গীতসংহিতা 76:6 - Chakma Bible

⁶ ও যাকোবর গোজেন, ঘোড়া আর রথচালেয়্যেগুনে তর্ ধমক হেইনে গভিন ঘুমোত্ ঢুলি পোজ্যন্।

গীতসংহিতা 76:6 ပူးပေါင်းရင်းမြစ်များ

২ শমূয়েল 10:18

মাত্তর্‌ ইস্রায়েলীয়গুনো মুজুঙোত্তুন্‌ তারা ধেই গেলাক্। সেক্কে দায়ূদে তারার সাতশত্‌ রথচালেয়্যে আর চোল্লিশ আজার ঘোড়াবাহিনীরে মারে ফেলেল। তে তারার্‌ সেনাপতি শোবকরেয়ো আঘাত্‌ গুরিলো; সেক্কে শোবকে সিদু মুরি গেলঅ।

২ রাজাবলী 19:35

সে রেদোত্‌ লগেপ্রভু দূত্তো নিগিলিনে আসিরিয়গুনো তাম্বুলোর্‌ এক লাখ্‌ পাজাশি আজার্‌ মান্‌জ্যরে মারে ফেলেল। তার্‌কেল্যে বেন্যে মানুচ্চুনে যেক্কে ঘুমোত্তুন উদিলাক্‌ সেক্কে দেগা গেলদে বেক্‌ জাগানিত্‌ বানা মরামানুচ্।

২ বংশধর 32:21

সেক্কে লগেপ্রভু এক্কো স্বর্গদূতোরে পাধেই দিলো যিবে আসিরিয়ার রাজার তাম্বুলো ভিদিরেত্তুন্‌ বেক্‌ যোদ্ধাগুরিয়্যেগুনোরে, নেতাগুনোরে আর সেনাপতিগুনোরে পুরোপুরি গুরিনে ভস্ত গুরি ফেলেল। সেক্কে সন্‌হেরিবে লাজে নিজো দেজত্‌ ফিরি গেলঅ। তে তার্‌ দেবেদাবোর্‌ মন্দিরোত্‌ যানার্‌ পরেন্দি তার্‌ কয়েক্কো পুয়ো তারে মারে ফেলেল।

গীতসংহিতা 104:7

মাত্তর্ সেই পানিগান তঅ উগুমে গেলগোই; সিয়েন গেলগোই তঅ গুজুরোনিত্।

গীতসংহিতা 18:15

ও লগেপ্রভু, তর্ ধমক্কোই আর নিযেজে মাদি তলাত্তুন্ পানি দেগা দিলো, পিত্‌থিমীর ভিদিরেদিগান নিগিলিলো।

গীতসংহিতা 80:16

সে গাজ্‌ছুন আগুনে পুড়ি যেয়োন, সিগুন কাবি ফেলা ওইয়্যে; তঅ মানুচ্চুনে তর্ গেইল্ হেইনে শেজ্ ওই যাদন্।

যাত্রা 15:1

ইয়েন পরেদি মোশি আর ইস্রায়েলীয়গুনে লগেপ্রভুর নাঙে এই গীদ্‌‌তো গেলাক্: মুই লগেপ্রভুর নাঙে গীদ্ গেইম্‌, কিত্তে মানেইয়ুনোর চোগোত্‌ তাঁর্‌ মহিমাগান্ বাড়িলো। ঘোড়া আর ঘোড়াবাহিনীর্ দলুনোরে তেয়ই বড়গাঙর্ পানিত্‌ ফেলেই দিলো।

যাত্রা 15:10

মাত্তর্‌ তুই ফুন্‌ দিইনে বোইয়্যের্‌ ‌দিলে, আর সাগরানেয়ো তারারে ঢাগি ফেলেল। তারা মরং পানি তলাত্‌ শিজে ধোক্ক্যেন গুরি ডুবি গেলাক্।

যাত্রা 15:21

মোশির্‌ গীদ্‌তোর্‌ জোবত্‌ মরিয়মে এই গান্নো গেলঅ; “তুমি লগেপ্রভুর্‌ নাঙে গীদ্ গঅ, কিত্তে মানেইয়ুনোর চোগোত্‌ তাঁর্‌ মহিমাগান্ বাড়িলো। ঘোড়া আর ঘোড়াবাহিনীগুনোর দলুনোরে তেয়ই‌ ফেলেই দিলো বড়গাঙ পানিত্।”

