যোহন 10:11 - Chakma Bible

¹¹ মুয়ই আজল্ ভেড়া গরক্। আজল্ ভেড়া গরক্কো তা ভেড়াগুনোত্তে নিজো পরাণান্ দে।

যোহন 10:11 ပူးပေါင်းရင်းမြစ်များ

২ শমূয়েল 24:17

যে স্বর্গদূত্তো মানুচ্চুনোরে আঘাত্ গোজ্যে দায়ূদে তারে দেগিনে লগেপ্রভুরে কলঅ, “পাপ আর অন্যেয় মুই গোজ্যং। তারা দঅ ভেড়া ধোক্ক্যেন্‌। তারা কি গোজ্যন্? সেনত্তেই মরে আর মঅ বাব বংশবোরে তুই সাজা দিচ্‌।” দায়ূদে এক্কান ডালিপূজো বানেল।

গীতসংহিতা 23:1

লগেপ্রভু মর্ পালক, মর্ অভাব নেই।

গীতসংহিতা 80:1

ও ইস্রায়েলর পালক, তুই আমা কধানি শুন; তুই যোষেফর বংশবোরে ভেড়া পাল ধোক্ক্যেন গুরি চালেই নেযর্। তুই করূবপুনো উগুরে আগচ্, তর্ পহ্‌রান তুই ছিদি দে।

যিশাইয় 40:11

তে গরগ ধোক্ক্যেন্ গুরি তা ভেড়া পালুন চোরেব, ভেড়া ছঅগুন্ তে আঢ্‌তোই তুলি নিবো‌ আর করত্ গুরি তারারে বুয়োই নেযেব; ছঅ আগন্ এবাবোত্যে ভেড়িগুনোরে তে লাড়ে লাড়ে গুরি চালেই নেযেব।

যিশাইয় 53:6

আমি বেক্কুনে ভেড়া ধোক্ক্যেন গুরি ভান্ন্যেই পধেদি যেইয়্যেই; আমি বেক্কুনে যার্ যার্ পধেদি ফিজ্যেই। লগেপ্রভু আমার বেক্কুনোর অন্যেয়ানি তা উগুরে চাপি দিয়্যে।

যিহিষ্কেল 34:2

ও মান্‌‌‌‌‌‌‌জ্যর পুয়োবো, ইস্রায়েলর পালক্কুনো বিরুদ্ধে তুই ভাববাদী ইজেবে এ কধাগান কঅ, প্রভু লগেপ্রভু কোইয়্যেদে, অভিশাব্ পোড়োক্, ইস্রায়েলর সেই পালক্কুনোর, যিগুনে বানা নিজোর্ দেগাশুনো গরন্! ভেড়াপালর দেগাশুনো গরানা কি পালক্কুনোর্ উজিত্ নয়?

যিহিষ্কেল 34:23

মুই তারা উগুরে এক্কো গরগরে, অত্তাৎ মর্ চাগর্ দায়ূদোরে নেযেম; তে নিজেই তারারে দেগাশুনো গুরিবো আর তারার্ গরগ্ অবঅ।

যিহিষ্কেল 37:24

“‘মঅ চাগর্ দায়ুদে তারার্ রাজা অবঅ আর তারার্ বেক্কুনোর পালক একজন অবঅ। তারা মর্ রীদি-সুদোম মজিম্ চলিবাক আর মর্ বেক সুদোমানি উজিয়ার্ ওইনে পালেবাক্।

মীখা 5:4

সেই শাজন্‌গুরিয়্যেবো এইনে লগেপ্রভুর বল্লোই, তার গোজেন লগেপ্রভুর মহিমায় গরগ ধোক্ক্যেন তা মানুচ্চুনোরে চালেব। তারা গমেডালে বজত্তি গুরিবাক্, কিত্যে তে যে দাঙর্ সে কধাগান সেক্কে জগদর্ শেজ্ দুযি সং বেক্কুনে স্বিগের্ গুরিবাক্;

