লেবীয় 16:29 - Chakma Bible

²⁹ ইয়েনর্ পরেদি যিয়েন্‌ কঙর্‌ সিয়েন্‌ তমাত্তে এক্কান্‌ থিদেবর ‍সুদোম ওই থেবঅ। বজরর্‌ সাত্‌ মাজর্‌ দশ দিনোত্‌ তুমি বেক্কুনে নিজোর্‌ মনানি ভাঙিচুরি দুঘ্ স্বীগের্‌ গুরিবা। সে দিনোত্‌ কনঅ কাম্‌ গরানা ন-চুলিবো। ইস্রায়েলীয় ওক্‌ কিম্বা ইস্রায়েলীয়গুনোর্‌ ভিদিরে বজত্তি গোজ্যে অন্য জাদর্‌ মানুচ্‌ ওক্‌, বেক্কুনোত্তুন্‌ সিয়েন্‌ মানা পুরিবো,

লেবীয় 16:29 ပူးပေါင်းရင်းမြစ်များ

১ রাজাবলী 8:2

সেক্কে এথানীম মাজত্‌, অত্তাৎ সাত মাসর পরবর্ সলাবোত্‌ ইস্রায়েলর সেই বেক্‌ মানুচ্চুনে রাজা শলোমনর্ ইদু আঝিল্ অলাক্।

ইষ্রা 3:1

ইস্রায়েলীয়গুনে নিজোর্ নিজোর্ আদামত্ আর শঅরত্ বজত্তি গরানা আরাম্ভ গরানার্ পরেদি সাত মাজত্ বেক মানুচ্চুনে একসমারে মিলিনে যিরূশালেমত্ এগত্তর্ অলাক্।

ইষ্রা 8:21

পরেদি মুই অহবার ছড়া ইধু আমাত্যে উবোস্ থানাগান্ ফগদাং গুরিলুং যেনে আমি আমা গোজেন মুজুঙোত্ নিজোরে লোঙেই পারিই আর আমা ঝি-পুয়োগুনোরে আর বেক্ সোম্বোত্তিগানোই গমেডালে যাত্রা গুরি পারিই।

গীতসংহিতা 35:13

তো তারার্ অসুগোর্ সময়োত্ মুই বস্তা ফাদা সিলুম্ উয্যং; উবোস্ থেইনে নিজোরে বল্‌‌পোজ্যে গোজ্যং; মাত্তর্ মঅ তবনাগান মইদু ফিরি এচ্চ্যে।

গীতসংহিতা 69:10

মর্ কানানিগান আর মর্ উবোস্ থানার্ দুঘ্‌কান মর্ দুন্নামর্ বেপার ওইয়্যে।

যাত্রা 12:16

পত্তম আর সাত দিনোত্‌ তুমি পবিত্র এগত্তর্ অইদে-তেম্মাং গুরিবা। এ দ্বিদিনোত্‌ তুমি নিজোর্‌ হানা বানানা বাদে আর কনঅ কাম্‌ ন-গুরিবা।

যাত্রা 20:10

মাত্তর্‌ সাত্‌ দিন্নো অলঅ‌ তমার গোজেন লগেপ্রভুর্‌ নাঙে জিরেবার্‌ দিন। সেদিন্যে তুমি, তমার ঝি-পূঅগুন, তমা চাগর্‌-চাগরানিগুন, তমার য়েমানুন্ বা তমার শঅরত্‌ আর আদামত্‌ বজত্তি গোজ্যে অন্য জাদর্‌ মানুচ্চুন, আজল্‌ কধা, কনজনে কনঅ‌ কাম্‌ গরানা ন-চুলিবো।

যাত্রা 30:10

পাপ ঢাগিবাত্যেই পাপ-উৎসর্বর লো ডালিপূজোবো শিঙুনো উগুরে বাজেই দিইনে হারোণে বজরে একবার্‌ গুরি ডালিপূজোবো সিজি গুরি নেযেব। এধোক্ক্যেনগুরি বজরে একবার্‌ গুরি বংশর পর্‌ বংশ ধুরি দাঙর্‌ ধর্মগুরুবোত্তুন্‌ এই কামান্‌ গুরি যাহ্ পুরিবো। ইবে লগেপ্রভুর নাঙে দাঙর্‌ পবিত্র ডালিপূজো।”

