1 कुरुन्थियों 5:8 - चम्बयाली नौआ नियम

⁸ इधेरे तांइ आओ असा अपणा फसह रा त्योहर मनांदे जिय्यां कि यहूदी मणू तराक्क जो कड्डी करी सूटी दिंदे ते अखमीरी रोट्टी खांदे थिये, तिय्यां ही असा जो भी जिन्दगी तिस हिसाब कने नी जीणा चाएदी जिय्यां असी मसीह यीशु बिच विश्वास करणे का पैल्ले जिंदे थिये।

1 कुरुन्थियों 5:8 ပူးပေါင်းရင်းမြစ်များ

मत्ती 16:12

तां तिन्हेरी समझ बिच आया कि तिन्हा रोट्टी री तराक्क का नी, पर फरीसियां अते सदूकियां रे उपदेस का सावधान रैह्णे तांइ बोल्लेया थिया।

मत्ती 16:6

यीशु ने तिन्हा जो बोल्लेया, दिख्खो, फरीसी अते सदूकियां री तराक्क का सावधान रेयो।

मरकुस 8:15

यीशु ने अपणे चेल्‍लेयां जो तिन्हा लोक्कां री गलत शिक्षा का बची रैह्णे तांइ इय्यां समजाया, “दिख्खो, फरीसी ते हेरोदेस रे समुह रे लोक्कां री तराक्क का सावधान रेयो।”

लूका 12:1

जां हजारां रे साह्बे मणू कठ्ठी गे ते सब इक्क दूज्जे पराल्ले चढ़या करदे थिये, तां यीशु ने पैल्ले अपणे चेल्‍लेयां जो बोल्लेया, कि फरीसी मणूआं रे खमीर का जे कि इन्हेरा कपट है, बची करी रेयो

यूहन्ना 1:47

यीशु ने नतनएल जो अपणे पास्से आंदे दिख्खी करी उसेरे बारे बिच बोल्लेया: ए सच्ची इस्राएल रे ‍खानदान रा है ते भरोसेमंद है: इस आदमी बिच कोई ढोंग नी है।

1 कुरुन्थियों 3:3

किजोकी हल्ले तांइ तुसा इस दुनिया रे अविश्वासी लोक्कां सांई हिन। तुसा रे बिच हिर्स अते झगड़ा है, इस कने साबित हुंदा कि तुसा इस दुनिया रे दूए लोक्कां सांई हिन ते तिय्यां ही बरताव करदे।

1 कुरुन्थियों 5:1

किच्‍छ लोक्कां ने मेरे जो दस्से रा है कि तुसा रे कलीसिया रे किच्‍छ मणू व्यभिचार बिच पे रे हिन। बल्कि इदेया व्यभिचार ता मसीह बिच विश्वास ना करणे वाले लोक्कां बिच भी नी हुंदा कि इक्क मणू अपणी सौतेली मां कने नाजायज़ रिश्ते बणाए।

1 कुरुन्थियों 5:6

तुसा घमंड करणा छड्डी देयो। जिय्यां कि तुसा जाणदे कि जरा करी तराक पूरे गुह्ने रे आट्टे जो तराक्की दिंदा तिय्यां ही जां कोई इक्क मणू पाप करदा रैहन्दा तां तिस वजह कने तिसेरे कन्ने रे सारे मणू तिस असर बिच पाप करणा लग्गी पैंदे।

2 कुरुन्थियों 1:12

किजोकी असी अपणे विवेक री इस गवाई पर असी पूरी बुड़ख कने बोलदे कि असी अपणे हर काम्म-काज बिच परमेश्वर री दित्ते री पवित्रता ते सच्चाई कने जिन्दगी जिन्दे, खासतौर पर जां असी तुसा कने थिये। असी अपणी इन्सानी समझ पर नी पर परमेश्वर रे अनुग्रह पर निर्भर रैहन्दे।

2 कुरुन्थियों 2:17

असी उन्हा केई मणूआं सांई नी हिन, जे पैसे रे लालच बिच परमेश्वर रे वचन बिच हेराफेरी करदे हिन, पर असी ए जाणदे होए कि परमेश्वर असा जो भेज्जे रा है, ते से असा जो दिख्खेया करदे हिन, ते असी मसीह रे हक कने हमेसा सच्चाई कने शिक्षा दिंदे।

2 कुरुन्थियों 8:8

मैं तुसा जो हुकम नी है देया करदा, पर मैं तुसा रे प्यार री सच्चाई जो दूज्जेयां री गहरी इच्छा कने तुलना करी के परखणा चाह्‍ंदा।

इफिसियों 6:24

जे असा रे प्रभु यीशु मसीह कने सच्चा प्यार करदे, तिन्हा सारेयां पर परमेश्वर रा अनुग्रह हुंदा रे।

1 पतरस 4:2

इसेरे अंजाम रे तौर पर तिस मणू ने इस दुनिया बिच अपणी बाकि री जिन्दगी अपणे सरीर री बुरी इच्छा जो पूरा करदे होए नी बिताणी, पर तिसने से ही कम्म करणा जे परमेश्वर तिसका करवाणा चाह्‍ंदे।