1 कुरुन्थियों 13:13 - चम्बयाली नौआ नियम

¹³ पर अवे ए त्रै तरिक्के री चीजां हिन जे असा जो करणा चाएदी। परमेश्वर बिच विश्वास रखणा, परमेश्वर रे वादेयां री आस रखणा ते सारेयां जो प्यार करणा। पर इन्हा त्रैन्नी चीजां बिच का परमेश्वर ते सारेयां जो प्यार करणा सबका जादा जरुरी है।

1 कुरुन्थियों 13:13 ပူးပေါင်းရင်းမြစ်များ

लूका 10:27

से बोलणा लगेया, कि तू परमेश्वर कने पूरे मन, पूरे प्राण ते सारी ताकत लाई करी ते अपणी सारी समझ कने प्यार करेयां, ते अपणे पड़ोसियाँ जो भी अप्पु बराबर प्यार करेयां

लूका 22:32

पर मैं तेरे तांइ परमेश्वर का प्रार्थना कित्ती कि तेरा विश्वास टुटी ना जाओ अते जां तू फिरी तौबा करी हटणा तेरे भरोसे जो दिख्खी करी तेरे संगी विश्वास भ्यालां रा भी होंसला होई जाओ।

रोमियों 15:13

मैं आस दैणे वाले परमेश्वर का प्रार्थना करदा, कि तुसा जो विश्वास करणे बिच पूरे तरिक्के खुसी ते सांती दे, ताकि पवित्रात्मा री ताकत कने तुसा री उम्मीद बदधी जाओ।

1 कुरुन्थियों 14:1

पूरे दिल कने इक्क-दूए कने प्यार बणाए रखणे री हर मुमकिन कोसीस करेया करो ते आत्मिक वरदान्नां री धुन बिच रेयो, खासतौर पर की भविष्यवाणी करेया करो।

1 कुरुन्थियों 16:14

ते जे किच्‍छ भी तुसा करदे हिन से प्यार कने करो।

1 कुरुन्थियों 3:14

ते जे कम्म तिस मणू ने तिस नीं पर कित्ते रा है, जे अगर से कम्म नी फुकिंदा, तां तिसजो ईनाम मिलणा।

1 कुरुन्थियों 8:1

तुसा अपणी चीठ्ठी बिच मेरे का मूर्तां जो भेंट चढ़ाए री रोट्टी रे बारे बिच पूच्छेया थिया। असा सारे ही इस मामले रे बारे बिच थोड़ा-मता जाणदे। पर ज्ञान असा जो घमंडी बणाई दिंदा, जदकी प्यार असा जो बाकि लोक्कां तांइ मददगार बणाई दिंदा।

1 कुरुन्थियों 8:3

परमेश्वर अपणे प्यार करणे वालेयां जो पैछाणदे।

2 कुरुन्थियों 5:10

किजोकी जरुरी है असा सारेयां रा हाल मसीह यीशु रे असा रा हिसाब-किताब करदे बेल्ले खुली जाए, की हर इक्क मणू अपणे भले-बुरें कम्मां रा बदला पाए जे तिन्हा ने सरीर रे जरिए कित्ते होण।

2 कुरुन्थियों 5:15

ते मसीह इधेरे तांइ सारेयां तांइ मरेया कि जे मणू जिन्दे हिन, से अग्गे जो अपणे तांइ ना जिन्दगी ना जीण पर तिन्हेरे तांइ जीण जे तिन्हेरे तांइ मरेया ते फिरी मरे रे लोक्कां बिच का जिन्दा होई गेया।

गलातियों 5:6

जां असी मसीह यीशु बिच विश्वास करणा सुरु करी दिंदे तां यहूदी या गैर यहूदी होणे रा कोई फरक नी रैहन्दा। पर जरुरी गल्ल ए है कि असी मसीह बिच विश्वास करदे ते तिस वजह कने परमेश्वर ते बाकि मणू प्यार रखदे।

फिलिप्पियों 1:9

मैं ए प्रार्थना करदा कि इक्क दूए तांइ तुसा रा प्यार बदधा जाए, ते जिन्दगी बिच सही चीजां जो चुनणे तांइ तुसा री ज्ञान ते सही ते गलत री समझ लगातार बदधी रेयो।

कुलुस्सियों 1:27

किजोकी परमेश्वर ने चाएया कि तिन्हेरे मणू जाणे कि मसीह री शोहरत ते महिमा गैर यहूदियां तांइ भी है, ते से राज़ मसीह है, जे तुसा बिच वास करदे जे असा री परमेश्वर री महिमा बिच हिस्सेदार बणने री आस है।

कुलुस्सियों 1:5

तुसा ए सब इधेरे तांइ करदे किजोकी तुसा रा विश्वास ते आस, तिन्हा चीजां पर आधारित है जे परमेश्वर ने तुसा तांइ स्वर्ग बिच संभाली करी रख्खे री है। तुसा जो तिसेरी उम्मीद तिस बेल्ले का थी जां तुसा पैल्ली वरी मसीह यीशु रा सुब बसेख सूणेया थिया, जे परमेश्वर रा सच्चा बसेख है।

