নহিমিয় 8:15 - Chakma Bible

¹⁵ আর তারার্‌ আদামানিত্‌ আর যিরূশালেমত্‌ তারা এ কধাগান্‌ ফগদাঙ্‌ আর প্রচার্‌ গুরিবাক্‌, “যেধোক্কেন্‌ লেগা আঘে সেধোক্কেন্‌ তুমি মুড়োমুড়ি চাগালাত্‌ যেইনে নাদা মান্‌জ্যর-ঘর্‌ বানেবাত্তে জলপাই আর ঝার্‌বো জলপাই গাজ ডেলা আর গুলমেঁদি, খাজোর্‌ আর পাদালোই-ভোজ্যে গাজঅ ডেলা আনিবা।”

নহিমিয় 8:15 ပူးပေါင်းရင်းမြစ်များ

পত্থম 8:11

সাজোন্যে অক্তত্‌ কোদোরবো জাহাজত্‌ নোহ ইধু ফিরি এলঅ আর তা ঠুদোত্‌ জলপাই গাজত্তুন্ লগেলগ্‌ ছিনি আন্যে এক্কান পাদা এলঅ। সেক্কে নোহ বুঝিলোদে মাদি উগুরেত্তুন্‌ পানি কুমি যেইয়্যে।

লেবীয় 23:4

লগেপ্রভুর্ যিদুক্কুন ঠিগ্ গোজ্যে পরব্‌, অত্তাৎ যিদুক্কুন্‌ পবিত্র মিলন-সভা তুমি সিগুনোর্‌ ঠিগগোজ্যে দিনোত্‌ ফগদাঙ্‌ গুরিবা সিগুন্‌ অল:

লেবীয় 23:40

পত্তম দিনোত্‌ তমার নিজোত্তে গাজর্‌ বেগত্তুন্‌ গম ফল, খাজোর গাজ পাদা, উইলো গাজ্‌ আর অন্য পাদালোই ভোজ্যে গাজর্‌ বাগল্‌ লোইনে এবা। সে পরেদি সাত দিন ধুরি তুমি তমার গোজেন লগেপ্রভুর্ মুজুঙোত্ ফুত্তি গুরিবা।

সখরিয় 1:8

রেদোত্ মুই সখরিয় এক্কান দর্শন পেলুং। মুই দেগিলুং, মান্‌জ্য ধোক্ক্যেন রিনি চাদে এক্কো স্বর্গদূত রাঙা ঘোড়া উগুরে চড়িনে এজের্। ঘোড়াবো গাদ ভিদিরে গুলমেঁদি গাজ্‌‌চুনো সংমোধ্যে থিয়্যেই আঘে। মানুচ্চো পিজেদি আগেদে রাঙা, মাদি রঙর্ আর ধুব্ রংয়র কয়েক্কো ঘোড়া।

মথি লেখ্যে গম্ হবর্ 21:1

যীশু আর তা শিচ্চ্যগুনে যিরূশালেম কায়-কুরে লুমিনে জৈতুন্ মুড়োবো উগুরে বৈৎফগী আদাম ইধু এলাক্,

যোহন 12:13

সেক্কে তারা খাজোর্ পাদালোই তারে আগ্ বারেই আনিবাত্যে গেলাক্ আর রঅ ছাড়িনে কুয়ো ধুরিলাক্, “হোশান্না, যে প্রভুর নাঙে এজের্ তার্ বাঈনী ওক্‌। তেয়ই ইস্রায়েলর্ রাজা।”

দ্বি’লম্বর বিররণ 16:16

তমার গোজেন লগেপ্রভুর বেঈ লোইয়্যে জাগানত বজরে তিনপল্লা, অত্তাৎ সদাছাড়া পিদের পরবর্‌ সলাবোত্‌, সাত সাপ্তার্ পরবর্‌ সলাবোত্‌ আর নাদা মান্‌জ্যর-ঘরর পরবর্‌ সলাবোত্‌ তমার বেক্‌ মরদ্‌তুনে লগেপ্রভুর মুজুঙোত্‌ আঝিল্ উয়ো পুরিবো। কনজনে যেনে খালি আঢ্‌তোই লগেপ্রভুর মুজুঙোত্‌ আঝিল্ ন অয়।

ফগদাং পেইয়্যে 7:9

ইয়েনর্ পরেদি মুই পত্তি জাত্, গুট্টি, দেশ আর ভাষা ভিদিরেত্তুন্ এদক্ মান্‌জ্যর ভিড় দেগিলুং, তারারে কেঅ গুণি ন-পারিলাক্। ধুব্ কাবড় উরিনে তারা সেই সিংহাসন আর ভেড়া-ছবুয়ো মুজুঙোত্ খাজোর্ পাদা আঢত্ গুরিনে থিয়্যেই এলাক্।