1 यूहन्ना 2:4 - चम्बयाली नौआ नियम

⁴ जे कोई ए बोलदा कि मैं परमेश्वर जो जाणदा, ते तिन्हेरी गल्लां जो नी मनदा, तां से झूठ्ठा है, तां से सच्चाई रे हिसाब कने जिन्दगी नी जिन्दा।

1 यूहन्ना 2:4 ပူးပေါင်းရင်းမြစ်များ

यूहन्ना 8:44

तुसा अपणे प्यो शैतान रे पास्से का हिन ते अपणे प्यो री मर्जी जो पूरा करणा चांह्दे, से ता हमेसा का ही खून्नी है, तिसेरा सच्चाई कने कोई लैणा-दैणा नी है, किजोकी सच्चाई तिस बिच है ही नी। जां से झूठ बोलदा, तां अपणी आदत कने ही बोलदा किजोकी से झूठ्ठा है, बल्कि झूठ रा प्यो है।

तीतुस 1:10

मैं ए इधेरे तांइ बोल्लेया करदा है किजोकी मते मणू सही शिक्षा रे खिलाफ होई जांदे। ए से मणू हिन जे पुठ्ठी-सीद्दी गल्लां सिखाई करी लोक्कां जो भटकांदे। ए गल्लां खासतौर तिन्हा यहूदियां तांइ हिन जे विश्वासी बणी गेरे हिन। से मणू चाह्‍ंदे कि सारे मसीही मणू यहूदी नियमां जो मन्नेया करें, खासतौर पर खतना कराणे रे नियम जो।

तीतुस 1:16

ए झूठ्ठी शिक्षा दैणे वाले मणू हिन जे परमेश्वर जो जानणे रा दावा ता करदे पर तिन्हेरे कम्म दिखांदे कि से मणू तिन्हा जो नी जाणदे। से नफरत करणे ते परमेश्वर री हुकमां री ना-फरमानी करणे वाले मणू हिन ते कोई भी खरा कम्म करणे रे जोग्गे नी हिन।

1 यूहन्ना 1:10

जे असी बोलदे कि असा रे बिच पाप नी है तां असा परमेश्वर जो झूठा बणान्दे अते असी तिन्हेरे वचन रे हिसाब कने जिन्दगी नी जिन्दे।

1 यूहन्ना 1:6

जे असी ए बोलण कि असी उसेरे साझी हिन पर असी पाप रे न्याहारे बिच अपणी जिन्दगी जिंदे तां असी झूठ बोल्लेया करदे हिन ते सच रे रस्ते पर नी चलेया करदे हिन,

1 यूहन्ना 1:8

जे असी बोलण कि असा बिच कोई पाप नी है तां असी खुद जो धोखा देया करदे हिन अते असा बिच सच्चाई नी है।

1 यूहन्ना 2:3

जे असी परमेश्वर रे हुकमां जो मनगे, तां इस कने ए पता चलणा की असी तिन्हा जो जाणी गेरे हिन।

1 यूहन्ना 2:9

जे कोई ए बोलदा कि मैं सच्चाई बिच जिन्दगी जिया करदा है पर अपणे संगी विश्वासी कने बैर रखदा, से हल्ले तिकर बुराई बिच जिया करदा है।

1 यूहन्ना 3:6

जे कोई मसीह यीशु बिच बणी रैह्न्दा, से अग्गे जो पाप बिच जिन्दगी नी बितांदा पर हर इक्क कोई जे पाप करदा रैहन्दा, तिसेरा परमेश्वर कने कोई रिस्ता नी अते तिसने तिन्हा जो नी जाणेया।

1 यूहन्ना 4:20

अगर कोई बोल्ले कि, मैं परमेश्वर कने प्यार रखदा पर अपणे संगी विश्वासी कने प्यार ना रख्खो, तां से झूठा है किजोकी जे अपणे संगी विश्वासी कने जिस जो तिनिए दिख्खे रा है, प्यार नी रखदा तां से परमेश्वर कने भी जिस जो तिनिए नी दिख्खेया, प्यार नी रख्खी सकदा।

1 यूहन्ना 4:7

ओ प्यारेयों, असी अप्पु-मिते प्यार रखण किजोकी प्यार परमेश्वर रे पास्से का है, ते जे दूज्जेयां कने प्यार रखदा, से परमेश्वर रा बच्चा है, ते परमेश्वर जो जाणदा।