যোয়েল 2:12 - Chakma Bible

¹² লগেপ্রভু ফগদাং গোজ্যে, “মাত্তর্ ইক্কিনে তুমি উবোস, কানাকুদি আর আবিলেচ্ গুরিনে বেক্ মনান্ দিইনে মইদু ফিরি এজঅ।”

যোয়েল 2:12 ပူးပေါင်းရင်းမြစ်များ

২ শমূয়েল 24:10

মানুচ্চুনোরে গুণিবার পরেন্দি দায়ূদো বিবেগত্‌ ধুরিলো। তে লগেপ্রভুর ইদু তবনা গুরিনে কলঅ, “মুই এ কামান গুরিনে জদবদে পাপ গোজ্যং। ও লগেপ্রভু, কোজোলী গরঙর্‌, তুই তঅ চাগরবোর্‌ এ অন্যেয়ানি দূর্ গুরি দে। মুই জদবদে ভুল্‌ মান্‌জ্যর কাম্ গোজ্যং।”

২ বংশধর 30:6

রাজার উগুমে রাজা আর তার্‌ কামগুরিয়্যেগুনো ইত্তুন্‌ চিদি নেযেইনে মানুচ্চুনে ইস্রায়েল আর যিহূদার বেক্‌ জাগানিত্‌ যেইনে এ কধাগান ফগদাঙ্‌ গুরিলাক্‌, ও ইস্রায়েলীয়গুন, তুমি অব্রাহাম, ইসহাক আর ইস্রায়েলর গোজেন লগেপ্রভু ইদু ফিরি এজঅ, সেক্কে যিগুনে আসিরিয়ার রাজা আঢত্তুন্‌ রোক্ষ্যে পেইয়োন্‌ তারা ইদু, অত্তাৎ তমা ইদু তেয়ো ফিরি এবঅ।

২ বংশধর 6:27

সালে তুই স্বর্গত্তুন্‌ সিয়েনি শুনিচ্‌ আর তঅ চাগরুনোরে, অত্তাৎ তর্‌ মানুচ্‌ ইস্রায়েলীয়গুনোর পাপ্পানি খেমা গুরি দিজ্‌। জীংকানিগানত্‌ গমেডালে চলিবাত্তে তারারে শিক্ষ্যে দিজ্‌ আর সোম্বোত্তি ইজেবে যে দেজ্‌ছান তুই তারারে দুয়োচ্‌ সে দেজ্‌ছান উগুরে ঝড় দিজ্‌।

ইষ্টের 4:16

“তুই যেইনে শূশনত্‌ থেইয়্যে বেক্‌ যিহূদীগুনোরে এগত্তর্‌ গর্‌ আর মত্তেই বেক্কুনে উবোস্‌ থাদোক্। তুমি তিন দিন সং রেদোত্‌ বা দিনোত্‌ কনঅ কিচ্ছু হানা-দানা ন-গুরিবা। তুমি যেধোক্কেন্‌ উবোস থেবা সেধোক্কেন্‌ মুই আর মর্‌ চাগরানীগুনেয়ো উবোস্‌ থেবাক্‌। সে পরেন্দি যুনিয়ো সিয়েন্‌ সুদোমর্‌ উল্লোমি অয় তো মুই রাজার ইদু যেম্‌। সেক্কে যুনি মত্তুন্‌ মরা পড়েদে অয় মুই মুরিম্‌।”

যাত্রা 33:5

কিত্তে লগেপ্রভু মোশিরে কোইয়্যেদে, “ইস্রায়েলীয়গুনোরে কোইদে, তারা এক্কো একবুচ্চ্যে জাদ্। সেনত্যে যুনি মুই কানক্কন্অ তারা সমারে থাং, সালে মুই‌ তারারে শেজ্ গুরি ফেলেম্‌। তারার কিয়্যেত্‌ সনা-রূবো যেদক্কানি আঘে সিয়েনি ইক্কিনে তারা খুলি ফেলাদোক্‌। সে পরেদি মুই ঠিগ্ গুরিম্‌ তারারে নিইনে মুই কি গুরিম্‌।”

যিশাইয় 22:12

সেদিন্যে বেগত্তুন্ খেমতাবলা প্রভু লগেপ্রভু কানিবার্ বা আবিলেচ্ গুরিবাত্তে, মাঢাবো চুলানি মুড়েবাত্তে আর বস্তা পাদা পিনিবাত্তে তমারে ডাক্ক্যে।