कुलुस्सियों 3:14

सबका जादा जरुरी गल्ल ए है, कि तुसा इक्क-दूए कने भरपूर प्यार करो। इय्यां करणे कने तुसा पूरे तरिक्के कने इक्क-मन होई जाणा।

1 थिस्सलुनीकियों 1:3

जां असी पिता परमेश्वर का प्रार्थना करदे तां असी तुसा लोक्कां रे विश्वास रे हिसाब रे कम्मां जो, ते विश्वासी लोक्कां तांइ तुसा रे प्यार भरे कम्मां जो, ते मसीह यीशु रे हटणे री आस बिच मुसीबतां रे दौरान तुसा रे सबर रखणे जो भी याद करदे।

1 थिस्सलुनीकियों 5:8

ते जे असी दिन जदेय धार्मिकता रे मणू हिन, असा जो प्यार ते विश्वास जो अपणी रक्षा तांइ लैणी चाएदी, जिय्यां इक्क सिपाई अपणी रक्षा तांइ इक्क झीलम जो पांदा, ते इस आस रे टोप जो तिस सिपाई सांई पाई करी इस उम्मीद बिच चुकन्ने रैह्णा चाएदा कि असी हमेसा री सजा का बचाए गेरे हिन।

1 तीमुथियुस 1:5

ए हुकम दैणे रा मकसद ए है कि तुसा साफ मन, साफ विवेक अते सच्चे विश्वास कने इक्क-दूए कने प्यार करो।

2 तीमुथियुस 1:7

किजोकी परमेश्वर ने असा जो डरपोक नी बणाए रा है। बल्कि तिन्हेरा आत्‍मा असा जो आत्मिक ताकत दिंदा, ते असा जो दूए लोक्कां कने प्यार करणे बिच मदद करदा ते असा जो अप्पु पर काबू रखणे री ताकत दिंदा।

इब्रानियों 10:35

इधेरे तांइ अपणी हिम्मत ना छड्डो, किजोकी परमेश्वर ने तिन्हा सब चीजां रे बदले तुसा जो इक्क बड्डा ईनाम दैणा।

इब्रानियों 10:39

जे मणू परमेश्वर का पीच्छे हटी जांदे, तिन्हा जो परमेश्वर ने सजा दैणी, पर असा ने परमेश्वर बिच विश्वास करदे रैह्णा ते तिन्हा ने असा जो बचाणा।

इब्रानियों 6:11

आलसी मत बणो, पर मेहनती लोक्कां सांई बणो, तुसा जो सबर ते विश्वास कने, परमेश्वर रे वादे जो हासिल करणे री आस बिच, आखरी समय तिकर ए ठीक कम्म करदे रैह्णा चाएदा।

इब्रानियों 6:19

ए आस जे असा का है ते कदी भी टुटी नी सकदी, ते असा जो परमेश्वर का दुर भटकणे नी दिंदी, पर ए असा जो परमेश्वर का मन्दिर बिच, स्वर्ग अंदर, सबका जादा पवित्र जगाह् पर पुजांदा।

1 पतरस 1:21

मसीह यीशु ने जे असा तांइ कित्तेया तिसेरी वजह कने अवे तुसा परमेश्वर बिच विश्वास करदे। तिन्हा ने ही मसीह यीशु जो मुर्देयां बिच का फिरी जिन्दा कित्तेया ते तिन्हा जो महिमा दित्ती। इधेरे तांइ परमेश्वर बिच तुसा रा विश्वास ते आस अवे मजबूत है।

1 यूहन्ना 2:10

जे कोई अपणे संगी विश्वासी कने प्यार रखदा, से सच्चाई बिच जिन्दगी जिया करदा है, ते तिस बिच इदेय कोई गल्ल नी हुंदी जे दूए मणूआं तांइ पाप करणे री वजह बणे।

1 यूहन्ना 2:14

ओ बुजुर्ग लोक्कों, मैं तुसा जो इधेरे तांइ लिख्खेया कि जे सुरुआत का है तुसा तिसजो जाणी गेरे हिन, ओ जवानों, मैं तुसा जो इधेरे तांइ लिख्खेया करदा है कि तुसा ताकतवर हिन ते परमेश्वर रा वचन तुसा बिच बणी रैहन्दा, ते तुसा ने शैतान पर जीत हासिल कित्ते री है।

1 यूहन्ना 2:24

जे सच्चाई रा बसेख तुसा ने मसीह बिच विश्वास करणे री सुरुआत रे समय बिच सुणे रा थिया, जे अगर से तुसा बिच बणे रा रे तां तुसा भी पुत्तर बिच ते पिता परमेश्वर बिच बणे रैहन्गे।

1 यूहन्ना 3:3

हर कोई जे मसीह पर इदेयी आस रखदा, से अप्पु जो तिय्यां ही पवित्र रखदा, जिय्यां मसीह यीशु पवित्र है।

1 यूहन्ना 3:9

जे कोई परमेश्वर री औलाद हिन, से पाप करणा छड्डी दिंदा किजोकी परमेश्वर रा स्वभाव तिस मणू बिच बणी रैहन्दा, इधेरे तांइ से पाप नी करी सकदा, किजोकी से परमेश्वर रा पुत्तर है।