গীতসংহিতা 5:11 - Chakma Bible

¹¹ মাত্তর্ যিগুনে তইদু আশ্রয় নেযান্ তারা হুজি ওদোক্, তারা হুজিয়ে জিংকানিবর্ গান গাদোক্; তারারে তুই রোক্ষ্যে গর্, যেনে তরে যিগুনে কোচপান্ তারা তরে নিইনেই হুজি অন্।

গীতসংহিতা 5:11 ပူးပေါင်းရင်းမြစ်များ

ইয়োব 38:7

সেক্কে দঅ পোত্য আমল্যে তারাগুনে এক সমারে গান গেইয়োন আর স্বর্গদূত্‌তুনে বেক্কুনে হুজিয়ে রঅ ছাড়ি উঠ্যন্।

গীতসংহিতা 2:12

তুমি সেই পুয়োবোরে সর্মান দেগেইনে চুমো, যেনে তে তমা উগুরে বেজার্ ন-অয় আর আঢি যাদে তুমি ভস্ত ওই ন-যঅ; কিত্যে চোগো মুজুঙোত্ তা রাগ্‌কান জুলি উদি পারে। বর্ পেইয়্যে সিগুন, যিগুনে তাইদু আশ্রয় নেযান।

গীতসংহিতা 35:27

মুই ন্যায়র্ পদথ্ চলঙর্, এ কধাগান যিগুনে শুনোদে গম‌্‌পান তারা হুজি ওইনে রঅ ছাড়োদোক্ আর ফুত্তি গোরোদোক্। তারা আমিঝে কোদোক্, “লগেপ্রভুর বাঈনী ওক্; তার্ চাগরুনোর্ ভালেদি অলে তে হুজি অয়।”

গীতসংহিতা 40:16

মাত্তর্ যিগুনে তর্ আওজ্ মজিম চলন্ তারা মরে নিইনে হুজি ওদোক্; যিগুনে তর্ করা উদ্ধোরর্ কামান গমপান তারা নিত্য কোদোক্, “লগেপ্রভুর বাঈনী ওক্!”

গীতসংহিতা 58:10

তারা উগুরে হেনা শুজো অলে গোজেন ভক্তগুনে হুজি অবাক্; তারা পাজিগুনোর লো-লোই টেং ধবাক্।

গীতসংহিতা 65:13

পত্তি খলা ভেড়া পাল্লোই ভরি আগন, আর সোজ্য খেত্‌তোই যেন কিজিঙানি ঢাক্যে আঘে; সিয়েনিয়ে হুজিয়ে রঅ ছাড়ের আর গান গার্।

গীতসংহিতা 68:3

মাত্তর্ গোজেন ভক্তগুনে হুজি ওদোক্ আর গোজেন মুজুঙোত্ ফুত্তি গোরোদোক্।

গীতসংহিতা 69:36

তা চাগরুনো গুট্টির মানুচ্চুনে সিয়েনর অধিকার ইজেবে পেবাক্, আর যিগুনে তারে কোচ্‌পান তারা সিদু বজত্তি গুরিবাক্।

সখরিয় 9:9

“ও সিয়োন-ঝিবো, অমকদ ফুত্তি গর্। ও যিরূশালেম, তুই জয় ধুনি দে। চাহ্, তঅ রাজাবো তইদু এজের্; তে ন্যায়বলা আর তাইদু উদ্বোর্ আঘে; তে নম্র, তে গাধা উগুরে, গাধী ছঅ উগুরে চড়িনে এজের্।

রোমীয় 8:28

আমি হবর্ পেই যিগুনে গোজেনরে কোচ্‌পান, অত্তাৎ গোজেনে নিজোর্ আওজ্ মজিম যিগুনোরে ডাক্ক্যে তারার্ ভালেদিত্তে বেক্কানি এক সমারে কাম্ গুরি যার্।

১ করিন্হীয় 2:9

মাত্তর্ পবিত্র বোইবোর্ কধা মজিম, “গোজেনরে যিগুনে কোচ্‌‌পান তারাত্তে তে যিয়েন যিয়েন ঠিগ গুরি রাগেয়্যে, সিয়েনি কনজনে চোগেদিয়ো ন-দেগন্, কানেদিয়ো ন-শুনোন্ আর মনেদিয়ো ন-ভাবন্।”

যাকোব 1:12

পোরোক্ষ্যের্ সময়োত্ যে ধৈয্য ধরে তে বর্ পেইয়্যে, কিয়া যগাজ্জ্যে প্রমাণ অলে পরেদি জিদেনার্ মালা ইজেবে তে জিংকানি পেবঅ। গোজেনরে যিগুনে কোচ্‌পান তারারে তে এ জিংকানিগান দিবার এগেম্ গোজ্জ্যে।

যাকোব 2:5

মর্ কোচ্‌‌পেইয়্যে ভেইয়ুন্, শুনো। এই জগদর্ চোগেদি যিগুনে নাঢা মানুচ্, বিশ্বাজে তাগোয়্যে অবাত্যে গোজেনে কি তারারে বেঈ ন-লয়? যিগুনে গোজেনরে কোচ্‌পান সিগুনোরে তে যে রেজ্যগান দিবার্ এগেম্ গোজ্জ্যে সেই রেজ্যগানর্ অধিকারী অবাত্যে এই নাঢা মানুচ্চুনোরে কি তে বেঈ ন-লয়?

ফগদাং পেইয়্যে 18:20

সেক্কে সেই স্বর্গদূত্‌‌তো কলঅ, “ও স্বর্গগান, সেই শঅরানর্ ভস্ত অনাত্যে হুজি অ। গোজেনর্ মানুচ্চুন, দ্বিপাদেয়্যেগুন আর ভাববাদীগুন, হুজী অ। তমা বিরুদ্ধে তে যাহ্ গোজ্জ্যে সিয়েনত্যে গোজেনে তা বিচেরান গোজ্জ্যে।”

বিচের গুরিয়্যেগুন 5:31

ও লগেপ্রভু, তর্‌ শত্রুগুনে বেক্কুনে এধোক্কেন্‌ গুরিনে শেজ্‌ ওই যাদোক্‌; মাত্তর্‌ যিগুনে তরে কোচ্‌পান তারা যেনে বেলান ধোক্কেন্‌ পহ্‌র ওই উদোন্‌। ইয়েনর্ পরেন্দি দেজত্‌ চোল্লিশ বজর সং সুখ-শান্দি এলঅ।