ফগদাং পেইয়্যে 11:18 - Chakma Bible

¹⁸ বেক্‌ জাদ্‌তুনে রাগ গোজ্জ্যন্, আর তর্ রাগ ফগদাং গুরিবার সময় ওইয়্যে। মরাগুনোরে বিচের্ গুরিবার সময় এচ্চ্যে, আর তর্ চাগরুনোর্, অত্তাৎ ভাববাদীগুনোর আর তঅ মানুচ্চুনোর আর চিগোন-দাঙর্ যিগুনে তরে ভোক্তি গরন্ তারারে বক্‌শিজ্ দিবার সময় এচ্চ্যে। ইয়েনিবাদে যিগুনে পিত্‌থিমীর ক্ষোতি গোজ্জ্যন্, সিগুনোরে ভস্ত গুরিবার সময় এচ্চ্যে।”

ফগদাং পেইয়্যে 11:18 ပူးပေါင်းရင်းမြစ်များ

গীতসংহিতা 103:11

পিত্‌থিমীত্তুন দেবাবো কুদ্দুর্ যেধোক্ক্যেন দুযি নেই, সেধোক্ক্যেন তা ভক্তগুনো উগুরে তার্ অমকদ কোচ্‌পানার্‌অ দুযি নেই।

গীতসংহিতা 110:5

প্রভু তঅ ডেন্ ডাগেন্দি আঘে; তার্ রাগ উদিলে তে রাজাগুনোরে শেজ্ গুরি ফেলেব।

গীতসংহিতা 147:11

মাত্তর্ যিগুনে তারে ভোক্তিগুরি দরান্ আর তার অমকদ কোচ্‌পানা উগুরে আজা রাগান্, তারারে নিইনে লগেপ্রভুর যেত্তমান্ হুজি।

গীতসংহিতা 2:5

তে অমকদ বেজার্ ওইনে তারারে থেঝেরা মারিবো, তা রাগর্ আগুনান্ তারার্ মনত্ দর্‌বুগ্ লাগেব।

গীতসংহিতা 85:9

যিগুনে তারে ভোক্তি গরন ঘেচ্চেক্‌গুরি তার উদ্ধোর্ গুরিবার অক্তবো তারা ইদু এচ্চ্যে; সেক্কে তা মহিমাগান আমা দেজত্ বজত্তি গুরিবো।

উপদেশক 12:13

ইক্কিনে বেক্কানি দঅ শুনো অলঅ; মাত্তর্ শেজ্ কধাগান্ ইয়েন্, গোজেনরে ভোক্তিগুরিনে দোরেবার্ আর তা উগুমানি পালানার্ মাধ্যমে মান্‌জ্যর্ বেক কামানি পালা অয়।

উপদেশক 8:12

পাপী মান্‌জ্যে যুনিয়ো একশত্তান্ ভান্ন্যেই কাম্ গুরিনে ভালোক্ দিন বাঁজি থায় তো মুই হবর্ পাং গোজেনরে যিগুনে ভোক্তিগুরিনে দরান্ তারার্ ভালেদি অবঅ।

দানিয়েল 11:44

মাত্তর্ পূগেদি আর উত্তরেদি হবর্ পেইনে তে দোরেব আর অমকদ রাগে ভস্ত গুরিবাত্তে আর ভালোক্ জনরে মারে ফেলেবাত্তে তে নিগিলিবো।

দানিয়েল 7:26

মাত্তর্ পরেদি তার বিচের্ গরা অবঅ আর তার্ খেমতাগান তাত্তুন্ নেযা অবঅ, আর সিয়েন উমরত্তে পুরোপুরি ভস্ত গরা অবঅ।

দানিয়েল 8:25

তার চালাগিত্তে তে ছলনা গুরিনে সফলতা লাভ গুরিবো আর নিজোরে বেগত্তুন্ দাঙর্ মনে গুরিবো। মান্‌‌জ্যে যেক্কে নিজোরে নিরাপদ মনে গুরিবাক্ সেক্কে তে ভালোক্কুনোরে ভস্ত গুরিবো আর শাজন্‌গুরিয়্যেগুনোর আজল্লো বিরুদ্ধে থিয়্যেব। যেরেদি তে ভস্ত অবঅ, মাত্তর্ মান্‌‌জ্যর বল্লোই নয়।

মথি লেখ্যে গম্ হবর্ 5:12

তুমি ফুত্তি গরঅ আর হুজি ওইয়ো, কিয়া স্বর্গত্ তমাত্তে দাঙর্ বক্‌‌শিজ্ আঘে। তমা আগেদি যে ভাববাদীগুন এলাক্ মান্‌‌জ্যে তারারেয়ো এবাবোত্যেগুরি অত্যেচার্ গুরিদাক্।

লূকে লেখ্যে গম্ হবর্ 1:50

যিগুনে তারে ভোক্তি গরন্ তারা উগুরে তে দোয়্যে গরে, গুট্টির্ পর্ গুট্টি ধুরি গরে।

ইব্রীয় 9:27

গোজেনে ঠিগ্ গুরি থোইয়্যেদে যে, পত্তি মানুচ্‌ একবার্ মুরিবো আর সে পরেদি তার্ বিচের্ অবঅ।

ফগদাং পেইয়্যে 10:7

মাত্তর্ সাত-লম্বর স্বর্গদূত্‌তো তা তূরীবো বাজেবার দিনোত্ গোজেনর্ গুমুরো উদ্দেচ্চ্যগান পরিপূরোণ অবঅ। গোজেনে তা নিজো চাগরুনো ইধু, অত্তাৎ ভাববাদীগুনো ইধু যিয়েনি জানেয়্যে ঠিগ্ সেবাবোত্যে গুরি ইয়েনি অবঅ।”

