1 कुरुन्थियों 14:1 - चम्बयाली नौआ नियम

¹ पूरे दिल कने इक्क-दूए कने प्यार बणाए रखणे री हर मुमकिन कोसीस करेया करो ते आत्मिक वरदान्नां री धुन बिच रेयो, खासतौर पर की भविष्यवाणी करेया करो।

1 कुरुन्थियों 14:1 ပူးပေါင်းရင်းမြစ်များ

रोमियों 12:6

हालांकि असा जो परमेश्वर का मिल्ले रे तिस अनुग्रह रे हिसाब कने, बखरे-बखरे वरदान मिल्ले रे हिन। तां जिस जो भविष्यवाणी करणे रा वरदान मिल्ले रा हो, तिसजो पूरे भरोस्से कने से भविष्यवाणी करणा चाएदी जे गल्लां परमेश्वर ने तिसजो दस्से री हिन।

रोमियों 14:19

इधेरे तांइ असा जो तिन्हा गल्लां जो करणे बिच लग्गी रैह्णा चाएदा, जिन्हा कने मणू मिली जुली करी रे, ते सारेयां रा विश्वास मजबूत हो।

रोमियों 9:30

तां फिरी असी कै बोलण? गैर यहूदी मणू परमेश्वर री नजरां बिच धार्मिक बणने री कोसीस नी करेया करदे थिये, पर परमेश्वर ने तिन्हा लोक्कां जो धार्मिक ठैहराया, किजोकी तिन्हा लोक्कां ने मसीह बिच विश्वास कित्तेया।

1 कुरुन्थियों 12:1

ओ संगी विश्वासियों, तुसा रे आत्मिक खुबियां रे बारे सवाल रे बारे बिच मैं चाह्‍ंदा की तुसा ध्यान कने समझो।

1 कुरुन्थियों 12:31

तुसा बड्डी का बड्डी खूबी जो पाणे री धुन बिच रेयो, पर अवे मैं तुसा जो सारेयां का बदिया रस्ता दसदा।

1 कुरुन्थियों 13:13

पर अवे ए त्रै तरिक्के री चीजां हिन जे असा जो करणा चाएदी। परमेश्वर बिच विश्वास रखणा, परमेश्वर रे वादेयां री आस रखणा ते सारेयां जो प्यार करणा। पर इन्हा त्रैन्नी चीजां बिच का परमेश्वर ते सारेयां जो प्यार करणा सबका जादा जरुरी है।

1 कुरुन्थियों 13:2

जे अगर मैं भविष्यवाणी करां ते सारे राज़ ते हर तरिक्के री गल्ल जो समजी सकां, ते मेरे जो परमेश्वर बिच इत्ते तिकर विश्वास हो की मैं पहाड़ां जो हटाई सकदा पर कुसकी कने प्यार ना करां, तां मैं कुसकी कम्मे रा नी है।

1 कुरुन्थियों 14:22

इस तांइ बखरी-बखरी भाषां अविश्वासियां तांइ परमेश्वर री इक्क निशानी है, ते भविष्यवाणी विश्वासियां तांइ परमेश्वर री निशानी है।

1 कुरुन्थियों 14:37

जे कोई मणू अपणे आप जो भविष्यद्वक्ता या इदेया कोई मणू समजदा जिस जो पवित्रात्मा कोई खूबी दित्ते री हो, तां से मणू ए जाणी लै कि जे गल्लां मैं तुसा जो लिखदा से प्रभु रे हुकम हिन।

1 कुरुन्थियों 14:39

इधेरे तांइ ओ संगी विश्वासियों, भविष्यवाणी करणे री धुन बिच रेयो, पर बखरी-बखरी भाषा बोलणे का कुसकी जो मत रोक्को।

1 कुरुन्थियों 16:14

ते जे किच्‍छ भी तुसा करदे हिन से प्यार कने करो।

इफिसियों 1:3

असा रे परमेश्वर ते यीशु मसीह रे पिता री महिमा हो किजोकी तिन्हा ने असा जो मसीह यीशु कने रिस्ता होणे री वजह कने स्वर्ग का हर तरिक्के री आत्मिक आशीषां दित्ती।

1 थिस्सलुनीकियों 5:20

जे भविष्यवाणियां परमेश्वर ने लोक्कां पर ज़ाहिर कित्ते री हिन तिन्हा जो नक्कारो मत।

1 तीमुथियुस 4:14

तुसा बिच जे आत्मिक वरदान है तिसजो नजरंदाज मत करो जे तुसा जो भविष्यवाणी रे जरिये तिस बेल्ले दित्तेया गेया थिया जां कलीसिया रे बुजुर्गां ने तुसा पर हत्थ रख्खे थिये।

1 तीमुथियुस 5:10

से विधवा जनानी अपणे भलाई रे कम्मां तांइ जाणी जांदी हो जिय्यां कि बच्चेयां रा पालण-पोषण करणा, मेहमान-नवाजी करणा, प्रभु रे लोक्कां री सेवा करणा, मुसीबत बिच पेय रे लोक्कां री मदद करणा ते हर तरिक्के रे भलाई रे कम्मां बिच मन लाणा।

1 तीमुथियुस 6:11

पर ओ तीमुथियुस, तू परमेश्वर री सेवा करणे वाला मणू है, तेरे जो जाणी करी इदेइ चीजां का टलणा चाएदा। हमेसा धार्मिकता, भक्ति ते विश्वास रे कम्म करणे री कोसीस करो। इक्क इदेइ जिन्दगी जियो जिस कने परमेश्वर जो आदरमान मिल्ले। मसीह रा आदरमान करो, सारे लोक्कां कने प्यार रख्खो, मुस्किल हालात्तां बिच हार मत मन्नों, लोक्कां कने नरमदिल होई करी रेयो।

2 तीमुथियुस 2:22

इधेरे तांइ जुआन्नी री बुरी इच्छा का दुर रेयो ते जे मणू प्रभु रा नां लिंदे रैह्‍न्दे तिन्हा मणूआं कने धार्मिकता, ते विश्वास, ते प्यार ते मेल जोल री कोसीस बिच रेयो।

इब्रानियों 12:14

सारेयां कने मेल जोल रख्खो, ते पवित्र जिन्दगी बिताणे री कोसीस करो, किजोकी तिसेरे बगैर कुसकी ने कदी भी परमेश्वर जो नी दिखणा।

2 पतरस 1:7

ते भक्ति पर भाईचारा बधांदे रेयो, ते भाईचारे पर प्यार भी बधांदे रेयो।

3 यूहन्ना 1:11

ओ मेरे प्यारे दोस्त, बुरे कम्म करणे वाले लोक्कां सांई नी पर भलाई रे कम्म करणे वाले लोक्कां सांई बणो। जां कोई भलाई रे कम्म करदा तां तिस कने पता चलदा कि से परमेश्वर रा बच्चा है। पर जां कोई बुरे कम्म करदा तां तिस कने पता चलदा कि से परमेश्वर जो नी जाणदा।