সখরিয় 13:7

বেগত্তুন্ খেমতাবলা লগেপ্রভু কত্তে, “ও লাম্বা ছুরিগান্, তুই মঅ গরগ্‌‌‌‌‌কোর্ বিরুদ্ধে, মঅ সমারে মানুচ্চুনোর্ বিরুদ্ধে, জাগি উদ্। গরগ্‌‌‌‌‌‌কোরে আঘাত্ গর্, সেক্কে ভেড়াগুন ছিদি পড়িবাক্; মুই ভেড়া ছঅগুনো বিরুদ্ধেয়ো মঅ আঢ্‌‌‌‌‌‌তানি তুলিম।

মথি লেখ্যে গম্ হবর্ 20:28

ইদোত্ রাগেয়ো, মান্‌জ্যপুয়োবো সেবা পেবাত্তে ন-এজে বরং সেবা গুরিবাত্তে এচ্চ্যে আর ভালোক্কুন্ মান্‌জ্যর্ উদ্ধোরর্ দাম্ ইজেবে তারা পরাণানির্ বদলে নিজো পরাণান্ দিবাত্তে এচ্চ্যে।”

যোহন 10:2

মাত্তর্ যে কেঅ দুয়োরানদি ভিদিরে যায় তেয়ই ভেড়াগুনোর্ গরক্।

যোহন 15:13

কেঅ যুনি তা সমাজ্যেগুনোত্তে নিজো পরাণান্ দে সালে তাত্তুন্ বেশ্ কোচ্‌পানা আর কারর্ নেই।

ইফিষীয় 5:2

খ্রীষ্ট যেধোক্ক্যেন গুরি আমারে কোচ্‌পেইয়্যে আর আমাত্যে গোজেনর্ উদ্দেচ্চ্যে তুমবাচ্‌‌‌‌বলা উৎসর্ব ইজেবে নিজোরে দিয়্যে, ঠিগ সেবাবোত্যেগুরি তুমিয়ো কোচ্‌পানার পধেদি চলঅ।

তীত 2:14

যীশু খ্রীষ্ট আমাত্যে নিজো জিংকানিগান দিয়্যে, যেন বেক্‌ পাপ্‌পানিত্তুন আমারে উদ্ধোর্ গুরি পারে আর সিয়েন্দোই এমন্‌ এক দল মান্‌জ্যরে সিজি গুরি পারে যিগুনে বানা তা মানুচ্ অবাক্ আর যিগুনে অন্যগুনোরে উপকার গুরিবাত্যে আয়োজি অবাক্।

ইব্রীয় 13:20

যে লো-গান্দোই শান্তি দিয়্যে গোজেনর্ উমর বেবস্থাগান অদে অদে ওইয়্যে সিয়েন্দোই গোজেনে আমা প্রভু যীশু খ্রীষ্টরে, অত্তাৎ ভেড়াগুনোর্ সেই দাঙর্ পালক্‌‌কোরে মরণত্তুন্ জেদা গুরি তুল্যে।

১ পিতর 5:4

সালে যেক্কে আজল্ গরগ্‌কো দেগা দিবো সেক্কে তুমি জিদেনার মালা ইজেবে তার মহিমার ভাগী অবা আর সিয়েন কনদিন্অ কুমি ন-যেবঅ।

১ যোহন 3:16

খ্রীষ্ট আমাত্যে নিজোর পরাণান্ দিয়্যে, সেনত্যে কোচ্‌পানা কি সিয়েন আমি কোই পাজ্জ্যেই। সালে ভেইয়ুনোত্যে নিজোর পরাণান্ দেনা আমার্‌অ উচিত।

ফগদাং পেইয়্যে 7:17

কিয়া সেই ভেড়া-ছবুয়ো যিবে সিংহাসন উগুরে বৈ আঘে তেয়ই ইগুনোর্ গরক্ অবঅ। তাজা পানির উইফুদ ইধু তে ইগুনোরে নেযেব, আর গোজেনে ইগুনোর চোগো পানি পুঝি দিবো।”