যোহন 14:6 - Chakma Bible

⁶ যীশু থোমারে কলঅ, “মুয়ই পথ, সত্য আর জিংকানি। মঅ মাধ্যমে ন-গেলে কনজনে বাবা ইধু যেই ন-পারে।

যোহন 14:6 ပူးပေါင်းရင်းမြစ်များ

মথি লেখ্যে গম্ হবর্ 11:27

মঅ বাপ্পো বেক্কানি মঅ আঢত্ দিয়্যে। বাপ্পো বাদে পুয়োবোরে কনজনে হবর্ ন-পায় আর পুয়োবো বাদে বাপ্পোরে কনজনে হবর্ ন-পায়, আর পুয়োবো যাইদু বাবরে ফগদাং গুরিবাত্তে আওজ্ গরে তেয়ই তারে হবর্ পায়।

যোহন 1:14

সে কধাগানই মানুচ্‌ ওইনে জর্মেল আর আমা ভিদিরে বজত্তি গুরিলো। বাবা গোজেনর্ বানা এক্কো গুরি পুয়ো ইজেবে তার্ যে মহিমা সে মহিমাগান্ আমি দেক্ক্যেই। তে দোয়্যে আর সত্যলোই ভরা।

যোহন 1:17

মোশির্ মাধ্যমে রীদি-সুদোম দিয়্যে ওইয়্যে, মাত্তর্ যীশু খ্রীষ্টর্ মাধ্যমে দোয়্যে আর সত্য এচ্চ্যে।

যোহন 1:4

তা ভিদিরে জিংকানি এলঅ আর সেই জিংকানিগান্ এলঅ মান্‌জ্যর পহর্।

যোহন 10:28

মুই তারারে উমর্‌অ জিংকানি দুয়োং। তারা কনদিন্অ নাশ্ ন-অবাক্ আর কনজনে মঅ আঢত্তুন্ তারারে কাড়ি ন-নিবাক্।

যোহন 10:7

সেনত্তে যীশু আরঅ কলঅ, মুই তমারে ঘেচ্চ্যেক্‌ গুরি কঙর্, ভেড়াগুনোত্যে মুয়ই দুয়োরান্।

যোহন 10:9

মুয়ই দুয়োরান্। যুনি কেঅ মঅ মাধ্যমে ভিদিরেদি সমে সালে তে উদ্ধোর্ পেবঅ। তে ভিদিরে এবঅ আর বারেদি যেবঅ আর চরত্ হেবার্ জাগা পেবঅ।

যোহন 14:19

খানক্কন্ পরেদি জগদ মানুচ্চুনে আর মরে ন-দেগিবাক্, মাত্তর্ তুমি দেগিবা। মুই জেদা আঘং কিনেই তুমিয়ো জেদা থেবা।

যোহন 15:1

মুয়ই আজল্ আংগুর্ গাজ্ আর মঅ বাপ্পো গিরোজ্।

যোহন 18:37

পীলাতে যীশুরে কলঅ, “সালে তুই কি রাজা?” যীশু কলঅ, “তুই ঠিগই কোইয়োচ্ যে, মুই রাজা। সত্যর্ পক্ষে সাক্ষি দিবাত্যে মুই জোর্মেয়োং আর সেনত্তে মুই জগদত্ এচ্চ্যং। যে কেঅ সত্যর্ তে মঅ কধা শুনে।”

যোহন 5:21

বাপ্পো যেবাবোত্যেগুরি মরাগুনোরে জিংকানি দিইনে তুলে ঠিগ্ সেবাবোত্যেগুরি পুয়োবোয়ো যিবেরে আয়োচ্ গরে তারে জিংকানি দে।

যোহন 6:33

স্বর্গত্তুন্ লামি এইনে যিবে মান্‌জ্যরে জিংকানি দে তেয়ই গোজেনর্ দিয়্যে রুটি।”

যোহন 6:51

মুয়ই সেই জিংকানি-রুটিগান্ যিয়েন স্বর্গত্তুন্ লামি এচ্চ্যে। এ রুটিগান্ যে হেবঅ তে উমরত্তে জিংকানি পেবঅ। মঅ কিয়্যেগানই সেই রুটিগান্। মান্‌জ্যে যেন জিংকানি পান্ সেনত্তে মুই মর্ এ কিয়্যেগান্ দিম্।”

যোহন 6:57

জেদা বাবা মরে দিপাধেয়্যে আর তাত্যেই মুই জেদা আঘং। ঠিগ্ সেবাবোত্যেগুরি যে মরে খায় তেয়ো মত্তে জেদা থেবঅ।

যোহন 6:68

শিমোন-পিতর যীশুরে কলঅ, “প্রভু, আমি কা ইধু যেবং? উমর জিংকানির্ কধা দঅ তইধু আঘে।

যোহন 8:32

সিয়েন বাদে তুমি সত্যগানরে কোই পারিবা, আর সে সত্যগানে তমারে উদ্ধোর্ গুরিবো।”

যোহন 8:51

মুই তমারে ঘেচ্চ্যেক্‌গুরি কঙর্, কেঅ যুনি মঅ কধা মজিম চলন্ সালে তে কনদিন্অ ন-মুরিবো।”