যিশাইয় 58:4

উবোস্ থানার্ ফলে তুমি কোল্-কোজ্যে গুরি থাগঅ আর ঘুষি মারিনে একজন আর একজনরে আঘাত্ গুরি থাগঅ। তুমি এবাবোত্যেগুরি উবোস্ থেলে আশা গুরি ন-পারিবাদে যে, মুই তমা কধানি শুনিম্।

যিরমিয় 3:22

লগেপ্রভু কোইয়্যেদে, “ও ভান্ন্যেই পধেদি যেইয়্যে পুয়োছাগুন, ফিরি এজঅ; তমার্ ভান্ন্যেই পধেদি যেইয়্যে পিড়েনি মুই গম্ গুরি দিম।” সেক্কে ইস্রায়েলীয়গুনে কবাক্, “অয়, আমি তইধু এবং, কিত্তে তুয়ই আমার গোজেন লগেপ্রভু।

যিরমিয় 36:7

অয়ত তারা লগেপ্রভু ইধু তবনা গুরিবাক্ আর পত্তিজনে তারার ভান্ন্যেই পধত্তুন ফিরিবাক্, কিত্তে এ মানুচ্চুনো বিরুদ্ধে লগেপ্রভু অমকদ অহুজি আর রাগর্ কধা কোইয়্যে।”

যিরমিয় 4:1

লগেপ্রভু কোইয়্যেদে, “ও ইস্রায়েল, তুই যুনি ফিরি এবাত্তে চাজ্ সালে মইধু ফিরি আয়। যুনি তুই মঅ চোগো মুজুঙোত্তুন তর্ জঘন্য মূত্তিগুনোরে সোরেই দুয়োচ্ আর ভান্ন্যেই পধেদি ন-যাচ্,

যিরমিয় 4:2

যুনি তুই সত্যলোই, ন্যায়লোই আর সততালোই ‘জেদা লগেপ্রভুর নাঙে’ শমক্ খাচ্, সালে মুই অন্য জাদ্‌তুনোরে বর্ দিম্ আর তারা মরে নিইনে বাঈনী গুরিবাক্।”‌‍‌

যিহিষ্কেল 33:11

তুই তারারে কঅ, মুই প্রভু লগেপ্রভু, মর্ জিংকানির নাঙে কঙর্, পাজি মানুচ্চুনোর মরণত্তে মুই কনঅ হুজি ন-অং, বরং তারা যেন ভান্ন্যেই পধত্তুন্ ফিরিনে বাঁজন্ সিয়েন্দোই মুই হুজি অং। ও ইস্রায়েল জাদ্, তুমি ফিরো, তমা ভান্ন্যেই পধত্তুন্ তুমি ফিরো। কিত্তে তুমি মুরি যেবা?

দানিয়েল 9:3

সেনত্তে মুই উবোস্ থেইনে, বস্তা পাদা পিনিনে আর ছেই মিগিনেই কোজোলী আর আওজে প্রভু গোজেন ইধু তবনা গুরিলুং।

হোশেয় 12:6

ইক্কিনে ও যাকোব-বংশর মানুচ্চুন, তমা গোজেন ইধু তুমি ফিরি এজঅ; তুমি বিশ্বেজ্ আর ন্যায়বিচের্ রোক্ষ্যে গর্ আর নিত্য তমা গোজেনরে বাজ্জেই থাগঅ।

হোশেয় 12:7

লগেপ্রভু কত্তে, “ব্যবসায়ী ইফ্রয়িমে ঠগাইদ্যে পাল্লা বেবহার গরে; তে জোরজুলুম গত্তে গম্‌‌‌পায়।‌

হোশেয় 14:1

ও ইস্রায়েল মানুচ্চুন, তমা গোজেন লগেপ্রভু ইধু তুমি ফিরি এজঅ। তমার পাপত্তে তুমি ফেলা যেইয়্যে ওইয়ো।

হোশেয় 6:1

আঢঅ, আমি লগেপ্রভু ইধু ফিরি যেই। তেয়ই আমারে কট্টা কট্টা গোজ্যে, তে আমারে গম্অ গুরিবো; তেয়ই আমারে আঘাত্ গোজ্যে, তে আমারে ঘাগানি বানিয়ো দিবো।

যোয়েল 1:13

ও ধর্মগুরুগুন, তুমি বস্তা পিনিনে আবিলেচ্ গরঅ; পূজোত্ যিগুনে সেবার কাম গরঅ তুমি আবিলেচ্ গরঅ। যিগুনে মর্ গোজেনর সেবা গরঅ তুমি এইনে বস্তা পিনিনে রেত্তো কাদঅ, কিত্যেই তমা গোজেন ঘরত্ শোজ্য-উৎসর্ব আর পানীয়-উৎসর্বর অনুষ্ঠান বন্ধ গরা ওইয়্যে।

