ফিলীমন 1:6 - Chakma Bible

⁶ মুই এ তবনাগান গরং যে, তর্ বিশ্বেজত্যে তর্ দান গরানার মাধ্যমে যেন খ্রীষ্ট বাঈনী পায়। ইয়েনবাদে খ্রীষ্ট সমারে এগত্তর্ ওইনে আমি যেদক্কানি বর্ পেইয়্যেই সিয়েনি পুরোপুরি গুরি বুঝি পারিনে তর্ দান গরানার্ কামান যেন আরঅ বাড়ে।

ফিলীমন 1:6 ပူးပေါင်းရင်းမြစ်များ

মথি লেখ্যে গম্ হবর্ 25:16

যে পাচ্ আজার্ দীনার্ পেলঅ তে সিগুন্দোই বেবসা গুরিনে আরঅ পাচ্ আজার্ দীনার্ লাভ্ গুরিলো।

মথি লেখ্যে গম্ হবর্ 5:16

সেবাবোত্যেগুরি তমা পহ্‌‌রান মানুচ্চুনো মুজুঙোত্ জ্বোলোক্, যেনে তারা তমার্ গম্ কামানি দেগিনে তমা স্বর্গর্ বাপ্পোর্ বাঈনী গরন্।

১ করিন্হীয় 14:25

সেক্কে তা মনত্ গুমুরো বেপারানি নিগিলি এবঅ, আর তে সেক্কে মাদিত্ মাঢা নিগিরিনে গোজেনরে বাঈনী গুরিনে কবঅ, “ঘেচ্চ্যেকগুরি, গোজেনে তমা ভিদিরে আঘে।”

১ করিন্হীয় 16:9

কিয়া যে কামত্ সাগর ফল পা-যায় সেবাবোত্যে কামত্যে এক্কো দাঙর্ জু মঅ মুজুঙোত্ এচ্চ্যে; খালিক্ ভালোকজনে ইয়েনত্ মানায়ো গত্তন্।

ফিলিপীয় 4:8

যেরেদি কং, ভেইলগ্, যিয়েন সত্য, যিয়েন যগাজ্জ্যে, যিয়েন গম্, যিয়েন খাটি, যিয়েন-দোল্, যিয়েন সর্মান পেবার যগাজ্জ্যে, আজল্ কধা যিয়েন গম্ আর নাঙ্ গিনিবার্, সিন্দি তুমি মনানি দুয়ো।

কলসীয় 1:9

ইয়েনত্যে তমা পৌইদ্যেনে শুনোনার্ পরেত্তুন ধুরি আমি নিত্য তমাত্যে তবনা গুরির্। আত্মিক জ্ঞান আর বুদ্ধিলোই যেন তুমি গোজেনর্ আওজ্‌চান পুরোপুরি বুঝি পারঅ আমি সিয়েনই গোজেন ইধু মাগির্।

তীত 3:14

অন্যগুনোরে উপকার গুরিবার কামত্ নিজোরে লাগি রাগেবাত্যেই আমা মানুচ্চুনোর্ শিগে পরিবো, যেন তারা অন্যগুনোর অভাব্‌ দূর্ গুরি পারন। এবাবোত্যে গুরিলে তারার্ জিংকানিগানি ফলিবো।

ইব্রীয় 6:10

গোজেনে দোল্ বিচেরক্; সেনত্যে তমা কামানি আর তা মানুচ্চুনোরে সেবা-যত্তন্ গুরিনে তুমি তারে যে কোচ্‌পানা দেগেয়ো আর দেগর্, সিয়েন তে ভুলি ন-যেবঅ।

যাকোব 2:14

মঅ ভেইয়ুন, যুনি কেঅ কয় তাত্তুন্ বিশ্বেজ্ আঘে মাত্তর্ কামেদি সিয়েন ন-দেগায় সালে সিয়েনত্ কি লাভ্? সেই বিশ্বেজ্‌‌চানে কি তারে পাপত্তুন্ উদ্ধোর্ গুরি পারে?

যাকোব 2:17

ঠিগ্ সেবাবোত্যে গুরি, যে বিশ্বেজ্‌চান সমারে কামর্ মিল্ নেই সেই বিশ্বেজ্‌চান মরা।

১ পিতর 2:12

কারন সিয়েনিয়ে তমার আত্মার বিরুদ্ধে যুদ্ধো গরে। গোজেনরে যিগুনে ন-জানন্ তারা ভিদিরে তুমি গমেডালে চলঅ যেনে অন্যেয়গুরিয়্যে বিলিনে তারা তমারে নিন্দে গুরিলেয়ো তমা গম কামানি খিয়েল্ গরন্ আর বিচেরর্ দিনোত্ তমার্ সেই কামানিত্যে গোজেনরে বাঈনী গরন্।

১ পিতর 3:1

সেবাবোত্যে তুমি যিগুনে মোক্, তুমি পত্তিজনে নেগর্ অধীনতা মানি লঅ, যেন তারা ভিদিরে কেঅ কেঅ গোজেনর্ কধানি বিশ্বেজ্ ন-গুরিলেয়ো তমা চালচলন্ খ্রীষ্ট ইন্দি তারারে টানে। ইয়েনত্ তমার এক্কান কধায়ো কুয়ো ন-পড়িবো,

১ পিতর 3:16

তমা বিবেক্ সাব্ রাগঅ, যেন খ্রীষ্টর মানুচ্‌ ইজেবে তমার্ গম্ চালচলনত্ যিগুনে বদ্‌নাঙ্ গরন্ তারা তমারে নিন্দে গোজ্জ্যন বিলিনে লাজান্।

২ পিতর 1:8

যুনি তমার এই বেক্‌ গুণানি থায় আর উগুড়ি পড়ি থায়, সালে আমার প্রভু যীশু খ্রীষ্টরে মূড়োত্ গুরি জানিবার কামত্ তুমি ভালেদ্ অবা।