1 कुरुन्थियों 2:12 - चम्बयाली नौआ नियम

¹² पर परमेश्वर ने असा जो अपणी आत्‍मा दित्ते री है, इधेरे तांइ असी दुनिया रे लोक्कां सांई नी सोचदे। ते ए ही वजह है कि असी परमेश्वर री आशीषां जो समजी लिंदे।

1 कुरुन्थियों 2:12 ပူးပေါင်းရင်းမြစ်များ

रोमियों 8:1

इधेरे तांइ अवे जे प्रभु यीशु मसीह बिच विश्वास करदे, तिन्हा पर सजा रा हुकम नी है।

रोमियों 8:32

परमेश्वर ने अपणे इकलौत्ते पुत्र जो भी नी छड्डेया, पर तिन्हा जो असा रे खातिर अपणे दुश्मणा रे हत्थां बिच भी सौंप्पि दित्तेया। परमेश्वर ने असा जो से सब किच्‍छ जरुर दैणा जिसेरा तिन्हा असा कने वादा कित्ते रा है।

1 कुरुन्थियों 1:27

पर परमेश्वर ने तिन्हा लोक्कां जो चुणी लित्तेया जिन्हा जो दुनिया रे मणू बेवकूफ समजदे, ताकि परमेश्वर तिन्हा लोक्कां जो शर्मिंदा करण जे अप्पु जो समजदार मनदे।

1 कुरुन्थियों 2:6

फिरी भी असी पक्के विश्वासियां रे बिच ज्ञान री गल्लां सुणान्दे हिन, पर ए ज्ञान कोई दुनियावी ज्ञान नी है ते ना ही इस जुग रे प्रधान लोक्कां रे ज्ञान जदेया है जे इक्क दिन नास होई जाणा।

2 कुरुन्थियों 4:4

शैतान, जे इस दुनिया रे लोक्कां रा शासक है, तिनिये मसीह यीशु बिच विश्वास ना करणे वाले लोक्कां री समझ जो मंद करी रख्खे रा है, ताकि से मणू सुब बसेख री महिमामय रौसनी जो नी दिख्खी सके। से मणू मसीह यीशु रे इस महिमा रे बसेख जो नी समजदे जे परमेश्वर रे प्रतीरुप हिन।

इफिसियों 2:2

तिस बेल्ले तुसा दुनियादारी रे तौर-तरिक्के कने चलदे थिये ते तुसा शैतान रे कहे मुताबिक चलेया करदे थिये जे दुष्टात्मां रा हाकिम है, ते जे अज्ज भी तिन्हा लोक्कां बिच कम्म करेया करदा है जे परमेश्वर रे हुकमां री ना-फरमानी करदे।

याकूब 4:5

तुसा जो ए समझणा चाएदा की परमेश्वर पवित्रशास्त्र बिच ए बोलदे, “जिस आत्‍मा जो परमेश्वर ने असा रे अन्दर बसाए रा है, से हिर्स नी करदा जे अगर असी परमेश्वर रे अलावा असी होर कुसकी कने प्यार रखदे।”

1 यूहन्ना 2:20

पर मसीह यीशु ने तुसा जो पवित्रात्मा दित्ते रा है इधेरे तांइ तुसा सारी सच्चाई जाणदे।

1 यूहन्ना 2:27

पर तुसा तांइ से पवित्रात्मा जे तुसा ने मसीह यीशु का पाए रा है, तुसा बिच बणी रैहन्दा, ते इसेरी कोई जरुरत नी कि कोई तुसा जो सच्चाई री गल्लां सिखाए, बल्कि जिय्यां पवित्रात्मा ने जे मसीह ने तुसा जो मिल्ले रा है, तुसा जो सच्चाई री सारी गल्लां सिखणे तांइ मदद करणी, जे पवित्रात्मा तुसा जो सिखांदा, से पूरी तरिक्के कने सच है, ते तिस बिच कोई झूठ नी, इधेरे तांइ मसीह बिच बणी रेयो, जिय्यां पवित्रात्मा ने तुसा जो करणे तांइ दस्से रा है।

प्रकाशित वाक्य 12:9

तां तिस अजगर ते तिसेरे दूत जो धरती पर सूटी दित्तेया गेया। से अजगर ओ ही है जिस जो पैल्ले-पैल्ले कीड़ा भी बोल्लेया गेया थिया, जिसेरा नां शैतान। एह् ओई है जे दुनिया रे लोक्कां पर इल्जाम लगांदा अते भटकाया करदा है।

प्रकाशित वाक्य 22:6

तिसका बाद, इक्क स्वर्गदूत ने मेरे जो बोल्लेया, “से सारी गल्लां सच हिन ते बड़े झट होणे वाली हिन। प्रभु परमेश्वर जे अपणी आत्‍मा सारे भविष्यद्वक्ता जो दिंदे, तिन्हा ने अपणे स्वर्गदूत जो इत्ते आई करी अपणे सेवादार जो ए दसणे रा हुकम दित्तेया कि जल्द ही कै होणे वाला है।”