সখরিয় 7:3

তারা বেগত্তুন্ খেমতাবলা লগেপ্রভু ঘরর্ ধর্মগুরুগুনোরে আর ভাববাদীগুনোরে এ কধাগান পুযোর্ গুরিবাত্তে পাদেল, “আমি এদক্ বজর্ যেবাবোত্যেগুরি এচ্চ্যেই সেবাবোত্যে কি পাচ্ মাসত্ আবিলেচ্ গুরিবোং বা উবোস্ থেবং?”

সখরিয় 7:5

“তুই দেজর্ বেক মানুচ্চুনোরে আর ধর্মগুরুগুনোরে কঅ, ‘তুমি গত সত্তুর্ বজর সং পাচ্ আর সাত মাসত্ যে আবিলেচ্ গরর্ আর উবোস্ থর্ সিয়েনি লগেপ্রভুর নাঙে ন-গরঅ।

মালাখি 1:9

ইক্কিনে গোজেন ইধু দোয়্যে চেইনে কি লাভ? তমা আঢ্‌তানিলোই যেক্কে এবাবোত্যে উৎসর্ব গরা ওইয়্যে, সেক্কে তে কি আমারে গুজি লবঅ? শুনো, বেগত্তুন্ খেমতাবলা লগেপ্রভু কি কোইয়্যে,

প্রেরিত্‌ 26:20

যিগুনে দামেস্কত্ আঘন্ পত্তমে তারা ইধু, সে পরেদি যিগুনে যিরূশালেমত্ আর গোদা যিহূদিয়া রেজ্যত্ আঘন্ তারা ইধু আহ্ অযিহূদীগুনো ইধুয়ো মুই প্রচার গোজ্জ্যং, পাপত্তুন্ মনানি ফিরেইনে গোজেন ইন্দি তারার্ ফিরেনা উচিত্, আর এমন্‌ কাম্ গরানা উচিত্ যিয়েন্দোই প্রমাণ পায় যে, তারা মনানি ফিরেয়োন্।

বিচের গুরিয়্যেগুন 2:4

লগেপ্রভুর দূত্তো যেক্কে ইস্রায়েলীয়গুনো ইদু এ কধানি কলঅ‌ সেক্কে তারা দাঙর্‌ দাঙর্‌ গুরি কাঁনা ধুরিলাক্‌।

বিচের গুরিয়্যেগুন 20:26

সেক্কে ইস্রায়েলীয়গুনোর বেক্‌ মানুচ্চুনে বৈথেলত যেইনে লগেপ্রভুর ইদু বুঝিনে কানাকুদি গরা ধুরিলাক্‌। তারা সেদিন্যে সাজোন্যে সং উবোস্‌ থেলাক্‌ আর লগেপ্রভুর নাঙে পুজ্যে আর উদোলোলির্-উৎসর্বর পরব্‌ গুরিলাক্‌।

১ শমূয়েল 7:3

সেক্কে শমূয়েলে বেক্‌ ইস্রায়েলীয়গুনোরে কলঅ, “যুনি তুমি তমার বেক্‌ মনান্দোই আরঅ লগেপ্রভুর ইদু ফিরি এবাত্তে চঅ, সালে তমা ভিদিরেত্তুন অন্য জাদ্‌তুনোর্ দেব-দেবেদা আর অষ্টারোৎ দেবেদার মূত্তিগুন সোরেই দুয়ো আর লগেপ্রভুর ইন্দি নিজোর মনান্‌ ঠিগ্ গুরিনে বানা তারে সেবা গরঅ। সালে তে পলেষ্টীয়গুনোর আঢত্তুন তমারে উদ্ধোর গুরিবো।”

১ শমূয়েল 7:6

সেক্কে তারা বেক্কুনে মিস্পাদত্‌ এগত্তর্‌ অলাক। তারা পানি তুলিনে লগেপ্রভুর মুজুঙোত্‌ ঢালি দিইনে সেদিন্যে সিয়েনত্‌ উবোস থেলাক্ আর কলাক্কে, “আমি লগেপ্রভুর বিরুদ্ধে পাপ গোজ্যেই।” শমূয়েলে মিস্পাতত্তুন্‌ ইস্রায়েলীয়গুনোরে শাজন্ গুরিদো।