1 कुरुन्थियों 1:20 - चम्बयाली नौआ नियम

²⁰ तां फिरी अवे असी समजदार मणूआं रे बारे बिच कै बोल्ली सकदे? अवे असी यहूदी नियमां रे शास्त्रियां रे बारे बिच कै बोल्ली सकदे? ते अवे असी तिन्हा लोक्कां रे बारे बिच कै बोल्ली सकदे जे गल्ल-बात करणे बिच बड़े तेज हिन? परमेश्वर ने ए ज़ाहिर जताई दित्तां कि इस दुनिया री समझ रा कोई मुल्ल नी है।

1 कुरुन्थियों 1:20 ပူးပေါင်းရင်းမြစ်များ

मत्ती 13:22

जे भी झिल्लां बिच पेया थिया, ए से हिन, जे वचना जो सूणदे, पर इस दुनिया री फिकरां अते पैसेयां रा लालच वचनां जो दबी रखदा, अते से कामयाब नी हुन्दे।

यूहन्ना 12:31

अवे इस दुनिया रे लोक्कां रा हिसाब-किताब होणा, अवे इस दुनिया रा सरदार जे शैतान है, तिसजो कड्डी दित्तेया जाणा।

प्रेरितां रे कम्म 17:18

तां इपिकुरी ते स्तोईकी पणतां बिच का किन्ने तिस कने तर्क करणे लग्गे, ते कितणेयां ने बोल्लेया, ए अंट-शंट बोलणे वाला कै बोलणा चांदा? पर होरनियाँ ने बोल्लेया, से दूज्जे देवता रा प्रचारक लगदा, किजोकी ए यीशु रा, ते मरी करी फिरी जिन्दे होई जाणे रा सुब बसेख सुणांदा।

रोमियों 1:20

परमेश्वर री ताकत ते स्वभाव दिख्खे नी जाई सकदे, पर दुनिया रे रचणे री सुरुआत का ही, परमेश्वर ने अप्पु ही इन्हा सारे गुण जो अपणे कम्मां रे जरिये ही दिखाए रा है, इधेरे तांइ इन्हा लोक्कां का अपणे तांइ कोई बहान्ना नी है कि से परमेश्वर जो नी जाणदे।

रोमियों 1:22

से अपणे आप जो समजदार दस्सी करी बेवकूफ बणी गे,

1 कुरुन्थियों 1:19

किजोकी पवित्रशास्त्र बिच परमेश्वर ने बोल्ले रा है, “मैं ज्ञानी मणूआं रे ज्ञान जो नास करणा, अते समजदारां री समझ जो घटिया करी दैणा।”

1 कुरुन्थियों 1:26

ओ संगी विश्वासियों, इसका पैल्ले कि परमेश्वर ने तुसा जो अपणे मणू बणने तांइ सद्देया थिया, जरा सोच्चो कि तुसा तिस बेल्ले कदेय थिये। इन्सानी तौर पर ता तुसा बिच जादातर मणू ना ता बड़े ज्ञानी थिये, ते ना ही ताकतवर थिये ते ना ही तुसा कुसकी बड्डे ‍खानदान का थिये।

1 कुरुन्थियों 1:27

पर परमेश्वर ने तिन्हा लोक्कां जो चुणी लित्तेया जिन्हा जो दुनिया रे मणू बेवकूफ समजदे, ताकि परमेश्वर तिन्हा लोक्कां जो शर्मिंदा करण जे अप्पु जो समजदार मनदे।

1 कुरुन्थियों 1:28

अते परमेश्वर ने तिन्हा लोक्कां जो चुणेया जिन्हा कने मणू नफरत करदे थिये ते जिन्हा जो मणू तुच्छ, नीच ते किच्‍छ भी नी समजदे थिये, ते परमेश्वर ने तिन्हा लोक्कां जो तिस सोच जो तोड़ने तांइ इस्तेमाल कित्तेया जिस जो दुनिया खास समझदी।

1 कुरुन्थियों 11:32

पर प्रभु असा जो सजा देई करी असा जो अनुशासित करदे ताकि आखरी बिच असा जो दुनिया कने गुनेह्गार ना ठैहराण।

1 कुरुन्थियों 2:6

फिरी भी असी पक्के विश्वासियां रे बिच ज्ञान री गल्लां सुणान्दे हिन, पर ए ज्ञान कोई दुनियावी ज्ञान नी है ते ना ही इस जुग रे प्रधान लोक्कां रे ज्ञान जदेया है जे इक्क दिन नास होई जाणा।

1 कुरुन्थियों 2:8

परमेश्वर री योजना रे तिस ज्ञान जो इस जुग रे प्रधान लोक्कां बिच का कुसकी ने भी नी समजेया थिया। जे अगर से समजी गेरे हुंदे तां महिमा रे प्रभु मसीह यीशु जो सुली पर नी चढ़ांदे।

1 कुरुन्थियों 3:18

जे अगर तुसा बिच कोई अप्पु जो इस जुग रे लोक्कां री नजर बिच अप्पु जो समजदार समजे तां अप्पु जो इस जमाने रे लोक्कां री नजर बिच बेवकूफ भी समजे ताकि तुसा परमेश्वर री नजर बिच भी समजदार बणो।

1 कुरुन्थियों 3:19

किजोकी परमेश्वर री नजर बिच इन्सानी ज्ञान बेवकूफी है, जिय्यां कि पवित्रशास्त्र बिच लिख्खे रा है, “से ही (परमेश्वर) है, जे ज्ञानी मणूआं जो तिन्हेरी चलाकी बिच फसाई दिंदा,”

1 कुरुन्थियों 6:2

तुसा जो पता ही है कि परमेश्वर रे लोक्कां ने दुनिया रे लोक्कां रा हिसाब-किताब करणा। इधेरे तांइ तुसा हल्की का हल्की लड़ाई रा हिसाब-किताब करणे रे जोग्गे हिन।

याकूब 4:4

ओ बेईमान लोक्कों, तुसा जाणदे कि दुनिया री चीजां कने प्यार रखणा परमेश्वर कने नफरत करणा है। अते जे दुनिया रा दोस्त होणा चाह्‍ंदा, से अपणे आप जो परमेश्वर रा दुश्मण बणादां