:4

नौई जिन्दगी दैणे वाले मसीह यीशु ने जां वापिस हटणा जिन्हा ने नौई जिन्दगी दित्ते री है, तां तुसा भी तिन्हा कने होणा ते तिन्हेरी महिमा बिच हिस्सा लैणा।

इब्रानियों 9:28

तिय्यां ही मसीह भी मते जणेया रे पाप्पां री माफी तांइ इक्क वरी कुर्बानी होए। तिन्हा ने इक्क वरी फिरी हटी करी आणा, पर असा रे पाप्पां तांइ नी, पर तिन्हा लोक्कां जो बचाए जाणे तांइ जे बड़ी लगन कने तिन्हेरा इंतजार करेया करदे हिन।

2 पतरस 1:4

ते तिन्हेरी महिमा ते भलाई री वजह कने तिन्हा ने असा कने बड़ा महान ते कीमती वादा कित्ते रा है। इन्हा वरदान्नां जो इस्तेमाल करी के असी सरीर री बुरी इच्छां का बची सकदे जिसेरी वजह कने दुनिया रे मणू बर्बाद होई जांदे। ते इन्हा रे जरिये मणू परमेश्वर रे स्वभाव बिच हिस्सेदार बनण।

1 यूहन्ना 2:28

अते ओ बच्चेयों, मसीह बिच बणे रेयो कि जां मसीह हटी आये तां असा जो हिम्मत रे, ताकि तिन्हेरे आणे पर असी तिन्हेरे सामणे शर्मसार ना होण।

1 यूहन्ना 2:7

ओ प्यारे विश्वासियों, मैं तुसा जो कोई नौआ हुकम नी लिख्येया करदा है, पर से ही पुराणा हुकम जे सुरुआत का तुसा जो मिल्ले रा है। ए पुराणा हुकम से ही वचन है जिस जो तुसा तां सूणेया थिया जां तुसा मसीह यीशु बिच विश्वास कित्ता थिया।

1 यूहन्ना 3:1

ध्यान देयो कि परमेश्वर पिता ने असा कने कितणा प्यार कित्तेया ताकि असा जो परमेश्वर रे निके-निके बोल्लेया जाई सके अते वाक्केई असी तिन्हेरे बच्चे हिन भी! इधेरे तांइ दुनिया रे मणू असा जो नी जाणदे कि असी परमेश्वर रे बच्चे हिन किजोकी तिन्हा ने परमेश्वर पिता जो भी नी जाणेया।

1 यूहन्ना 3:10

परमेश्वर री औलाद ते शैतान रे औलाद बिच इस कने फरक पता लाई सकदे कि हर से मणू जे धार्मिकता रे कम्म नी करदा से परमेश्वर री औलाद नी है, अते जे अपणे संगी विश्वासी कने प्यार नी करदा, से भी परमेश्वर री औलाद नी है।

1 यूहन्ना 3:21

ओ प्यारे विश्वासियों, जे अगर असा रा मन असा जो दोषी नी ठेहरांदा तां असा जो परमेश्वर का प्रार्थना करणे री हिम्मत मिलदी।

1 यूहन्ना 5:1

जे मणू ए विश्वास करदा कि यीशु ही मसीह हिन, से मणू परमेश्वर री औलाद ठैहरदा ते जे कोई अपणे पिता परमेश्वर कने प्यार रखदा से तिन्हेरी औलाद्दां कने भी प्यार रखदा।

प्रकाशित वाक्य 2:28

मैं तिन्हा जो तिन्हेरी जीत दिखाणे तांइ भ्याग्गे रा सितारा भी दैणा।

प्रकाशित वाक्य 22:4

तिन्हा ने परमेश्वर जो आमणे-सामणे दिखणा, ते परमेश्वर रा नां तिन्हेरे मात्थेयां पर लिख्खे रा होणा।