রোমীয় 8:39 - Chakma Bible

³⁹ বা আগাজ উগুরে বা পিত্‌থিমী তলেদি কনঅ কিজু, এন্‌ কি, গোদা সৃট্টিগুনো ভিদিরে কনঅ পৌইদ্যেনে গোজেনর্ কোচ্‌পানাত্তুন্ আমারে দূরোত্ সোরেই দি ন-পারিবো। গোজেনর্ এই কোচ্‌পানা আমা প্রভু যীশু খ্রীষ্ট ভিদিরে আঘে।

রোমীয় 8:39 ပူးပေါင်းရင်းမြစ်များ

গীতসংহিতা 64:6

তারা অন্যেয় গুরিবার ফন্দি গুরিনে কন্দে, “আমি চেরোকিত্তে চিন্তে গুরিনে এক্কান সল্লা গোজ্যেই।” ঘেচ্চেকগুরি মান্‌জ্যর্ মনানি আর মনর্ ভিদিরেগান তোগেইনে পাহ্ ন-যায়।

গম্ উপদেজ্ 20:5

মান্‌জ্যর মন আজাগান মাদিত্ তলে থেইয়্যে পানি ধোক্ক্যেন্, মাত্তর্ বুদ্ধিবলা মান্‌জ্যে সিয়েন তুলি আনে।

পরমগীত 3:4

তারারে ফেলেইনে উজেই যাদে মুই মর্ পরাণর্ কোচ্‌পানাগানরে দেগিলুং। তারে ধুরিনে মর্ মাবো ঘরত্ ন-আনানা সং মুই তারে ন-ছাড়িলুং; যিবে মরে পেদত্ রাগেয়্যে মুই তা ঘরত্ তারে আনিলুং। ‌‌‌‌‌‌‌‌‌

যিশাইয় 10:33

চঅ, বেগত্তুন্ খেমতাবলা গোজেন প্রভু লগেপ্রভু দাঙর্ খেমতালোই ডেলাগুন্ ভাঙি ফেলেব। অজল্ অজল্ গাজ্‌চুন কাবি ফেলা অবঅ; সিগুন মাঢিত্ পড়িবাক্।

যিশাইয় 24:21

সেদিন্যে লগেপ্রভু আগাজ উগুরে বেগত্তুন্ খেমতাবলাগুনোরে সাজা দিবো, আর পিত্‌থিমীত্ রাজাগুনোরে সাজা দিবো।‌‌

দানিয়েল 4:11

গাজ্‌‌‌চো বাড়ি উদিনে দাঙর্ আর দরমর অলঅ আর তা মাঢাবো যেইনে আগাজত্ লুমিলো; পিত্‌‌‌থিমীর শেজ্ দুযিত্তুন্‌অ গাজ্‌‌‌চোরে দেগা যার্।

মথি লেখ্যে গম্ হবর্ 24:24

সেনত্যে সেক্কে বোউত্ ফক্কর্ মশীহ আর ফক্কর্ ভাববাদী এবাক্ আর আমক্ অবার্ চিহ্নো কাম্ গুরিবাক্ যেন সম্ভব অলে গোজেনর্ বেঈ লোইয়্যে মানুচ্চুনোরেয়ো তারা ঠোগেই পারন্।

যোহন 16:27

বাবা নিজে দঅ তমারে কোচ্‌পায়, কিয়া তুমি মরে কোচ্‌পেইয়ো আর বিশ্বেজ্ গোজ্য যে, মুই বাবা গোজেনত্তুন্ এচ্চ্যং।

যোহন 17:26

মুই তারা ইধু তরে ফগদাং গোজ্যং আহ্ আরঅ ফগদাং গুরিম্, যেন তুই মরে যেধোক্ক্যেন্ কোচ্‌পাচ্ সেধোক্ক্যেন্ কোচ্‌পানা তারা মনত্ থায়, আর মুই যেন তারা সমারে এগত্তর্ থাং।”

যোহন 3:16

“গোজেনে মান্‌জ্যরে এদক্ কোচ্‌পেলদে যে, তার্ বানা এক্কোগুরি পুয়োরে তে দান্ গুরিলো, যেন যে কেঅ সেই পুয়োবো উগুরে বিশ্বেজ্ গরে তে ভস্ত ন-অয় মাত্তর্ উমর্‌অ জিংকানি পায়।

