1 यूहन्ना 2:17 - चम्बयाली नौआ नियम

¹⁷ दुनिया ते तिसेरी चीजां री लालसा दोन्नों मिटणे वाली हिन, पर जे परमेश्वर री इच्छा रे हिसाब कने जिन्दगी जिन्दे, तिन्हा ने हमेसा तिकर बणी रैह्णा।

1 यूहन्ना 2:17 ပူးပေါင်းရင်းမြစ်များ

मत्ती 21:31

इन्हा दोन्नां बिच का कुसने पिता री मर्जी पूरी कित्ती? तिन्हा ने बोल्लेया, पैल्ले मुंडे ने, यीशु ने बोल्लेया, मैं तुसा कने सच बोलदा की महसुल लैणे वाले ते वेश्या तुसा का पैल्ले स्वर्ग रे राज बिच पुजदे।

मत्ती 24:35

आसमान ते जमीन टली जाणे पर मेरी गल्लां बगैर पूरे होए नी टलणी।

मत्ती 7:21

“प्रभु-प्रभु बोलणे वाला हर मणू स्वर्ग रे राज अन्दर नी जाई पाणा बल्कि से जे मेरे स्वर्ग अन्दर रैह्णे वाले परम-पिता री मरजी पर चलदा तिन्ने अन्दर जाई पाणा।”

मरकुस 3:35

किजोकी जे कोई परमेश्वर री इच्छा पर चलदे सेह्ई मेरा भाई, ते भैण ते माता है।”

यूहन्ना 4:14

पर जे कोई तिस पाणी बिच का पिन्गा, जे मैं तिसजो दैणा, तिसजो फिरी कदी भी प्यास नी लगणी पर जे पाणी मैं तिसजो दैणा, तिसेरा उस मणू अन्दर इक्क सोता बणी जाणा जे हमेसा तिकर रैह्णा।

यूहन्ना 6:58

जेड़ी रोट्टी स्वर्ग का उतरी, ए ही है, से तिस रोटी सांई नी जिस जो बाब्बे-दाद्दे ने खाया ते मरी गे, जे कोई ए रोट्टी खांगा, से हमेसा जिन्दा रैहन्गा।

यूहन्ना 7:17

जे कोई मणू परमेश्वर री इच्छा पर चलणा चाए तिसने ए समजी जाणा कि मेरी शिक्षा परमेश्वर रे पास्से का है या मैं अपणी मर्जी कने बोलदा।

रोमियों 12:2

इस दुनिया रे लोक्कां सांई मत बणो, पर तुसा रे मन रे बदली जाणे री वजह कने तुसा रा चाल-चलन भी बदलदा रे, जिस कने तुसा परमेश्वर री भली, ते ठीक लगणे वाली, ते सिद्ध इच्छा जो तजुरबे कने जाणदे रेयो।

1 कुरुन्थियों 7:31

किजोकी असी जाणदे कि इस दुनिया ने बड़े तौले ही मुकी जाणा इधेरे तांइ तुसा बिच का कुसकी जो भी दुनिया री कुसकी भी चीज कने बड़ा जादा दिल नी लाई लैणा चाएदा।

कुलुस्सियों 1:9

इधेरे तांइ जां रा असी तुसा रे बारे बिच सुणे रा है, तां का ही असी तुसा तांइ प्रार्थना करदे रैहन्दे। असी परमेश्वर का हमेसा प्रार्थना करदे कि से तुसा जो पूरी समझ ते आत्मिक बुद्वी ते समजदारी दैण ताकि तुसा तिन्हेरी इच्छा जो समजी सको।

कुलुस्सियों 4:12

इपफ्रास भी जे तुसा रे ही सहर का है। ते से मसीह यीशु रा दास है, तुसा जो प्रणाम बोल्लेया करदा है। से बड़ी लगन कने तुसा तांइ प्रार्थना करदा रैहन्दा ताकि तुसा मसीह यीशु बिच विश्वास करणे बिच मजबूत होई करी, सिद्व होई करी ते पक्के तौर पर पूरे विश्वास कने परमेश्वर री मर्जी जो पूरा करो।

1 थिस्सलुनीकियों 4:3

किजोकी परमेश्वर री ये मर्जी है कि तुसा व्यभिचार ना करो ते पवित्र बणो।

1 थिस्सलुनीकियों 5:18

हर हालात बिच परमेश्वर रा शुकर करो किजोकी तुसा तांइ मसीह यीशु बिच परमेश्वर री ए ही मर्जी है।

इब्रानियों 10:36

किजोकी तुसा जो सबर रखणा जरुरी है, ताकि तुसा परमेश्वर री मर्जी जो पूरा करी के, तिन्हा जो खुस करी सको ते तुसा ने तिस ईनाम जो पाणा जिसेरा वादा परमेश्वर ने कित्ते रा है।

याकूब 4:14

पर तुसा ए नी जाणदे की कल कै होणा, सुणी तां लेयो कि तुसा री जिन्दगी है ही क्‍या? तुसा तां भाप सांई हिन जे थोड़ी देर दिसदी ते फिरी गायब होई जांदी,

1 पतरस 1:5

परमेश्वर अपणी महान ताकत कने तुसा जो सुरक्षित रखदे किजोकी तुसा मसीह बिच विश्वास करदे। तिन्हा ने तुसा जो अग्गे भी तां तांइ सुरक्षित रखणा जां तांइ मसीह यीशु हटी नी आंदे तां ही तुसा ने जाणना कि परमेश्वर ने तुसा जो पाप ते हमेसा री मौत का पूरे तरिक्के कने बचाए रा है।

1 पतरस 4:2

इसेरे अंजाम रे तौर पर तिस मणू ने इस दुनिया बिच अपणी बाकि री जिन्दगी अपणे सरीर री बुरी इच्छा जो पूरा करदे होए नी बिताणी, पर तिसने से ही कम्म करणा जे परमेश्वर तिसका करवाणा चाह्‍ंदे।