1 यूहन्ना 3:14 - चम्बयाली नौआ नियम

¹⁴ असी जाणदे कि असी हमेसा री मौत रे वस बिच नी हिन ते अवे असा का परमेश्वर रे पास्से का हमेसा री जिन्दगी है किजोकी असी अपणे संगी विश्वासी कने प्यार करदे ते जे मणू प्यार नी करदा, से हमेसा री मौत रे वस बिच हिन।

1 यूहन्ना 3:14 ပူးပေါင်းရင်းမြစ်များ

मत्ती 25:40

फिरी मैं उन्हा जो जवाब दैणा, मैं तुसा रे कने सच बोलदा जां भी तुसा ने मेरे भोले-भाले चेल्‍लेयां बिच का कुसकी इक्क तांइ भी किच्‍छ कित्तेया, तां से तुसा मेरे तांइ कित्तेया।

लूका 15:24

किजोकी मेरे जो लग्गेया थिया कि मेरा हल्का निक्का मरी गे रा थिया पर ए जिन्दा है, ए गुआच्ची गे रा थिया, पर अवे वापिस मिली गे रा है। ते फिरी से खुसियां मनाणा लग्गी पे

लूका 15:32

पर अज्ज असा जो तेरे हल्के भ्याल रे हटी आणे री खुसी मनाणा चाएदी किजोकी असा जो लग्गेया थिया कि तेरा हल्का भाई मरी गे रा होणा पर ए जिन्दा है, ए गुआच्ची गे रा थिया, पर अवे वापिस मिली गे रा है।

लूका 7:5

किजोकी से हाकिम, असा यहूदियां कने बडा़ प्यार रखदा, अते तिन्ने ही असा तांइ सभास्थल जो बणवाए दा है

यूहन्ना 13:35

जे अगर तुसा अप्पु मिते प्यार रखगे, तां इसी कने सारेयां जो पता चलणा कि तुसा मेरे चेल्‍ले हिन।

यूहन्ना 15:12

मेरा हुकम ए है कि जिय्यां मैं तुसा रे कने प्यार कित्तेया, तिय्यां ही तुसा भी इक्क दूज्जे कने प्यार करो।

यूहन्ना 15:17

मैं तुसा जो ए हुकम इधेरे तांइ देया करदा ए ताकि तुसा इक्क-दूज्जे कने प्यार करो।”

यूहन्ना 5:24

मैं तुसा रे कने सच-सच बोलदा, जे मेरा वचन सुणी करी मेरे भेजणे वाले पर विश्वास करदा हमेसा री जिन्दगी तिसका है, कने तिस पर सजा रा हुकम नी हुन्दा पर से मौत जो टप्पी करी हमेसा री जिन्दगी बिच जाई चुके रा है।

2 कुरुन्थियों 5:1

जिय्यां कि असी जाणदे कि इस दुनिया बिच असा रा सरीर इक्क तम्बू सांई है जित्ते असी रैहन्दे। जां असी मरी जाणा तां असा जो परमेश्वर रे पास्से का स्वर्ग का इक्क इदेया सरीर मिलणा जे हत्थां रा बणे रा नी पर हमेसा तिकर रैह्णे वाला है।

गलातियों 5:22

पर पवित्रात्मा का पैदा होणे वाला स्वभाव बिच प्यार, आनंद, सांती, सबर, दया, नेकी, ते विश्वास है।

इफिसियों 1:15

इधेरे तांइ जिस बेल्ले का मैं प्रभु यीशु बिच तुसा रे विश्वास अते सब पवित्र मणूआं तांइ तुसा रे प्यार रे बारे बिच सुणे रा है,

इफिसियों 2:1

पैल्ले-पैल्ले तुसा बिच परमेश्वर रे पास्से का कोई नौई जिन्दगी नी थी, किजोकी तुसा अपणे पाप ते गलत कम्मां री वजह कने मरे रे मणूआं सांई थिये।

कुलुस्सियों 1:4

किजोकी असा ने मसीह बिच तुसा रे विश्वास रे बारे बिच, ते संगी विश्वासियां कने तुसा रे आपसी प्यार रे बारे बिच सुणे रा है,

1 थिस्सलुनीकियों 4:9

पर मेरे जो चीठ्ठी लिख्खी करी तुसा जो संगी विश्वासियां कने प्यार रखणे तांइ दसणे री जरुरत नी है, किजोकी से तुसा अप्पु परमेश्वर का सिख्खे रा है।

इब्रानियों 13:1

भाईचारे रे रा प्यार बणी रे।

1 पतरस 1:22

सच्चाई जो मन्नी करी चलणे री वजह कने अवे तुसा सुच्चे कित्ते गे, अवे तुसा जो तन-मन लाई करी संगी विश्वासियां कने आपसी प्यार रखणा चाएदा। बड़ी चाह्‍त ते पूरे दिल कने इक्क-दूए कने प्यार रख्खो।

1 पतरस 3:8

आखिरकार मैं तुसा सारेयां जो ए बोलणा चाह्‍ंदा कि तुसा सारे जणे इक्क-मन होई करी रेयो। इक्क दूए कने हमदर्दी रख्खो। इक्क-दूए जो अपणे परिवार रे मणूआं सांई प्यार करो, इक्क-दूए तांइ दयालू बणो ते सारेयां कने नरम बणो।

2 पतरस 1:7

ते भक्ति पर भाईचारा बधांदे रेयो, ते भाईचारे पर प्यार भी बधांदे रेयो।

1 यूहन्ना 2:3

जे असी परमेश्वर रे हुकमां जो मनगे, तां इस कने ए पता चलणा की असी तिन्हा जो जाणी गेरे हिन।

1 यूहन्ना 3:23

तिसेरा हुकम ए है कि असी तिसेरे पुत्तर मसीह यीशु बिच विश्वास करण अते जिय्यां तिन्हा हुकम दित्तेया है, कि असी इक्क-दूय्ये कने प्यार करो।

1 यूहन्ना 4:12

परमेश्वर जो कदी कुनिए भी नी दिख्खेया अगर असी अप्पु-मिते प्यार रखण, तां परमेश्वर असा री जिन्दगी अन्दर बणी रैह्न्दा, ते तिसेरा प्यार असा अन्दर सिद्ध होई गे रा है।

1 यूहन्ना 5:13

मैं तुसा जो, जे परमेश्वर रे पुत्तर रे नां पर भरोस्सा करदे, इधेरे तांइ ए चीठ्ठी लिख्खे री है कि तुसा जाणी सकेयो कि हमेसा री जिन्दगी तुसा री है।

1 यूहन्ना 5:2

जां असी पिता परमेश्वर कने प्यार रखदे, ते तिसेरे हुकमां जो मनदे, तां इसका ही असी जाणदे कि परमेश्वर री औलाद्दां कने प्यार रखदे।