রোমীয় 1:7

রোম শঅরর্ যে মানুচ্চুনোরে গোজেনে কোচ্‌পায় আর তার্ নিজো মানুচ্‌ অবাত্যে ডাক্ক্যে তারা বেক্কুনো ইধু, অত্তাৎ তমা ইধু মুই এ চিধিগান লেগঙর্। আমা বাবা গোজেনে আর প্রভু যীশু খ্রীষ্ট তমারে বর্ দুয়োক্ আর সুগ্-শান্তি দান গোরোক্।

রোমীয় 11:33

গোজেনর্ ধন ন-পুরেইয়্যে। তার্ জ্ঞান আর বুদ্ধি কত্তমান্ গভীন্! তার্ বিচের্ আর তার্ বেক্ কামানি বুঝোনা অসম্ভব।

রোমীয় 5:8

মাত্তর্ গোজেনে যে আমারে কোচ্‌পায় সিয়েনর্ প্রমাণ্ ইয়েন্, আমি পাপী থাগদে খ্রীষ্ট আমাত্যে পরাণান্ দিয়্যে।

রোমীয় 6:23

পাপ্‌পানে যে বেতন দে সিয়েন মরণ্, মাত্তর্ গোজেনে যিয়েন দান গরে সিয়েন আমা প্রভু যীশু খ্রীষ্টর্ মাধ্যমে উমর্ জিংকানি।

রোমীয় 8:1

যিগুনে খ্রীষ্ট যীশু সমারে মিজেয়োন্ গোজেনে তারারে আর সাজা দেদে ধোক্ক্যেন্ মনে ন-গুরিবো।

রোমীয় 8:35

সেনত্তে এমন্‌ কি আঘে যিয়েনে খ্রীষ্টর্ কোচ্‌পানাত্তুন্ আমারে দূরোত্ সোরেই দিবো? যন্ত্রণা? মনত্ দুঘ্? অত্যেচার্? পেত্‌ পুরোনা? কাবড়-চুগোড়োর্ অভাব? দযা? মরণ?

২ করিন্হীয় 11:3

মাত্তর্ মর্ দর্ লাগেত্যে, সেই সাপ্পো তার্ পাজি বুদ্ধি খাদেইনে যেধোক্ক্যেন্ গুরি হবারে ভুলেয়্যে সেধোক্ক্যেন গুরি খ্রীষ্ট উগুরে খাটি আর মন ভোক্তিত্তুন্ কেঅ অয়ত তমারেয়ো ভুলেইনে নেযেব।

২ করিন্হীয় 2:11

যেন শদানে আমা উগুরে কনঅ সুযোগ-সুবিধে ন-পায়। তার্ ফন্দির্ কধা দঅ আমার্ অজানা নয়।

ইফিষীয় 1:4

আমি যেনে গোজেন চোগেদি পবিত্র আর গম্ ওই পারিই সেনত্যে গোজেনে জগদ্‌‌‌তান বানেবার্ আগেদি খ্রীষ্টর্ মাধ্যমে আমারে বেঈ লোইয়্যে। তার্ কোচ্‌পানাত্যে তে হুজী ওইনে নিজোর্ আয়োজে আগে ধুরি ঠিগ গোজ্জ্যেদে, যীশু খ্রীষ্টর্ মাধ্যমে তার্ পুয়ো ইজেবে তে আমারে মানি লবঅ।

ফিলিপীয় 3:12

মুই যিয়েনত্যে চেষ্টা গরঙর্ সিয়েন ইক্কিনে যে পেইয়োং বা পুরণ ওইয়্যে এমন্‌ নয়। মাত্তর্ যিয়েনত্যে খ্রীষ্ট যীশু মরে ধোজ্জ্যে সিয়েন ধুরিবাত্যে মুই ধাবা দোঙর্।

ফিলিপীয় 3:3

আমি ঘেচ্চ্যেকগুরি চুনু মাঢবোর চামান কাপ্যে মানুচ্‌, কিয়া আমি গোজেন আত্মার্ মাধ্যমে তার্ উবোসনা গুরিই আর খ্রীষ্ট যীশুরে নিইনে বার্ গুরিই আর চুনু মাঢা কাপ্যে উগুরে নির্ভর ন-গুরিই।

