সফনিয় 1:18 - Chakma Bible

¹⁸ লগেপ্রভুর রাগর্ দিন্নোত্ তারার সনা-রূবোনিয়ো তারারে বাঁজেই ন-পারিবো। তা রিবেঙর্ জ্বালার্ আগুনে বেক্ দুনিয়েগান পুড়ি যেবঅ, কিত্যে পিত্‌‌‌‌‌থিমীত্ বজত্তি গুরিয়্যে বেক্কুনোরে তে ঝিমিদোত্ শেজ্ গুরি দিবো, অয়, জদবদে শেজ্ গুরি দিবো।

সফনিয় 1:18 ပူးပေါင်းရင်းမြစ်များ

১ রাজাবলী 14:22

লগেপ্রভুর চোগেন্দি যিয়েন্‌ ভান্ন্যেই যিহূদার মানুচ্চুনে সিয়েন গরা ধুরিলাক্‌। তারার্‌ পূরোণি মানুচ্চুনোত্তুন্‌ বেশ্‌ তারার্‌ পাপর্‌ মাধ্যমে তারা লগেপ্রভুর মনর্‌ জ্বালা আরঅ বেশ্‌ গুরিনে বাড়েই দুয়োন্‌।

ইয়োব 21:30

শদান্‌ মান্‌জ্যে দযাত্ পড়িলে রেহাই পান আর রাগ্ উদিলে রোক্ষ্যে পান্?

ইয়োব 3:15

মুই সে শাজন্‌গুরিয়্যেগুনো সমারে থেদুঙ্‌ যিগুনোর বোউত্‌ সনা এলঅ, যিগুনে রুবোলোই ঘরানি ভোরেই রাগেদাক্‌।

গীতসংহিতা 78:58

তারা মুড়ো উগুরে ডালিবাজা দিইনে তারে অখুজি গোজ্যন্; বানেয়্যে মুত্তি পূজো গুরিনে তা পাইদে ভক্তির আওজ্‌ছান বাড়েই দুয়োন।

গীতসংহিতা 79:5

ও লগেপ্রভু, আর কয়দিন? তুই কি জিংকানিবর্ বেজার ওই থেবে? আর কয়দিন তর্ পাইদ্যে ভোক্তি ন-পানার জ্বালা আগুনো ধোক্ক্যেন জুলিবো?

গম্ উপদেজ্ 11:4

যেদিন্যে গোজেন রাগ্‌কান লামি এবঅ সেদিন্যে ধন কনঅ কামত্ ন-লাগিবো, মাত্তর্ গোজেন উগুরে ভোক্তিগানে মরণত্তুণ্ রোক্ক্যে গুরিবো।

গম্ উপদেজ্ 18:11

তাগোয়্যেগুনোর ধন তারার দেবাল্-ঘিজ্যে শঅর; তারার ধনানরে তারা মনে গরন্ রোক্ষ্যেগুরিয়্যে দেবাল্।

যিশাইয় 1:24

সেনত্তে বেগত্তুন্ খেমতাবলা প্রভু লগেপ্রভু, ইস্রায়েলর্ সেই খেমতাবলা গোজেনে কোইয়্যেদে, “আহ্, মর্ বিপক্ষগুনো আঢত্তুন্ মুই রেহাই পেইম্ আর মঅ শত্রুগুনো উগুরে হেনা উগুরেম্।

যিশাইয় 10:17

ইস্রায়েল পহ্‌রান অবঅ আগুনো ধোক্ক্যেন্; তারার্ পবিত্র মানুচ্চো অবঅ এক্কান্ জিলো ধোক্ক্যেন্। সেই আগুনানে একদিনে তার বেক্ কাদা ঝুব্‌‌‌‌‌পুন আর কাদাগাজ্‌‌‌‌‌চুন পুড়ি ফেলেব।‌

যিশাইয় 10:3

সাজা পেবার্ দিনুনোত্ যেক্কে দূরোত্তুন্ দজা এবঅ সেক্কে তুমি কি গুরিবা? বল্ পেবাত্তে কাইদু দাবা যেবা? তমা ধন-সোম্বোত্তিগানি কুদু থোই যেবা?

যিরমিয় 7:20

সেনত্তে প্রভু লগেপ্রভু কোইয়্যেদে, “মর্ বেজার্ অনা আর রাগ এ জাগায়ান উগুরে, মানুচ্ আর এ্যামানুনো উগুরে, মাদর্ গাজপালা আর মাদি উগুরে গুলোগুলি উগুরে ঢালা অবঅ, আর সেই রাগ্‌কান জুলিবো, ন-মুরিবো।”

যিরমিয় 7:34

মুই যিহূদার শঅরানিত্ আর যিহূদার বেক্ পধে পধে হুজি আর ফুত্তির্ রঅ আর নেগ-মোগোর মুয়োর রঅ বন্ধ গুরি দিম, কিত্তে দেজ্‌চান ভস্তর জাগা ওই যেবঅ।” ‌‌‌‍

যিরমিয় 9:11

লগেপ্রভু কোইয়্যেদে, “মুই যিরূশালেমানরে এক্কান ভস্তর কুড়্ আর শিয়েলর থেবার জাগা বানেম। মুই যিহূদার শঅরানিরে এমন ভস্তর জাগা বানেম, সিয়েনত্ আর কনজনে বজত্তি গুরি ন-পারিবাক্।”

