1 कुरुन्थियों 6:7 - चम्बयाली नौआ नियम

⁷ पर जां कोई विश्वासी अपणे दूए विश्वासी भाई जो कुसकी मुद्दे तांइ कचेरी बिच लेई जांदे, तां इक्क विश्वासी होणे रे नात्ते जिय्यां असा जो अप्पु-मिते रैह्णा चाएदा, असी तिय्यां रैह्णे बिच नाकाम रैह्‍ंदे। खरा ता ए ही होणा कि तुसा अपणे दूए विश्वासी भाई री गलती जो सहन करी लेया करो। जे अगर दूए विश्वासी भाई ने तुसा का धोख्खे कने किच्‍छ लेई लित्ते रा हो, तां तिसेरे खिलाफ किच्‍छ भी मत करो।

1 कुरुन्थियों 6:7 ပူးပေါင်းရင်းမြစ်များ

लूका 19:8

जां यीशु ते तिन्हेरे चेल्‍ले तिसेरे घरे रोट्टी खाया करदे थिये तां जक्कई खड़े होई गेया अते यीशु जो बोलणा लग्गेया, ओ प्रभु जी, मैं अपणी धन-दौलत रा अद्दा हिस्सा गरीबां बिच्च बन्डी दैणी अते प्रभु जी मैं जिन्हा मणूआं जो ठग्गी करी तिन्हा का जरुरत का जादा लित्ते दा है तिन्हा जो मैं चार गुणा मोड़ी दिह्गां।

लूका 6:29

जे तुसा री खाड्डी रे इक्क पास्से चन्ड्ड मारो, तां तिसेरे अग्गे दूजी खाड्डी भी करी देयो ते जे कोई तुसा का तुसा रा सोल खुस्सि लेयो, तिसजो अपणी कमीज भी लैणा देयो

1 थिस्सलुनीकियों 5:15

चुकन्ने रेयो कि कोई कुसकी कने बुराई रे बदले अन्दर बुराई ना करो पर हमेसा ठीक कम्म करणे तांइ हमेसा तैयार रेयो, अप्पु-मित्ते ते सबणी कने भी भलाई री ही कोसीस करो।

1 पतरस 3:9

बुराई रे बदले बुराई मत करो ते ना गाली रे बदले गाली देयो, पर इसेरे उलट आशीर्वाद ही देया करो, किजोकी परमेश्वर ने तुसा जो इधेरे तांइ सद्दे रा है ताकि तुसा सारेयां जो आशीष देयो। जे अगर तुसा इय्यां करगे, तां परमेश्वर ने तुसा जो आशीष दैणी।