ফিলিপীয় 3:8

আসলে যাত্যে মুই এদক্কানি ক্ষতি স্বীগের্ গোজ্জ্যং মর্ সেই প্রভু খ্রীষ্ট যীশুরে জানানা ভিদিরে যে অাশিদ্‌বাদ্‌তান আঘে, তা কায়কুরে আর বেক্কানিরে মুই ক্ষতি বিলিনে মনে গরং। খ্রীষ্টরে যেন মুই পেই পারং আর মরে যেন খ্রীষ্ট সমারে এগত্তর্ দেগা যায়, সেনত্যে মুই সিয়েনিরে কাজর্ বিলিনে মনে গরং। আইন-কানুন্ পালন গরানাত্যে যে মুই নিদ্দুজি সিয়েন নয়, মাত্তর্ খ্রীষ্ট উগুরে বিশ্বেজর্ কারনে গোজেনে মরে নিদ্দুজি ইজেবে মানি লোইয়্যে। এ নিদ্দুজিগান গোজেনত্তুন্ এজে আর সিয়েন বিশ্বেজ্ উগুরে নির্ভর গরে।

২ থিষলনীকীয় 2:4

গোজেন বিলিনে যিয়েনি আঘে সিয়েনি বেক্কানির্ বিরুদ্ধে আর উবোসনা গরেদে ধোক্ক্যেন বেক্কানির্ বিরুদ্ধে থিয়্যেইনে তে নিজোরে দাঙর্ গুরি দেগেব; এমন্‌ কি, তে গোজেনর্ উবোসনা-ঘরত্ বৈইনে নিজোরে গোজেন বিলিনে দাবী গুরিবো।

১ যোহন 4:16

আমি কোই পারিই গোজেনে আমারে কোচ্‌পায়, আর তা কোচ্‌পানাগান উগুরে আমার বিশ্বেজ্ আঘে। গোজেনে নিজেই কোচ্‌পানা। কোচ্‌পানা সমারে যে থেবঅ তে গোজেন সমারে থায় আর গোজেনে তা সমারে থায়।

১ যোহন 4:19

তে পত্তমে আমারে কোচ্‌পেইয়্যে বিলিনে আমি কোচ্‌পেই।

ফগদাং পেইয়্যে 12:9

সেক্কে সেই দাঙর্ দানপ্পোরে আর তা সমারে তা দুত্‌তুনোরে পিত্‌থিমীত ফেলেই দিয়্যে অলঅ। এই দানপ্পো অলঅ সেই পুরোনা সাব্‌পো যিবেরে দিয়াবল বা শদান্ কুয়ো অয়। তে পিথ্‌তিমীর্ বেক্‌ মানুচ্চুনোরে ভুল্ পধেদি নেযায়।

ফগদাং পেইয়্যে 13:14

সেই পত্তম য়েমান্নোর্ ওইনে যেদক্কানি আমক্ কাম গুরিবাত্যে তারে খেমতা দিয়্যে ওইয়্যে তে সিয়েনি গুরিনে মানুচ্চুনোরে ভুল্ পধেদি নেযা ধুরিলো। পত্তম যে য়েমান্নো ছুড়ির্ আঘাত্ পেইনেয়ো বাঁজি এলঅ, দ্বিলম্বর য়েমান্নোয়ো মানুচ্চুনোরে কলঅ যেন তারা তার্ এক্কো মূত্তি বানান্।

ফগদাং পেইয়্যে 19:20

সেই য়েমান্নোরে ধরা অলঅ আর যে ফক্কর্ ভাববাদীবো তার্ ওইনে আমক্ কাম গত্ত তারেয়ো ধরা অলঅ। যিগুনে সেই য়েমান্নোর্ চিহ্নোগান মানি লোইয়োন আর তা মূত্তিবোর পূজো গুরিদাক্ সেই ভন্ড ভাববাদীবো সেই আমক্ কামানিলোই তারারে ভুলেই রাগেয়্যে। জ্বোল্‌‌‌জোল্যে গন্ধক আগুনো হ্রদত্ জেদাবাদে এ দ্বিজনরে ফেলেই দিয়্যে অলঅ।

ফগদাং পেইয়্যে 2:24

ও থুয়াতীরার মানুচ্চুন্, তুমি যিগুনে সেই শিক্ষ্যে মজিম ন-চলঅ আর যিবেরে শদানর্ সেই গভিন্ শিক্ষ্যে কুয়ো অয় সিয়েন কোই ন-পারঅ, তমারে মুই কঙর্: তমা উগুরে মুই অন্য কনঅ ভার্ ন-দিম।

ফগদাং পেইয়্যে 20:7

সেই আজার বজর্ থুম্ ওই গেলে পরেদি শদানরে তার্ জেলখানাত্তুন্ ইরি দিয়্যে অবঅ।