যিহিষ্কেল 16:38

যে মিলেগুনে ব্যভিচের্ গরন আর যিগুনে লো ঝরান্ তারারে যে সাজাগান দিয়্যে অয় সেই সাজাগান মুই তরে দিম। মর্ রাগে আর মনর্ জ্বালাত্তে মুই তরে মরণর্ সাজা দিম।

যিহিষ্কেল 23:25

মর্ মনর্ জ্বালা মুই তঅ বিরুদ্ধে কামত্ লাগেম বিলিনে তারা অমকদ রাগ গুরিনে তল্লোই বেবহার গুরিবাক্। তারা তর্ নাগ-কান কাবি দিবাক্ আর তর্ বাদবাগি মানুচ্চুনোরে মারে ফেলেবাক্। তারা তঅ ঝি-পুয়োগুনোরে নেযেবাক্, আর তর্ বাদবাগি মানুচ্চুন আগুনোত্ পুড়ি মুরিবাক্।

যিহিষ্কেল 7:11

অত্যেচারর্ লুদিক্কোই অন্যেয়গুরিয়্যেগুনোরে সাজা দিয়্যে অবঅ। তারা জনেদি ভালোক্কুন্ অলেয়ো কনজন ন-থেবাক্, তারার্ ধন-সম্পদ বা বাঈনী গরানা কিচ্চু ন-থেবঅ।

যিহিষ্কেল 7:19

তারার্ রূবোনি তারা পধে পধে ফেলেই দিবাক্ আর তারার্ সোনানি অবঅ এক্কান অসিজি জিনিস। লগেপ্রভুর রাগ দিনোত্ তারার্ সোনা-রূবোনিয়ে তারারে রোক্ষ্যে গুরি ন-পারিবো। সিয়েনিলোই তারার্ পেট্‌পরা ন-মিটেব আর পেট্ ন-ভুরিবো। আজলে সিয়েনিয়ে তারারে পাপত্ ফেলেয়্যে।

যিহিষ্কেল 7:5

প্রভু লগেপ্রভু কোইয়্যেদে, দযা! এক্কান দাঙর্ দযা এজের্!

সফনিয় 1:11

ও মক্তেশর আদাম্মেগুন, তুমি আবিলেচ্ গরঅ, কিত্যেই তমার্ বেক বেবসায়ীগুনোরে আর টেঙা-পোইজ্যে লেনদেনগুরিয়্যেগুনোরে ফুজি ফেলা অবঅ।

সফনিয় 1:15

সেদিন্নো অবঅ রাগর্ দিন, অমকদ দুদ্দশা আর মনত্ দুঘো দিন, দযা আর ভস্ত অনার্ দিন, ঘুর্‌‌‌ঘুজ্যে আন্ধারর দিন, মেঘ আর ঘুর্‌‌‌ঘুজ্যে আন্ধারর্ দিন।

সফনিয় 2:2

সেই দিন্নো তুষো ধোক্ক্যেন উড়ি এজের্; সেনত্তে ঠিগ্ গোজ্যে সময়ান এবার্ আগেদি, লগেপ্রভুর জ্বোল্‌জোল্যে রাগ্‌কান তমা উগুরে এবার্ আগেদি, তার্ অমকদ অহুজিগান তমা উগুরে পড়িবার আগেদি তুমি একসমারে থুবো।

সফনিয় 3:8

“ও যিরূশালেম, তুই মত্তে বাজ্জেই থাগ্; যেদিন্যে মুই জাদ্‌‌‌‌তুনো বিরুদ্ধে সাক্ষি দিবাত্তে থিয়্যেম্ তুই সেদিন্নোত্তে বাজ্জেই থাগ্। মুই ঠিগ্ গোজ্যংগে, জাদ্‌তুনোরে মুই এগত্তর্ গুরিম, রেজ্যগানি এগত্তর্ গুরিম আর তারা উগুরে মর্ অমকদ অহুজিগান, মর্ জ্বোল্‌‌‌‌‌জোল্যে রাগ্‌‌‌‌‌কান ঢালি দিম। মর্ মনর্ জ্বালার্ আগুনে গোদা পিত্‌‌‌‌থিমীগান পুড়ি যেবঅ। গোটা জগৎতান্ পুড়ি যেবঅ।

মথি লেখ্যে গম্ হবর্ 16:26

যুনি তুই পুরো পিত্‌থিমীগান পেইনেয়ো সিয়েনর বদলে আজল্ জিংকানিগান্ আরাস্ সালে সিয়েনর্ কি লাভ্ অলঅ? নিশ্চই নয়! সালে কেধোক্ক্যেন গুরি এক্কো মান্‌জ্যে তা জিংকানিগান ফিরি পেবঅ?

১ করিন্হীয় 10:22

ইয়েন গুরিনে কি আমি ঘেচ্চ্যেকগুরি প্রভুর মনর্ জ্বালা জাগেই তুলিবাত্তে চেইর্? আমি কি তাত্তুন্ বেশ্ খেমতাবলা?

দ্বি’লম্বর বিররণ 31:17

যেদিন্যে তারা সিয়েন গুরিবাক সেদিন্যে রাগে মুই তারারে ছাড়ি দিম্‌। মুই তারাত্তুন মর্‌ মুয়োন ফিরেই নেযেম্‌ আর্‌ তারা ভস্ত ওই যেবাক। সেক্কে তারা উগুরে নানান্‌ দযা আর দুখ্‌-কট্টনি লামি এবঅ। সেদিন্যে তারা কবাক্কে, আমার গোজেন আমা সমারে নেই বিলিনেই আমা উগুরে এ বেক্‌ দজাগানি এস্যে।