যোহন 3:2 - Chakma Bible

² একদিন রেদোত্ তে যীশু ইধু এইনে কলঅ, “মাষ্টরবাবু, মুই হবর্ পাং তুই এক্কো মাষ্টর্ ইজেবে গোজেনত্তুন্ এচ্চ্যস্, কিয়া তুই যেদক্কানি আমক্ অবার্ কাম্ গোজ্যস্, গোজেনে সমারে ন-থেলে কেঅ সিয়েনি গুরি ন-পারে।”

যোহন 3:2 ပူးပေါင်းရင်းမြစ်များ

১ রাজাবলী 17:24

সেক্কে সে মিলেবো এলিয়রে কলঅ, “মুই ইক্কিনে বুঝি পারিলুঙ্‌ তুই গোজেনর্‌ মানুচ্‌, আর লগেপ্রভু তঅ মাধ্যমে যিয়েনি কয় সিয়েনি সত্য।”

যিশাইয় 51:7

“যিয়েন ঠিগ্ তুমি যিগুনে সিয়েন হবর্ পহ্ আর যিগুনোর মনত্ মঅ শিক্ষ্যেগান আঘে, তুমি শুনো। তুমি মানজ্যর্ ঈচ্ গরানাগানি বা তারার্ অগমান গরানাগানি ন-দোরেয়ো,

যিরমিয় 38:16

সেক্কে রাজা সিদিকিয় ভিদিরে ভিদিরে যিরমিয় ইধু শমক্ হেইনে কলঅ, “যিবে আমারে নিজেস্ লবার্ বৈয়্যেরান দিয়্যে সেই জেদা লগেপ্রভুর নাঙে, মুই তরে মারেই ন-ফেলেম বা যিগুনে তরে মারেই ফেলেবাত্তে চাদন্ তারা আঢত্অ তরে ন-দিম।”

মথি লেখ্যে গম্ হবর্ 22:16

তারা হেরোদ দলর্ কয়েক্কো মান্‌জ্য লগে নিজোর্ কয়েক্কো শিচ্চ্যরে যীশু ইধু পাধেলাক। তারা যীশুরে কলাক্, “মাষ্টরবাবু, আমি হবর্ পেই তুই এক্কো গম্ মানুচ্। গোজেন পথ্‌তান পৌইদ্যেনে তুই সত্য শিক্ষ্যে দি থাচ্। মান্‌জ্যে কি মনে গুরিবাক্ ন-গুরিবাক্ সিয়েনিলোই তর্ কি অয়, কিয়া তুই কারঅ মু চেইনে কিচ্ছু ন-গরচ্।

মথি লেখ্যে গম্ হবর্ 23:7

তারা আদে-বাজারে সর্মান তগান্ আর চান্ যেনে মানুচ্চুনে তারারে মুরুব্বী বিলি ডাগন্।

মথি লেখ্যে গম্ হবর্ 23:8

কেঅ তমারে মুরুব্বী বিলি ডাগোক্ সিয়েন্ ন-চেয়ো, কিয়া তমার্ মুরুব্বী কধে বানা একজন আঘে, আর তুমি বেক্কুনে ভেই ভেই।

মার্ক 12:14

তারা যীশু ইধু এইনে কলাক্, “গুরু, আমি হবর্ পেই তুই এক্কো গম্ মানুচ্। মান্‌‌জ্যে কি মনে গুরিবাক্ ন-গুরিবাক্, সিয়েনিলোই তর্ কি অয়, কিয়া তুই কারঅ মুয়োন্ চেইনে কিচ্চু ন-গরচ্। তুই সত্যগুরিনে গোজেনর পথ্‌তান পৌইদ্যেনে শিক্ষ্যে দি থাচ্। ইক্কিনে তুই কঅ, মোশির সুদোম মজিম্ রোম-সম্রাটরে কি খাজানা দেনা উচিত?

যোহন 1:38

যীশু পিজেদি ফিরিনে তারারে এত্তে দেগিনে কলঅ, “তুমি কি তগর্?” যোহন শিচ্চ্যগুনে পুযোর্ গুরিলাক্, “রব্বি (অত্তাৎ মাষ্টরবাবু), তুই কুধু থাচ্?”

যোহন 10:38

মাত্তর্ যুনি গরং সালে মরে বিশ্বেজ্ ন-গুরিলেয়ো মঅ কামানি অন্তত বিশ্বেজ্ গরঅ। সেক্কে তুমি কোই পারিবা আর বুঝি পারিবা যে, বাবা মঅ সমারে আঘে আর মুই বাবা সমারে আঘং।”

যোহন 12:37

যুনিয়ো তে তারা মুজুঙোত্ চিহ্নো ইজেবে এদক্কানি আমক্ কাম্ গোজ্যে তো মানুচ্চুনে তা উগুরে বিশ্বেজ্ ন-গরন্।

যোহন 14:10

তুই কি বিশ্বেজ্ ন-গরচ্ যে, মুই বাবা সমারে আঘং আর বাবা মঅ সমারে আঘে? যেদক্কানি কধা মুই তমারে কং সিয়েনি মুই নিজোত্তুন্ ন-কং, মাত্তর্ বাবা, যে মঅ সমারে আঘে, তেয়ই তা কামানি গরের্।

