যোয়েল 2:17 - Chakma Bible

¹⁷ যিগুনে লগেপ্রভুর মুজুঙোত্ সেবা-কাম গরন্ সেই ধর্মগুরুগুনে উবোসনা-ঘরর্ বারান্দা আর পুজোবোর্ সংমোধ্যে কানোদোক্। তারা কোদোক্, “ও লগেপ্রভু, তঅ মানুচ্চুনো উগুরে তুই দোয়্যে গর্। তঅ সোম্বোত্তিগানরে ঈচ্ গরেপারা ন-গুরিচ্, জাদ ভিদিরে তারার্ নাঙানি ঈচ্ গরেপারা কধা অবাত্তে ন-দিচ্। অন্য জাদ মানুচ্চুনে কিত্তে কবাক্, ‘তারার্ গোজেনে কুদু?’ ”

যোয়েল 2:17 ပူးပေါင်းရင်းမြစ်များ

১ রাজাবলী 6:3

তবনা-ঘরর্‌ আজল্‌ গুদিবোর্‌ মুজুঙেন্দি যে আজ্‌চালাগান এলঅ সিয়েন্‌ ঘরানর পাদাজ্যে মাপ মজিম্ কুড়ি আত্‌ পাদাজ্যে আর ঘরানর মুজুঙেত্তুন্‌ সিয়েনর লাম্বান্দি এলদে দশ আত্।

১ রাজাবলী 9:7

মাত্তর্‌ ইস্রায়েলীয়গুনোরে যে দেজ্‌ছান মুই দুয়োং সিয়োত্তুন্‌ মুই তারারে ধাবেই দিম্‌। যে তবনা-ঘরান মুই মর্‌ থেবারঘর্‌ ইজেবে যুদো গোজ্যং সিয়েন্অ মঅ চোগো মুজুঙেত্তুন্‌ দূর্‌ গুরি দিম। সেক্কে ইস্রায়েলানে অন্য বেক্‌ জাত্তুনোর্‌ ইদু ঈচ্‌গোজ্যা আর চোগোছাল্ অবঅ।

২ বংশধর 7:20

সালে মুই মর্‌ যে দেজ্‌চান তমারে দুয়োং সিয়েনত্তুন্‌ শিঙোর্‌ সুদ্ধো উগুরে ফেলেম্‌ আর মঅ নাঙে যে উবোসনা-ঘরান্‌ যুদো গোজ্যং সিয়েন্‌ মঅ চোগো মুজুঙোত্তুন্‌ দূর্‌ গুরি দিম্‌। সেক্কে বেক্‌ জাদ্‌তুনো ইদু মুই সে ঘরানরে ঈচ্ গরানা আর তামাজার্‌ কান্ড গুরি তুলিম্‌।

২ বংশধর 8:12

উবোসনা-ঘরর্‌ আস্‌ছালার্‌ মুজুঙোত্‌ শলোমনে লগেপ্রভুর যে ডালিপূজোবো বানেয়্যে তা উগুরে তে লগেপ্রভুর নাঙে পূজ্যে-উৎসর্বর অনুষ্ঠান গুরিদো।

নহিমিয় 9:36

“চঅ, এচ্ছ্যে আমি চাগর্‌; যে দেজ্‌ছান তুই আমা পূরোণিমানুচ্চুনোরে দুয়োচ্‌ যেনে তারা সিয়েনর্‌ ফলুন্‌ আর নানান্‌ বাবোত্যে গম্‌ জিনিসছানি হেই পারিই আমি সিয়োদোই চাগর্‌ ওই রোইয়্যেই।

গীতসংহিতা 115:2

অন্য জাদ্‌তুনে কিত্তে কবাক্, “কুদু তারার গোজেন?”

গীতসংহিতা 42:10

মর্ শত্রুগুনে যেক্কেনে মরে ঠাট্টা গুরিনে বানা কন্দে, “কুদু গেলঅ তর্ গোজেনে?” সেক্কেনে মর্ অবস্থাগান এন্ অয় যেন আড়ুন নিগুজ্ ওই যাদন্।

গীতসংহিতা 42:11

ও মর্ পরাণান, কিত্তেই তুই আজা আরেয়োজ্? কিত্তেই এদক্ ওলোমোত্য ওইয়োজ্? গোজেন উগুরে আজা রাগা, কিয়া মুই আরঅ তার বাঈনী গুরিম; তে মর্ উদ্ধোর্ গুরিয়্যে আর মর্ গোজেন।

গীতসংহিতা 42:3

মঅ চোগোর পানিগানই মর্ দিনো-রেদোর খরাগ্ ওইয়্যে; আর ইন্দি মান্‌‌জ্যে মরে বানা কদন্, “কুদু গেলঅ তর্ গোজেনে?”