যিশাইয় 37:36

সে পরেদি লগেপ্রভুর দূত্‌তো নিগিলিনে আসিরিয়গুনোর্ তাম্বুলোর্ এক লাখ্ পাচাশি আজার্ মান্‌‌‌জ্যরে মারে ফেলেল। তার্ কেল্যে বেন্যে অক্তত্ মানুচ্চুনে যেক্কে উদিলাক্ সেক্কে দেগা গেলদে বেক জাগানিত্ বানা মরা মানুচ্।‌‍‌

যিরমিয় 51:39

তারা রাগ্ গুরিলে পরেদি মুই তারাত্তে এক্কো মেইট্‌বানর্ বেবস্থা গুরিম। মুই তারারে মাত্তল্ গুরিম যেন তারা হুজিয়ে নাজি উদোন্, সে পরেদি উমরত্তে ঘুমোন্, কনদিন্‌অ ন‌‌‌-জাগন।

যিরমিয় 51:57

যিবের্ নাঙান বেগত্তুন্ খেমতাবলা লগেপ্রভু সেই রাজাবো কোইয়্যেদে, “মুই তার রাজার চাগরুনোরে, জ্ঞানী মানুচ্, শাজন্‌গুরিয়্যে, দাঙর্ পোজিশনর কামগুরিয়্যেগুন আর যোদ্ধাগুনোরে মাত্তল্ গুরিম। তারা উমরত্যে ঘুম যেবাক্; তারা আর ন-জাগিবাক্।

যিহিষ্কেল 39:20

মঅ টেবিলোত্ তুমি পেট ভুরিনে ঘোড়া, রথচালেয়্যে, খেমতাবলা মানুচ্ আর নানান্ বাবোত্যে সৈন্যগুনোর য়েরা হেবা।

নহূম 1:6

তার্ বেজার্ অনা মুজুঙোত্ কন্না টিগিই থেই পারে? কন্না সোজ্য গুরি পারে তার্ দর্‌গরেপারা রাগ্‌কান? তা রাগ্‌কান আগুনো ধোক্ক্যেন জ্বলে; তা মুজুঙোত্ দাঙর্ দাঙর্ শিলুন্ কট্টা কট্টা ওই যান।

নহূম 2:13

বেগত্তুন্ খেমতাবলা লগেপ্রভু কোইয়্যেদে, “ও নীনবী, মুই তঅ বিরুদ্ধে; মুই তঅ রথ্‌‌‌তানি পুড়ি ফেলেম, আর লাম্বা ছুরিগানে তর্ বোলা সিংহগুনোরে শেষ্ গুরিবো। মুই তর্ শিগেরত্তে কন কিজু এই পিত্‌থিমীত্ ফেলেই ন-রাগেম‌‌‌। তর্ হবর্ দিয়্যেগুনোর মুয়োর্ রঅগুন্ আর শুনো ন-যেবঅ।”

নহূম 3:18

ও আসিরিয়ার রাজা, তঅ নেতাগুনে ঘুমোদন্; তঅ রাজ্‌কামগুরিয়্যেগুনে পড়ি আগন্। তঅ মানুচ্চুনে মুড়োই মুড়োই ছিদি পোজ্যন্, তারারে এগত্তর্ গুরিবার কনজন নেই।

সখরিয় 12:4

সেদিন্যে মুই পত্তি ঘোড়ারে দর্‌বুক্ লাগেম্ আর ঘোড়াচালেয়্যেগুনোরে পাগল বানেম। যিহূদার মানুচ্চুনো উগুরে মুই উজিয়ার গুরি নজর্ রাগেম্, মাত্তর্ অন্য জাদ্‌‌‌‌‌‌তুনোর বেক ঘোড়াগুনোরে চোগ্‌কান্ গুরি দিম।‌‌‌

১ শমূয়েল 26:12

দায়ূদে সে পরেন্দি শৌলর মাদাবোর কায়-কুরেত্তুন্‌ তার সেল্‌লো আর পানির পিলেবো নেযেল। কনজনে সিবে ন-দেগিলাক্, হবর্‌ ন-পেলাক্, কনজনে নয়ো জাগিলাক্। তারা বেক্কুনে ঘুমোদন্‌, কিত্যে লগেপ্রভু তারারে এক্কো ঘুর্‌গুজ্যে ঘুমোত্‌ ফেলেইনে রাগেল।