লেবীয় 25:39 - Chakma Bible

³⁹ তমার কনঅ ইস্রায়েলীয় ভেই যুনি নাদা অবস্থায় পড়িনে নিজোরে তমার কার ইদু বিজি দে সালে তুমি তারে চাগর ধোক্ক্যেন ন-খাদেবা।

লেবীয় 25:39 ပူးပေါင်းရင်းမြစ်များ

১ রাজাবলী 9:22

মাত্তর্‌ তে কনঅ ইস্রায়েলীয়রে চাগর্‌ ন-বানায়; তারা এলাক্কে তা যুদ্ধোগুরিয়্যে, তা কামগুরিয়্যে, তা তলেন্দি শাজন্‌গুরিয়্যে, তা সেনাপতি আর তা রথচালেয়্যে আর ঘোড়াচালেইয়্যেগুনোর সেনাপতি।

২ রাজাবলী 4:1

শিচ্চ্য-ভাববাদীগুনোর দলত্তুন্‌ একজন মোগে রঅ ছাড়িনে ইলীশায়রে কলঅ, “তর চাগর্‌ মঅ নেক্কো মুরি যেইয়্যে আর তুই হরব্‌ পাজ্‌, তে লগেপ্রভুরে ভোক্তি গুরিদো। মাত্তর্‌ ইক্কিনে মঅ নেক্কোর্‌ এক্কো পাওনাদার মর্‌ দ্বিবে পূয়োরে তা চাগর্‌ বানেবাত্তে হজা এচ্ছ্যে।”

২ বংশধর 28:10

আর ইক্কিনে তুমি যিহূদা আর যিরূশালেম মানুচ্চুনোরে তমার্‌ চাগর্‌-চাগরানি বানেবাত্তে চর্‌। মাত্তর্‌ তমা গোজেন লগেপ্রভু ইদু কি তুমিয়ো দুষি নয়?

নহিমিয় 5:5

যুনিয়ো আমি এক্‌ জাদর্‌ মানুচ্‌ আর আমা ঝি-পূঅগুনে তারার্‌ ঝি-পূঅগুনো ধোক্কেন্‌ তো আমা ঝি-পূঅগুনোরে চাগর্‌ বানা পোজ্যে, আর আমা ঝি-গুনোর্‌ ভিদিরে কয়েকজনে আগেত্তুন্‌ ধুরি চাগর্‌ ওই যেইয়োন্‌। ইক্কিনে আমাত্তুন্‌ কনঅ্‌ খেমতা নেই, কিত্যে আমার ভূইয়ানি আর আংগুর ক্ষেত্‌তানি অন্যর্‌ ওই যেইয়্যে।”

যাত্রা 1:14

খেদর্ অন্য বেক্‌ কামানি সমারে তারা সিগুনো উগুরে সিবিদি আর ইট্‌দলা বুয়োনা অমকদ দুগোর্‌ কামানিয়ো জোর্ গুরি দিলাক্ আর তারার জিংকানিগানি তিদে গুরি দিলাক্। এদক্কানি দুগোর্‌ কাম্‌ খাদেবাত্তে যেইনে মিসরীয়গুনে তারা উগুরে অমকদ চিৎ-নপুজ্যে বেবহার গুরিদাক্।

যাত্রা 21:2

চাগর্‌ ইজেবে যুনি কনঅ‌ ইব্রীয় মান্‌জ্যরে তুমি কিনি নেযঅ‌, সালে ছয় বজর্‌ সং তে তমার অধীনোত্‌ থেইনে কাম্‌ গুরিবো, মাত্তর্‌ সাত্‌ বজর বিদি গেলে তাত্তুন্‌ কিজু নেযেইনে এম্‌নে তারে ইরি দিয়্যে পড়িবো।