গীতসংহিতা 42:4

কানানিলোই মুই যেক্কেনে নিজোরে মনত্ তুলোং, সেক্কেনে মত্তুন্ মনত্ পড়ে কেধোক্ক্যেন্ গুরি ভালোক্কুন পরব্ পালেয়্যে গুনোরে নিইনে মুই হুজির আর ভালেদির্ রঅ ছাড়দে ছাড়দে মিছিল গুরিনে গোজেনর ঘরত্ যেদুং।

গীতসংহিতা 74:10

ও গোজেন, শত্রুগুনে আর কয়দিন ঠাট্টা-তামাজা গুরিবাক্? জিংকানিবর্ কি শত্রুগুনে তর্ নাঙান অগমান গুরিবাক্?

গীতসংহিতা 79:10

অন্য জাদ্‌তুনে কিত্তে কবাক্, “কুদু গেলঅ তারার গোজেনে?” তুই আমা মুজুঙোত্ তারারে জানেই দে, তঅ চাগরুনোর লো ঝড়ানার হেনাগান তুই নিবে।

গীতসংহিতা 79:4

পাড়াল্যেগুনো ইদু আমি মুয়োন দেগেই ন-পারির্, আমা চেরোকিত্যে মানুচ্চুনোর ইদু ঈচ্ গরা হেইয়্যে মানুচ্ ওইয়্যেই।

গীতসংহিতা 89:41

যিগুনে তা দেজর্ কায়-কুরেন্দি যান তারা বেক্কানি লুদোন্; তার পারাল্যে জাদ্‌তুনোর ইদু তে ইংসে গরা হেইয়্যে ওইয়্যে।

গীতসংহিতা 89:51

ও লগেপ্রভু, তর্ শত্রুগুনে সেই অগমানান্ গোজ্যন; অগমান গোজ্যন তর্ অভিষিক্ত মানুচ্চোরে তার বেক্কানিত্।

যিশাইয় 22:12

সেদিন্যে বেগত্তুন্ খেমতাবলা প্রভু লগেপ্রভু কানিবার্ বা আবিলেচ্ গুরিবাত্তে, মাঢাবো চুলানি মুড়েবাত্তে আর বস্তা পাদা পিনিবাত্তে তমারে ডাক্ক্যে।

যিশাইয় 37:20

ইক্কিনে ও আমার গোজেন লগেপ্রভু, আসিরিয়ার রাজা আঢত্তুন্ তুই আমারে রোক্ষ্যে গর্, যেনে পিত্‌থিমীর বেক্ রেজ্যগানিয়ে জানি পারে, তুই, বানা তুয়ই লগেপ্রভু।”

যিহিষ্কেল 20:9

মাত্তর্ মঅ সুনাঙান্ রোক্ষ্যে গুরিবাত্তে মুই সিয়েন ন-গরং, যেনে তারা যে জাদ্‌‌‌‌তুনো ভিদিরে বজত্তি গোজ্যন তারা ইধু মঅ নাঙান্ অসিজি ন-অয়। মিসর দেজত্তুন্ ইস্রায়েলীয়গুনোরে নিগিলেই আনিনে সেই বেক্ জাদ্‌‌‌‌তুনোর চোগো মুজুঙোত্ মুই ইস্রায়েলীয়গুনো ইধু নিজোরে ফগদাং গুরিলুং।

যিহিষ্কেল 8:16

সে পরেদি তে মরে লগেপ্রভুর ঘর ভিদিরে উদোনত্ নেযেল আর সিদু উবোসনা-ঘরত্ সোমেবার মুয়োনত্ বারান্দা আর পূজোর্ সংমোধ্যে পেরায়্ পোজোশ্‌জন মানুচ্ এলাক্। লগেপ্রভু ঘর ইন্দি পিজেদি ফিরিনে পূগেদি মু গুরি তারা বেলানরে জু জু জানাদন্।

হোশেয় 14:2

তুমি লগেপ্রভু ইধু ফিরি এইনে তারে কঅ, “আমা বেক্ পাপ্‌পানি খেমা গর্ আর আমার যিয়েনি গম্ সিয়েনি মানি লঅ যেনে আমি গোরু উৎ‌সর্গ ধোক্ক্যেন গুরি আমা মুয়োদি তরে বাঈনী গুরি পারিই।

যোয়েল 1:13

ও ধর্মগুরুগুন, তুমি বস্তা পিনিনে আবিলেচ্ গরঅ; পূজোত্ যিগুনে সেবার কাম গরঅ তুমি আবিলেচ্ গরঅ। যিগুনে মর্ গোজেনর সেবা গরঅ তুমি এইনে বস্তা পিনিনে রেত্তো কাদঅ, কিত্যেই তমা গোজেন ঘরত্ শোজ্য-উৎসর্ব আর পানীয়-উৎসর্বর অনুষ্ঠান বন্ধ গরা ওইয়্যে।