যাত্রা 31:14

“তুমি জিরেবার্‌ দিন্নো পালন গুরিবা, কিত্তে এদিন্নো তমাত্তে মর্‌ নাঙে ফারক্‌ গুরি রাগা ওইয়্যে। যুনি কনজনে এদিন্নো পালন্‌ ন-গরন্‌ সালে তারে মারে ফেলা পুরিবো; যুনি কনজনে এই দিন্নোত্‌ কনঅ‌ কাম্‌ গরন্‌ সালে তারে তার্‌ জাদ ভিদিরেত্তুন্‌ বাদ্‌ দিয়্যে পুরিবো।”

যাত্রা 31:15

তুমি সাপ্তায়্‌ ছয়দিন কাম্‌ গুরিবা মাত্তর্‌ সাত্‌ দিনোত্‌ অবদে জিরেবার্‌ দিন, আর লগেপ্রভুর নাঙে সিবে এক্কো ফারক্‌ গুরি রাগেয়্যে দিন। যুনি কনজনে এ দিন্নোত্‌ কাম্‌ গরন্‌ সালে তারে মারে ফেলা পুরিবো।

যিশাইয় 58:13

“যুনি তুমি জিরেবার দিন্নো পালঅ আর মর্ সুদ্ধো-সাংগ দিন্নো নিজোরে হুজি ন-গরঅ, যুনি জিরেবার দিন্নোরে ফুত্তিবলা ন-গরঅ আর লগেপ্রভুর দিন্নোরে সর্মানর যগাজ্যে মনে গরঅ, যুনি নিজো হুজি ধোক্ক্যেন ন-চলিনে সেই দিন্নোর সর্মানান্ রাগঅ আর যিয়েন হুজি সিয়েন ন-গরঅ বা বাজে কধা ন-কঅ,

যিশাইয় 58:3

তারা কন্, আমি উবোস্ থেইয়্যেই আর তুই সিয়েন ন-চেলে কিত্তে? আমি দুঘ্ স্বিগের্ গোজ্যেই আর তুই সিয়েন খিয়েল্ ন-গুরিলে কিত্তে? মাত্তর্ চঅ, তমা উবোস্ থেবার দিন্নোত্ তুমি দঅ নিজোরে বুঝেই রাগঅ, আর তমার বেক্ কামগুরিয়্যেগুনো উগুরে অত্যেচার গুরি থাগঅ।

যিশাইয় 58:5

মুই কি এবাবোত্যে উবোস্ থানাগান্ চেইয়োং? তমার্ উবোস্ থানাগান দঅ বানা নিজোরে দুঘ্ দেনা; সিয়েন বানা নল-খাগাড়া ধোক্ক্যেন মাঢাবো লোঙেয়্যে আর বস্তা ফাদা আহ্ ছেইয়ো উগুরে পড়ি থানা। ইয়েনরে কি তুমি উবোস্ থানা আর লগেপ্রভুর দোয়্যে দেগেবার দিন কঅ?

দানিয়েল 10:12

তে কুয়ো ধুরিলো, “দানিয়েল, ন-দোরেচ্। পত্তম্ যেদিন্যে তুই দর্শনানর পৌইদ্যেনে বুঝিবাত্তে আর তর্ গোজেন মুজুঙোত্ মনান্ ভাঙিনে দুঘ্ স্বীগের্ গুরিবাত্তে মনান্ থির্ গোজ্যস সেদিন্যে তঅ কধা শুনো ওইয়্যে আর সেনত্তে মুই এচ্চ্যং।

দানিয়েল 10:3

সেই তিন সাপ্তা থুম্ ন-অনা সং কনঅ গম্ হানা মুই ন-হাং, য়েরা বা আংগুর-রস মুয়োত্ ন-দুয়োং আর তেলঅ ন-গুলোং।

লেবীয় 23:21

সেদিন্ন্যে তুমি এক্কো পবিত্র মিলন-সভা জানেই দিবা। সেদিন্যে তমার্‌ কনঅ দুঘোর্ কাম গরানা ন চলিবো। তুমি যিয়োদোই বজত্তি গত্তা সাৎ বংশর পর বংশ ধুরি ইয়েন্‌ অবঅ তমাত্তে এক্কান থিদেবর্ গোজ্যে সুদোম।