যোহন 15:24

যেদক্কানি কাম্ আর কেঅ কনদিন্‌অ ন-গরন্ সে কামানি যুনি মুই তারা ইধু ন-গত্তুং সালে তারার্ দুষ্ ন-অদঅ। মাত্তর্ ইক্কিনে তারা মরে আর মঅ বাপ্পোরে দেক্ক্যন্ আর ঘিনেয়োন্।

যোহন 2:11

যীশু গালীল রেজ্যর্ কান্না আদামত্ চিহ্নো ইজেবে এই পত্তম আমক্ অবার্ কামান্ গুরিনে নিজোর মহিমাগান্ ফগদাং গুরিলো। ইয়েন্দোই তা শিচ্চ্যগুনে তা উগুরে বিশ্বেজ্ গুরিলাক্।

যোহন 20:16

যীশু তারে কলঅ, “মরিয়ম।” সেক্কে মরিয়মে ফিরি থিয়্যেইনে অরামীয় ভাষাদি যীশুরে কলঅ, “রব্বুনি।” রব্বুনি অত্তাৎ মাষ্টরবাবু।

যোহন 3:26

পরেদি তারা যোহন ইধু এইনে কলাক্, “মাষ্টরবাবু, যিবে যর্দনর্ উই পারত্ তঅ সমারে এলঅ আর যিবে পৌইদ্যেনে তুই সাক্ষ্য দুয়োচ্, চাহ্, তে বাপ্তিষ্ম দের্ আর বেক্কুনে তা ইধু যাদন্।”

যোহন 4:31

এ ভিদিরে তা শিচ্চ্যগুনে তারে কোজোলি গুরিনে কলাক্, “মাষ্টরবাবু, কিজু হা।”

যোহন 5:36

মাত্তর্ যোহন সাক্ষ্যত্তুন্অ বেশ্ দাঙর্ সাক্ষ্য মর্ আঘে, কিয়া বাপ্পো মরে যে কামানি গুরিবাত্যে দিয়্যে সিয়েনি মুই গরঙর্। আর সিয়েনি মঅ পৌইদ্যেনে এ সাক্ষ্যগান্ দের্ যে, বাবা মরে পাধেয়্যে।

যোহন 6:2

সয়-সাগোজ্যে মানুচ্‌ যীশুর্ পিযে পিযে যাহ্ ধল্ল্যাক্, কিয়া পিড়েল্ল্যেগুনো উগুরে তে যে চিহ্নো ইজেবে যেদক্কানি আমক্ অবার্ কাম্ গোজ্যে তারা সিয়েনি দেক্ক্যন্।

যোহন 7:31

মাত্তর্ মানুচ্চুনো ভিদিরে ভালোক্‌জনে যীশু উগুরে বিশ্বেজ্ গুরিনে কলাক্, “তে দঅ বোউত্ আমক্ কাম্ গোজ্যে। মশীহ এইনে কি তাত্তুন্-অ বেশ্ আমক্ অবার্ কাম্ গুরিবো?”

যোহন 9:16

সেক্কে ফরীশীগুনোত্তুন্ কয়েকজনে কলাক্, “সে মানুচ্চো গোজেনত্তুন্ ন-এজে, কিয়া তে জিরেবার্ দিন ন-পালায়।” অন্য ফরীশীগুনে কলাক্, “যে মানুচ্চো পাপী তে কেধোক্ক্যেন্ গুরি এবাবোত্যে আমক্ অইদে কাম্ গুরি পারে?” এবাবোত্যেগুরি তারা ভিদিরে কধার্ অমিল্ দেগা দিলো।

প্রেরিত্‌ 10:38

তুমি ইয়েন-অ কোই পারঅ যে, গোজেনে নাসরতর্ যীশুরে পবিত্র আত্মালোই আর খেমতালোই অভিষেগ্ গোজ্যে। গোজেনে তা সমারে এলঅ বিলিনে তে গম্ কাম গুরিনে বেড়েদ আর শদান আঢত্ যিগুনে দুঘ্ পেদাক্ তারারে বেক্কুনোরে গম্ গুরিদো।

প্রেরিত্‌ 2:22

ইস্রায়েলীয়গুন, এ কধাগান শুনো। নাসরত যীশুর মাধ্যমে গোজেনে তমা ইধু মহৎ আর আমক্ আমক্ কাম গুরিনে তমা ইধু প্রমাণ গোজ্যেদে, তে যীশুরে দিপাধেয়্যে; আর এ কধাগান দঅ তুমি কোই পারঅ।

ফিলিপীয় 1:14

ইয়েনবাদে, মর্ এ বন্দী অবস্থায় থানার্ কারনে বেশির্ ভাগ্ ভেইয়ুনে প্রভু উগুরে আরঅ বেশ্ গুরিনে নির্ভর্ গুরিবাত্তে শিক্ক্যন্ আর সেনত্যে তারা ন-দোরেইনে গোজেনর্ কধা প্রচার গত্তে আরঅ সাহচী ওইয়োন।

বিচের গুরিয়্যেগুন 6:27

সেনত্তেই গিদিয়োনে তার চাগরুনোত্তুন্‌ দশজনরে সমারে নেযেইনে লগেপ্রভুর কধা মজিম্‌ কাম্‌ গুরিলো। মাত্তর্‌ নিজোর্‌ গিরিরে আর আদামর মানুচ্চুনোর দরে তে কামান্‌ দিনোত্‌ ন-গুরিনে রেদোত্‌ গুরিলো।