ফগদাং পেইয়্যে 11:2

মাত্তর্ উবোসনা-ঘরর্ বারেদি যে উদোনান্ আঘে সিয়েন বাদ দিচ্‌, ন-মাবিচ্; কিয়া সিয়েন অযিহূদীগুনোরে দিয়্যে ওইয়্যে। তারা বিয়াল্লিশ্ মাস সং পবিত্র শঅরান টেঙোই উরিবাক্।

ফগদাং পেইয়্যে 13:10

যিবের বন্দী অবার্ কধা আঘে তে বন্দী অবঅ। যিবের ছুড়িলোই খুন অবার কধা আঘে তে খুন অবঅ। ইয়েনত্যে গোজেন মানুচ্চুনোর ধৈজ্জ্য আর বিশ্বেজর্ দরকার।

ফগদাং পেইয়্যে 13:16

তে চিগোন-দাঙর্, থাগোইয়্যে-নাঢা, গিরোজ্ আর চাগর্, বেক্কুনোরে ডেন্ আঢত্ বা কবাল উগুরে এক্কান চিহ্নো মানি লবাত্যে বাধ্য গুরিলো।

ফগদাং পেইয়্যে 14:10

সালে তাত্তুন্ গোজেনর্ রাগর্ মদ হা পড়িবো। এই মদ সমারে পানি ন-মিজেইনে গোজেনর্ রাগর্ গলজত্ ঢালি দিয়্যে ওইয়্যে। পবিত্র স্বর্গদুত্‌তুনোর্ আর ভেড়া-ছবোর্ মুজুঙোত্ আগুন আর গন্ধক্‌কোই সেই মানুচ্চোরে যস্ত্রণা দিয়্যে অবঅ।

ফগদাং পেইয়্যে 15:1

যেরেদি মুই স্বর্গত্ আর এক্কান দাঙর্ আর আমক্ অবার্ চিহ্নো দেগিলুং। দেগিলুং, সাতজন স্বর্গদূত আর তারার্ আঢত্ শেজর্ সাত্‌তান আঘাত। ইয়েনিরে শেজর্ আঘাত কুয়ো অর্ কিয়া ইয়েনিলোই গোজেনর্ রাগর্‌অ থুম্ অবঅ।

ফগদাং পেইয়্যে 15:7

সেই চের্‌জন জেদা পরাণবলাগুনোর্ একজন সেই সাতজন স্বর্গদূতোরে সাত্‌টো সনার কদরা দিলো। গোজেন, যিবে যুগ যুগ ধুরিনে উমর্ সং জেদা আঘে, সেই কদরাগুন তার রাগে ভরা এলঅ।

ফগদাং পেইয়্যে 18:6

তে অন্যগুনো সমারে যেবাবোত্যে বেবহার গোজ্জ্যে তা সমারেয়ো সেবাবোত্যে বেবহার গর্; তা কামানির্ পুরোপুরি ফল তারে দে। যে গলজ ভিদিরে তে অন্যগুনোত্যে ভান্ন্যেই মিজেদ, সিয়েনত্ তার পুরোপুরি সাজা মিজেইনে তারে হেবাত্যে দে।

ফগদাং পেইয়্যে 19:15

তে যেন বেক্‌ জাদ্‌‌তুনোরে আঘাত্ গুরি পারে সেনত্যে তা মুয়োত্তুন্ এক্কান ধারেয়্যে ছুরি নিগিলি এজের্। তে লুয়োর্ লুদিক্কোই বেক্‌ জাদ্‌‌তুনোরে শাসন গুরিবো আর আঙ্গুর মাড়িবার গাঢত্ তে আঙ্গুর টেঙোই মাড়িবো। এই আঙ্গুর মাড়িবার গাঢ্‌‌তো অলঅ বেগত্তুন্ খেমতাবলা গোজেনর্ দর্‌‌গরেপারা রাগ্‌‌কান।

ফগদাং পেইয়্যে 19:18

যেন তুমি রাজা, সেনাপতি, বোলী মানুচ্‌, ঘোড়া আর সেই ঘোড়াত্ চোজ্জ্যে মানুচ্চুনোরে, গিরোজ্ আর চাগরুনোর আর চিগোন-দাঙর বেক্‌ মানুচ্চুনোর য়েরানি হেই পারঅ।”

ফগদাং পেইয়্যে 19:5

সেক্কে সিংহাসনত্তুন্ একজনে কলঅ, “গোজেনর্ চাগরুন আর তুমি যিগুনে গোজেনরে ভোক্তি গুরিনে দরঅ, তুমি চিগোন-দাঙর্ বেক্কুনে আমা গোজেনর্ বাঈনী গরঅ।”

ফগদাং পেইয়্যে 20:12

সে পরেদি মুই দেগিলুং, চিগোন-দাঙর্ বেক্‌ মরা মানুচ্চুনে সেই সিংহাসনান মুজুঙোত্ থিয়্যেই আঘন্। ইয়েনর্ পরেদি কয়েক্কো বোই খুলো অলঅ। সে পরেদি আর এক্কো বোই খুলো অলঅ। সিবে এলঅ জিংকানি-বোই। এ মরা মানুচ্চুনোর কাম পৌইদ্যেনে সেই বোইয়ুনোত্ যেধোক্ক্যেন গুরি লেগা ওইয়্যে সেই মজিম তারার্ বিচের্ অলঅ।

ফগদাং পেইয়্যে 22:12

যীশু কত্তে, চঅ, মুই যাদিমাদি এজঙর্ আর পত্তিজনরে তার্ কাম মজিম দিবার বক্‌শিজ মঅ সমারে আঘে।