যোয়েল 1:9

লগেপ্রভুর ঘরত্তুন্ শোজ্য-উৎসর্ব আর পানীয়-উৎসর্বর্ অনুষ্ঠান বাদ দিয়্যে ওইয়্যে। যিগুনে লগেপ্রভুর সেবা গরন্ সেই ধর্মগুরুগুনে আবিলেচ্ খাদন্।

আমোষ 7:2

সিগুনে যেক্কে দেজর্ য়্যেল্ গাজ-বাজ্ হেইনে শেজ্ গুরি দিলাক্ সেক্কে মুই কোজোলী গুরিনে কলুং, “ও প্রভু লগেপ্রভু, খেমা গর্। যাকোবে কেধোক্ক্যেন গুরি বাঁজি থেবঅ? তে দঅ অমকদ চিগোন্।”

আমোষ 7:5

সেক্কে মুই কোজোলী গুরি কলুং, “ও প্রভু লগেপ্রভু, মুই কোজোলী গরঙর্ তুই থামা। যাকোবে কেধোক্ক্যেন গুরি বাঁজিবো? তে দঅ অমকদ চিগোন।”

মীখা 7:10

সেক্কে আমা শত্রুগুনে সিয়েন দেগিনে অমকদ লাজেবাক্। তারা দঅ আমারে কদাক্, “তমার্ গোজেন লগেপ্রভু কুধু?” মাত্তর্ আমা চোগ্‌‌‌কুনে তারারে পত্তে দেগিবাক্; এন্ কি, পধ কাদা ধোক্ক্যেন তারারে টেঙোই মাড়া অবঅ।‌

মালাখি 1:9

ইক্কিনে গোজেন ইধু দোয়্যে চেইনে কি লাভ? তমা আঢ্‌তানিলোই যেক্কে এবাবোত্যে উৎসর্ব গরা ওইয়্যে, সেক্কে তে কি আমারে গুজি লবঅ? শুনো, বেগত্তুন্ খেমতাবলা লগেপ্রভু কি কোইয়্যে,

গণাণা 25:6

সেক্কে মোশি আর ইস্রায়েলীয়গুনে বেক্কুনে যেক্কে মিলন-তাম্বুলো ইদু কানাকাদি গত্তন্‌ সেই সময়োত্‌ এক্কো ইস্রায়েলীয় তারার্‌ চোগো মুজুঙোন্দি এক্কো মিদিয়নীয় মিলেরে তা গোর‌্‌বোর্‌ মানুচ্চুনো ভিদিরে নেযেল।

মথি লেখ্যে গম্ হবর্ 23:35

সেনত্তে নিদ্দুজি হেবল খুনোত্তুন্ ধুরি আরাম্ভ গুরিনে তুমি যে বরখিয়র্ পুয়ো সখরিয়রে পবিত্র জাগা আর পূজোবো সংমোধ্যে খুন্ গোজ্য, সেই সখরিয়র খুন্ সং পিত্‌থিমীত্ যিদুক্কুন্ নিদ্দুজি মানুচ্ খুন্ ওইয়োন্ তুমি সেই বেক্ লো-গানির্ দায়ী অবা।

মথি লেখ্যে গম্ হবর্ 27:43

তে গোজেন উগুরে বিশ্বেজ্ গরে; ইক্কিনে যুনি তা উগুরে হুজি থায় সালে তারে তে উদ্ধোর্ গোরোক্। তে দঅ নিজোরে গোজেনর্ পুয়ো কদঅ।”

দ্বি’লম্বর বিররণ 28:37

লগেপ্রভু তমারে যিদুক্কুন জাদ ভিদিরে ধাবেই দিবো তারা তমার অবস্থা দেগিনে দরে গির্‌গিরে উদিবাক, আর তারা তমারে ঈস্ গুরিবাক আর ভান্ন্যেই কধান্দি গুবিবাক।

দ্বি’লম্বর বিররণ 32:27

মাত্তর্‌ মুই হবর্ পেদুং ইয়েনত্‌ শত্রুগুনে বাড়্‌বো দেগেবাক্ আর ন-বুঝিনে কবাক্কে, তারা জিত্তোন্; লগেপ্রভু ইয়েনি কিচ্চু ন-গরে।”

যিহোশূয় 7:9

কনানীয়গুনে আর এ দেজর্‌ অন্য মানুচ্চুনে এ কধানি শুনিবাক্‌ আর তারা আমারে ঘিরিবাক্‌ আহ্‌ দুনিয়ের্‌ বুগোত্তুন আমা নাঙানি বাদ দিবাক্‌। ইয়েনর্ পরেন্দি তুমি কিঙিরিনে তমার সুনাঙানি রোক্ষ্যে গুরিবা?”