প্রেরিত্‌ 3:15

যিবে জিংকানি দিয়্যে তারে তুমি মারে ফেল্ল্য, মাত্তর্ গোজেনে মরণত্তুন্ তারে জেদা গুরি তুল্ল্যে; আর আমি সিয়েনর্ সাক্ষী।

প্রেরিত্‌ 4:12

পাপত্তুন্ উদ্ধোর্ আর কারঅ ইধু পাহ্ ন-যায়, কিয়া গোদা পিত্‌থিমীত্ আর এমন্‌ কেঅ নেই যিবের্ নাঙে আমি পাপত্তুন্ উদ্ধোর্ পেই পারিই।”

রোমীয় 5:2

গোজেনর্ এই যে দোয়্যের্ পধেদি ইক্কিনে আমি চলির্ সিধু আমি খ্রীষ্টর্ মাধ্যমে বিশ্বেজ্‌চোই লুম্মেয়ি। গোজেনর্ মহিমা পেবার্ আজায় আমি ফুত্তি গুরির্।

রোমীয় 5:21

সেই দোয়্যেগান ইয়েনত্তে বাড়িলো যাতে মরণর্ মাধ্যমে যেবাবোত্যেগুরি পাপ্পান্ রাজাগিরি গোজ্জ্যে, সেবাবোত্যেগুরি মান্‌জ্যরে নিদ্দুজি বিলি মানি লনার্ মাধ্যমে ইক্কিনে তার্ দোয়্যেগানে রাজাগিরি গুরিই পারে; আর সিয়েনর্ ফল অলঅ আমা প্রভু যীশু খ্রীষ্টর্ মাধ্যমে উমর জিংকানি পানা।

১ করিন্হীয় 15:45

পবিত্র বোইবোত্ এবাবোত্যে গুরি লেগা আঘে, “পত্তম মানুচ্‌ আদম জেদা প্রাণী অলঅ।” আর শেজ্ আদম জিংকানিদান গুরিয়্যে আত্মা অলঅ।

ইফিষীয় 2:18

তার্ মাধ্যমে একই পবিত্র আত্মালোই বাবা ইধু যেবার্ অধিকার আমার বেক্কুনোর্ আঘে।

কলসীয় 2:17

ইয়েনি দঅ এলঅ আগামিদি যিয়েনি অবঅ সিয়েনির ছাবা, মাত্তর্ যিয়েন আজল্ সিয়েন খ্রীষ্ট ভিদিরে আঘে।

কলসীয় 2:9

গোজেনর্ বেক্‌ পরিপূরোনান্ খ্রীষ্ট ভিদিরে কিয়্যেলোই বজত্তি গরের্, আর খ্রীষ্ট লগে মিজেইনে তুমিয়ো সেই পরিপূরোণান্ পেইয়ো।

কলসীয় 3:4

যিবে তমার্ জিংকানি সেই খ্রীষ্ট যেক্কে ফগদাং অবঅ সেক্কে তুমিয়ো তা সমারে তার্ মহিমার ভাগী ওইনে ফগদাং পেবা।

ইব্রীয় 7:25

ইয়েনত্যে যিগুনে তা মাধ্যমে গোজেন ইধু এজন্ তারারে তে পুরোপুরি গুরিনে উদ্ধোর্ গুরি পারে, কিয়া তারার্ পৌইদ্যেনে কোজোলি গুরিবাত্যে তে নিত্য জেদা আঘে।

ইব্রীয় 9:8

ইয়েনত্ পবিত্র আত্মাগানে দেগেই দেত্তে যে, যেদক দিন এই উবোসনা তাম্বুলান থেবঅ সেদক দিন সেই দাঙর্ পবিত্র জাগানত্ সুমিবার পথ্‌তান খুলো ন-থেবঅ।

১ পিতর 1:21

গোজেনে তারে মরণত্তুন্ জেদা গুরি তুলিনে মহিমা দান গোজ্জ্যে আর তা মাধ্যমে তুমি গোজেন উগুরে বিশ্বেজ্ গোজ্জ্য; আর সেনত্যে তমার্ বিশ্বেজ্ আর আজা গোজেন উগুরে আঘে।

১ পিতর 2:4

এমন এক্কো জেদা পাত্তর্ আঘে যিবেরে গোজেনে বেঈ লোইয়্যে আর যিবে তা চোগেদি অমকদ মংগা, মাত্তর্ মান্‌জ্যে তারে এলাফেলা গোজ্জ্যন্। খ্রীষ্ট অলঅ সেই পাত্তর্‌বো; তুমি তাইধু এচ্চ্য বিলিনে জেদা পাত্তর ধোক্ক্যেন গুরি তমারে দিইনেয়ো গোজেনর্ থেবার ঘরান্ বানা অর্। সেনত্যে ধর্মগুরু ইজেবে গোজেনত্যে তমারে ফারগ্ গরা ওইয়্যে, যেন তুমি এমন্‌ আত্মিক উৎসর্বয়ানি গরঅ যিয়েনি যীশু খ্রীষ্টর্ দিইনে গোজেনর্ মানি লোইয়্যে অয়।

