1 यूहन्ना 2:3 - चम्बयाली नौआ नियम

³ जे असी परमेश्वर रे हुकमां जो मनगे, तां इस कने ए पता चलणा की असी तिन्हा जो जाणी गेरे हिन।

1 यूहन्ना 2:3 ပူးပေါင်းရင်းမြစ်များ

लूका 6:46

फिरी यीशु ने बोल्लेया, तुसा मेरे जो ओ प्रभु जी, ओ प्रभु जी, किजो बोलदे रैह्‍न्दे, जदकी तुसा मेरी गल्लां जो मनणे तांइ तैयार नी हिन?

यूहन्ना 14:15

जे तुसा मेरे कने प्यार करदे तां मेरे हुकमा जो मन्नो।

यूहन्ना 15:10

जे तुसा मेरे हुकमां जो मंनगे, तां मेरे प्यार बिच बणी रैहन्गे, तिय्यां ही जिय्यां मैं अपणे पिता रे हुकमां जो मनदा अते तिन्हेरे प्यार बिच बणी रैहन्दा।

यूहन्ना 15:14

जे हुकम मैं तुसा जो दित्तेया, जे तुसा तिसजो मनगे, तां ही तुसा मेरे दोस्त हिन।

यूहन्ना 17:3

ते इस तरिक्के कने हमेसा री जिन्दगी जो हासिल कित्तेया जाई सकदा कि मणू इकलौते सच्चे परमेश्वर जो ते यीशु मसीह यानी मेरे जो जाणे जिस जो तुसा दुनिया रे लोक्कां का भेज्जे रा है।

2 कुरुन्थियों 4:6

किजोकी परमेश्वर ने ही बोल्ले रा है, “न्याहरे बिच रौसनी चमके।” ते से ही असा रे दिल बिच चमकी, ताकि असी मसीह बिच परमेश्वर री महिमा जो दिख्खी सकण।

इब्रानियों 5:9

ते इस तरिक्के कने परमेश्वर ने तिन्हा जो सिद्ध बड्डा पुरोत्त बणाई दित्ता, तिन्हेरे मनणे वाले सारे मणूआं तांइ हमेसा री जिन्दगी री वजह बणी गे।

1 यूहन्ना 2:13

ओ बुजुर्ग लोक्कों, मैं तुसा जो इधेरे तांइ लिखदा कि जे सुरुआत का है तिसजो तुसा जाणदे, ओ जवानों मैं तुसा ओ इधेरे तांइ लिखदा कि तुसा ने तिस शैतान पर जीत हासिल कित्ते री है। ओ बच्चेयों, मैं तुसा जो इधेरे तांइ लिख्खेया कि तुसा पिता परमेश्वर जो जाणी गेरे हिन।

1 यूहन्ना 3:14

असी जाणदे कि असी हमेसा री मौत रे वस बिच नी हिन ते अवे असा का परमेश्वर रे पास्से का हमेसा री जिन्दगी है किजोकी असी अपणे संगी विश्वासी कने प्यार करदे ते जे मणू प्यार नी करदा, से हमेसा री मौत रे वस बिच हिन।

1 यूहन्ना 3:19

इसी कने ही असा जो ए पता चलदा कि असी सच्चाई रे हिसाब कने जिन्दगी जिया करदे हिन;

1 यूहन्ना 3:6

जे कोई मसीह यीशु बिच बणी रैह्न्दा, से अग्गे जो पाप बिच जिन्दगी नी बितांदा पर हर इक्क कोई जे पाप करदा रैहन्दा, तिसेरा परमेश्वर कने कोई रिस्ता नी अते तिसने तिन्हा जो नी जाणेया।

1 यूहन्ना 4:13

इस कने ही असी जाणदे कि असी परमेश्वर अन्दर बणी रैह्‍न्दे, ते से असा अन्दर, किजोकी तिनिए अपणी पवित्रात्मा असा जो दित्ते रा है।

1 यूहन्ना 4:7

ओ प्यारेयों, असी अप्पु-मिते प्यार रखण किजोकी प्यार परमेश्वर रे पास्से का है, ते जे दूज्जेयां कने प्यार रखदा, से परमेश्वर रा बच्चा है, ते परमेश्वर जो जाणदा।

1 यूहन्ना 5:19

असा जो पता है कि असी परमेश्वर कने हिन ते सारी दुनिया तिस शैतान रे वस अन्दर पेरी है।

1 यूहन्ना 5:2

जां असी पिता परमेश्वर कने प्यार रखदे, ते तिसेरे हुकमां जो मनदे, तां इसका ही असी जाणदे कि परमेश्वर री औलाद्दां कने प्यार रखदे।

1 यूहन्ना 5:3

परमेश्वर कने प्यार करणे रा मतलब ए है कि असी तिन्हेरे हुकमां जो मन्ने ते तिन्हेरे हुकम मुस्किल नी हिन।

प्रकाशित वाक्य 12:17

इसेरे नतीज्जे रे तौर पर, से अजगर जो तिस जनानी पर बड़ा वरी गुस्सा आया। इधेरे तांइ तिनिये तिस जनानी रे ‍खानदान रे खिलाफ इक्क लड़ाई रा एलान करी दित्तेया। ए से मणू होणे जे परमेश्वर रे हुकम मुताबिक चलदे ते तिन्हा सच्ची शिक्षां पर बणी रैह्‍न्दे जे मसीह ने सिखाए री हिन।

प्रकाशित वाक्य 14:12

इधेरे तांइ जरुरी है कि पवित्र मणू सबर कने तिस मुसीबतां जो सहन करदे रैह्ण। तिन्हा ने से करणा जिसेरा हुकम परमेश्वर रा दित्ते रा हो, ते से मसीह यीशु पर विश्वास करणा ना छड्डे।

प्रकाशित वाक्य 22:14

धन्न है से, जे अपणे चोग्गे धोई लिंदे, किजोकी तिन्हा जो सहर रे दुआर का अंदर आणे रा हक दित्तेया जाणा। ते तिन्हा जो तिस बूट्टे रा फल्ल खाणे रा भी हक दित्तेया जाणा जिस जो खाणे कने हमेसा री जिन्दगी मिलदी।