যাত্রা 22:3

মাত্তর্‌ যুনি বেলান্‌ উদিবার পরেন্দি সিয়েন্‌ অয়্‌ সালে তে সেই খুনোত্তে দায়ী অবঅ‌। চুর্‌বোত্তুন্‌ চুর্‌ গোজ্যে জিনিচ্চানত্যেই‌ হামাক্কাই‌ ক্ষোতি পূরোণ্‌ দিয়্যে পুরিবো, মাত্তর্‌ যুনি তার্‌ কিচ্চু ন-থায়্‌ সালে নিজোরে বেজিনে সেই টেঙাগুন্‌ উজোল্‌ গুরি নেযা পুরিবো।

যিরমিয় 25:14

বাবিলীয়গুনে বোউত্ জাদর্ আর দাঙর্ দাঙর্ রাজার চাগর্ অবাক্; তারার বেক কামানি অনুসারে মুই তারারে ফল দিম।’ ”

যিরমিয় 27:7

যেদকদিন সং তা দেজর্ সময় ন-এজে সেদকদিন সং বেক্ জাদ্‌তুন তার, তা পুয়োগুনোর আর তা নাদিনুনোর চাগর্ অবাক্; সে পরেদি বোউত্ জাদে আর দাঙর্ দাঙর্ রাজাগুনে তারে তারা অধিনোত্ আনিবাক্।‌‍‌‌‌‌‍‍‍

যিরমিয় 30:8

মুই বেগত্তুন্ খেমতাবলা লগেপ্রভু কঙর্, সেদিন্যে মুই তারার গত্তনাত্তুন্ জুঙোলান্ ভাঙি ফেলেম্ আর তারার দুড়িগান ছিনি ফেলেম; বিদেশীগুনে আর তারার চাগর্ গুরি ন-রাগেবাক্।

যিরমিয় 34:14

যুনি কনঅ ইব্রীয় ভেই নিজোরে তমা ইধু বিজি দুয়োন্ সালেন্ সাত্ বজরত্ তুমি তারে উদ্ধোর্ গুরিবা। ছঅ বজর্ তে তমার্ চাগর্ কাদিলে পরেদি তমাত্তুন্ তারে ইরি দিয়্যে পড়িবো। মাত্তর্ তমা পুরোণি মানুচ্চুনে মঅ কধানি ন-শুনোন্, মঅ কধানি মনযোগ ন-দুয়োন্।

যিরমিয় 34:8

পরেদি লগেপ্রভু আরঅ যিরমিয় লগে কধা কলঅ। ইয়েন আগেদি রাজা সিদিকিয় যিরূশালেমর বেক্ মানুচ্চুনোরে সমারে চাগরুনোর উদ্ধোর্ কধাগান ফগদাং গরানার পৌইদ্যেনে সুদোমান থির্ গোজ্যে।

যিরমিয় 34:9

সেই সুদোমান অলঅ, পত্তিজনে তার ইব্রীয় চাগর্ বা চাগরানীবোরে উদ্ধোর্ গুরি দিবো; কনঅ যিহূদী ভেইয়োরে কনজনে চাগর্ ইজেবে রাগেই ন-পারিবো।

লেবীয় 25:46

এ চাগর্‌-চাগরানিগুনোরে তুমি সোম্বোত্তির্‌ ভাগ্ ইজেবে ঝি-পূঅগুনোরে দিইনে যেই পারিবা। তুমি তারার্‌ পুরো জিংকানিবর্ চাগর্‌ ইজেবে রাগেই পারিবা, মাত্তর্‌ তমার্‌ নিজোর্‌ জাদ ইস্রায়েলীয়গুনো উগুরে তুমি চিৎনপুজ্যে বেবহার গুরি ন-পারিবা।

মথি লেখ্যে গম্ হবর্ 18:25

তা কজ্জ শুজিবার্ খেমতা ন-এলঅ। সেক্কে সে গিরোজ্‌সো উগুম গুরিলো যেন সে মানুচ্চোরে আর তা মোক্কোরে আহ্ পুয়ো-ঝিগুনোরে আর তার্ যিয়েনি আঘে বেক্কানি বিজিনে পাওনা উজোল্ গরা অয়।