১ পিতর 3:18

খ্রীষ্টয়ো পাপত্যে একবার মোজ্জ্যে। গোজেন ইধু আমারে নেযেবাত্যে সে নিদ্দুজি মানুচ্চো পাপীগুনোত্যে, অত্তাৎ আমাত্যে মোজ্জ্যে। কিয়্যেদি তারে মারে ফেলা ওইয়্যে, মাত্তর্ আত্মায় তারে জেদা গরা ওইয়্যে আর তে বন্দী আত্মাগুনো ইধু যেইনে ফগদাং গোজ্জ্যে।

১ যোহন 1:8

আমি যুনি কোই আমা ভিদিরে পাপ নেই সালে আমি নিজোরে ফাকি দিই। সেক্কে ইয়েনই বুঝো যায় যে, আমা মন ভিদিরে গোজেনর্ সত্যগান নেই।

১ যোহন 2:23

পুয়োবোরে যে অস্বীগের্ গরে তা সমারে বাবর্ কনঅ মিল্ নেই, মাত্তর্ পুয়োবোরে যে স্বীগের গরে তা সমারে বাবর্-অ মিল্ আঘে।

১ যোহন 5:20

আমি আরঅ কোই পরিই যে, গোজেনর্ পুয়োবো এইনে আমারে বুঝিবার খেমতা দিয়্যে যেন সত্য গোজেনরে আমি জানি পারিই। যিবে সত্য গোজেন আমি তা সমারে এগত্তর্, অত্তাৎ তা পুয়োবো যীশু খ্রীষ্ট সমারে এগত্তর্ আঘিই। তেয়ই সত্য গোজেন আর তেয়ই উমর্‌অ জিংকানি।

১ যোহন 5:6

ইবেই যীশু খ্রীষ্ট, যিবে পানি আর লো-লোই এচ্চ্যে। বানা পানিলোই নয়, মাত্তর্ পানি আর লো-লোই এচ্চ্যে। পবিত্র আত্মাগানে এ পৌইদ্যেনে সাক্ষি দে, কিয়া তে নিজেই সত্য।

২ যোহন 1:9

যিগুনে খ্রীষ্টর্ দিয়্যে শিক্ষ্যে ন-পালান্ আর সেই শিক্ষ্যেলোই থিদেবর্ ন-থান তারা মনভিদিরে গোজেনে নেই। মাত্তর্ যে সেই শিক্ষ্যেলোই থির্ গুরি থায় তা মনভিদিরে বাবে আর পুয়োবো দ্বিয়োজনে আঘন্।

ফগদাং পেইয়্যে 19:11

যেরেদি মুই দেগিলুং স্বর্গগান খুলো আঘে, আর সিয়েনত্ এক্কো ধুব্ ঘোড়া আঘে। যিবে সেই ঘোড়াবো উগুরে বৈ এলঅ তা নাঙান্ অলঅ বিশ্বেজবলা আর সত্য। তে গমেডালে বিচের্ আর যুদ্ধো গরে।

ফগদাং পেইয়্যে 22:1

সিয়েন পরেদি সেই স্বর্গদূত্‌তো মরে জিংকানি-পানির্ গাঙান্ দেগেল। সিবে ফুদিগো ধোক্ক্যেন সাব্ এলঅ আর গোজেনর্ আহ্ ভেড়া-ছবোর্ সিংহাসনত্তুন্ নিগিলিনে শঅর পধর্ সংমোধ্যেদি বেঈ যার্। সেই গাঙানর্ দ্বিয়ো পারত্ জিংকানি-গাজ্ এলঅ। সিয়েনত্ বার বাবোত্যে গুলো ধরন্। পত্তি মাজত্ সিগুনোত্ গুলো ধরন্ আর সেই পাদানিলোই বেক্ জাদর্ মানুচ্চুনে গম অন্।

ফগদাং পেইয়্যে 22:17

পবিত্র আত্মাগানে আর বৌবো কত্তে, “আয়”। আর যে এ কধাগান শুন্যে তেয়ো কোগ্, “আয়”। যিবের্ তিরেস্ পেইয়্যে তে এজোক্ আর যে পানি হেবাত্যে চায় তে মাগানা জিংকানি-পানি হেই যোক্।

ফগদাং পেইয়্যে 3:14

লায়দিকেয়া শঅরর্ মন্ডলী দূত্‌তো ইধু এ কধাগান লেগ- যিবে আমেন, যে বিশ্বেজি আর সত্য সাক্ষী, যিবে গোজেনর্ সৃট্টির গড়াগান, তে এ কধাগান কর্: মুই তর্ কামর কধানি কোই পারং।

ফগদাং পেইয়্যে 3:7

ফিলাদিল্‌ফিয়া শঅরর্ মন্ডলী দূত্‌তো ইধু এ কধাগান লেগ- যিবে পবিত্র আর সত্য, যাইধু দায়ূদোর চাবি আঘে, যিবে খুলিলে কেঅ বানি ন-পারে আর বানিলে কেঅ খুলি ন-পারে,