লেবীয় 23:3

সাপ্তায় ছদিন তুমি কাম্‌ গুরি পারিবা মাত্তর্‌ সাত দিনোত্‌ অবঅ জিরেবার্‌ দিন, অত্তাৎ পবিত্র মিলন-সভার দিন। এ দিনোত্‌ তুমি কনঅ কাম্‌ ন-গুরিবা। তুমি যিয়েনত্‌ বজত্তি গত্তা সাৎ এ দিন্য অবঅ লগেপ্রভুর নাঙে জিরেবার্‌ দিন।”

লেবীয় 23:36

এ সাত দিনো ভিদিরে পত্তিদিন লগেপ্রভুর্ নাঙে আগুন্দোই-গোজ্যে উৎসর্বর অনুষ্ঠান গরা পুরিবো। সে পরেদি আস্টো দিনোত্‌অ তমার পবিত্র মিলন-সভা অবঅ আর লগেপ্রভুর্ নাঙে আগুন্দোই-গোজ্যে উৎসর্বর অনুষ্ঠান গরা পুরিবো। ইবে শেজ্ দিনোত্‌ বিশেজ্ সভা; সেদিন্যে তমার কনঅ দুঘোর্ কাম গরানা ন-চলিবো।

লেবীয় 25:9

সে পরেদি বজরর্‌ সাত মাজর্‌ দশ দিনোত, অত্তাৎ পাপ ঢাগি দিবার্‌ দিন্নোত্‌ তমার দেজত্‌ বেক্‌ জাগানিত্‌ শিংগা বাজা পুরিবো।

লেবীয় 3:17

“তুমি যিয়েনত্‌ থেদা সাৎ‌ তুমি কনঅ তেল্‌ বা লো ন-হেবা। ইয়েনই অবঅ বংশর্‌ পর বংশ ধুরিনে তমাত্তে এক্কান্‌ উমর সুদোম্।”

গণাণা 29:7

এই সাত মাজর্ দশ দিনোত্অ এক্কো সুদ্ধো-সাংগ মিলন-সভা গরা পুরিবো। এই দিন্নোত্‌ তুমি পত্তিজনে নিজোর্‌ মনানি ভাঙিচুরি দুখ্‌ স্বীগের গুরিবা আর বেক্‌ কাম গরানাগানি বন্ধ রাগেবা।

প্রেরিত্‌ 27:9

এবোত্যেগুরি ভালোক্ দিন বিদি গেলঅ। সেক্কে উবোস্ থানা-পরব্ থুম্ ওইনে জার্‌কাল প্রায় এচ্চ্যে। সেনত্তে জাহাজত্ গুরি যানা সেক্কে এক্কান্ দযার্ বেপার অলঅ। ইয়েনত্তে পৌলে জাহাজর্ মানুচ্চুনোরে উজিয়ার্ গুরিবাত্তে কলঅ,

১ করিন্হীয় 11:31

যুনি আমি নিজোরে বিচের্ গুরি চেই সালে আমি প্রভুর বিচের আঢত্তুন্ রেহাই পেই।

ইব্রীয় 4:10

কিয়া গোজেনে যেধোক্ক্যেন গুরি তার্ সৃট্টির কামানি থুম্ গুরিনে জিরেয়্যে ঠিগ্ সেধোক্ক্যেন গুরি যে মানুচ্চো গোজেনর দিয়্যে জিরেবার জাগানত্ যায়, তেয়ো তা কামত্তুন্ জিরেন পায়।

১ শমূয়েল 7:6

সেক্কে তারা বেক্কুনে মিস্পাদত্‌ এগত্তর্‌ অলাক। তারা পানি তুলিনে লগেপ্রভুর মুজুঙোত্‌ ঢালি দিইনে সেদিন্যে সিয়েনত্‌ উবোস থেলাক্ আর কলাক্কে, “আমি লগেপ্রভুর বিরুদ্ধে পাপ গোজ্যেই।” শমূয়েলে মিস্পাতত্তুন্‌ ইস্রায়েলীয়গুনোরে শাজন্ গুরিদো।