যিরমিয় 52:27 - Chakma Bible

²⁷ রাজা হমাৎ দেজর্ রিব্‌লাত ইগুন বেক্কুনোরে মারে ফেলেল। এবাবোত্যেগুরি যিহূদার মানুচ্চুনোরে বন্দী গুরিনে নিজোর্ দেজত্তুন্ দূরোত্ নেযা অলঅ।

যিরমিয় 52:27 ပူးပေါင်းရင်းမြစ်များ

২ শমূয়েল 8:9

হমাতর রাজা তয়ি শুনিলোদে, দায়ূদে হদদেষরর পুরো সৈন্যদলুনোরে ওদেই দিলো।

২ রাজাবলী 17:20

সেনত্তে লগেপ্রভু বেক্‌ ইস্রায়েলীয়গুনোরে বাদ দি দিলো। তে তারারে দুগোত্‌ ফেলেল আর লুটগুরিয়্যেগুনোর্‌ আঢত্‌ তুলি দিলো, আর যেরেন্দি নিজোর্‌ মুজুঙোত্তুন্‌ তারারে ধাবেই দিলো।

২ রাজাবলী 17:23

যেরেন্দি লগেপ্রভু তার্‌ বেক্‌ চাগরুনোরে, অত্তাৎ ভাববাদীগুনোর্‌ মাধ্যমে দিয়্যে উজিয়ারর্‌ কধা মজিম তার্‌ মুজুঙোত্তুন্‌ তারারে দূর্‌ গুরি দিলো। ইয়েনত্তেই ইস্রায়েলর মানুচ্চুনোরে তারার্‌ নিজোর্‌ দেজত্তুন্‌ বন্দী গুরিনে আসিরিয়া দেজত্‌ নেযা অলঅ, আর এজঅ তারা সিদু আগন্‌।

২ রাজাবলী 23:27

সেনত্তে লগেপ্রভু কলঅ, “মঅ মুজুঙেত্তুন্‌ যেধোক্ক্যেন গুরি মুই ইস্রায়েলরে দূর্‌ গোজ্যং সেধোক্ক্যেন গুরি যিহূদারেয়ো দূর্‌ গুরিম্‌, আর যে শঅরানরে মুই বেঈ লোইয়োং সে যিরূশালেমানরে আর যিবে পৌইদ্যেনে মুই কোইয়োং, ‘ইয়েন্‌ মর্‌ থেবার্‌ জাগা অবঅ’ সে তবনা- ঘরানরে মুই অগ্রাজ্য গুরিম।”

যিশাইয় 24:3

পিত্‌থিমীগান এক্কুবারে খালি ওই পড়ি থেবঅ, সিয়েন এক্কুবারে লুদো অবঅ। লগেপ্রভু এ কধাগান কোইয়্যেদে।

যিশাইয় 27:10

দেবাল্-ঘিজ্যে শঅরান্ মানুচ্ নেইয়্যে ওইয়্যে; সিয়েন ফেলেই যেইয়্যে জাগা আর ধূল্যেচর ধোক্ক্যেন ফেলেই যাহ্ ওইয়্যে। সিয়েনত্ গোরু ছঅ বেড়েবাক্ আর বুগ্‌গুরি থেবাক্; তারা গাজর্ বেক পাদানি হেই ফেলেবাক্।‌

যিশাইয় 43:28

সেনত্তে মুই তমা উবোসনা-ঘরর্ ধর্মগুরুগুনোরে অগমান গুরিম আর যাকোবরে ভস্তর্ অভিশাবর্ তলে গুরিম আর ইস্রায়েলরে ঠাট্টা-তামাজার্ মানুচ্ বানেম্।”

যিরমিয় 13:19

নেগেভর শঅরানির চোমেবার পথ্‌তানি নাঢি দিয়্যে অবঅ আর কনজনে সিয়েনত্ চোমেই ন-পারিবো। যিহূদার বেক্ মানুচ্চুনোরে বন্দী গুরি নেযা অবঅ, এক্কুবারে বেক্কুনোরে নেযা অবঅ।‌‍‍‍। ”

যিরমিয় 20:4

কিত্তে লগেপ্রভু কোইয়্যেদে, ‘মুই তরে তর্ নিজোর আর তঅ সমাজ্যেগুনো ইধু অমকদ দর্‌গরেপারা গুরিম। তুই নিজো চোগেদি যুদ্ধোত্ শত্রুগুনো আঢত্ তারারে মুরি যেবাত্তে দেগিবে। বেক্ যিহূদাগুনোরে মুই বাবিলো রাজা আঢত্ তুলি দিম। তে তারাত্তুন ভালোক্কুনোরে বাবিলোত্ নেযেব আর বাদবাগি মানুচ্চুনোরে মারে ফেলেব।‌

যিরমিয় 21:7

সে পরেদি মুই ভানা, যুদ্ধো আর ভাদরাদর্ আঢত্তুন বাঁজি থেইয়্যে যিহূদার রাজা সিদিকিয়রে, তার রাজকর্মচারিগুনোরে আর এ শঅরর্ বেক মানুচ্চুনোরে বাবিলোর রাজা নবূখদ্‌নিৎসরর‌‌‌‌ আঢত্ আর যিগুনে তারারে মারে ফেলেবাত্তে চান সেই শত্রুগুনো আঢত্ তুলি দিম। নবূখদ্‌নিৎসরে তারারে মারে ফেলেব; তে তারার কনঅ মেয়্যে, দোয়্যে ন-দেগেব। মুই লগেপ্রভু এ কধাগান কঙর্।’ ”

যিরমিয় 39:10

মাত্তর্ চুগিদারুনোর সেনাপতি নবূষরদনে জাগাজোমি নেইয়্যে কিজু নাঢা মান্‌জ্যরে যিহূদা দেজত্ থোই গেলঅ; সে অক্তত্ তে তারার আংগুর খেত্তান আর ভূইয়ানি দি গেলঅ।

যিরমিয় 39:9

সে অক্তত্ যিগুনে শঅরত্ থেলাক্, যিগুনে বাবিলর্ তপ্পে যেইয়োন আর দেজর্ বাদ্‌বাগি মানুচ্চুনোরে বাবিল রাজার চুগিদারুনোর সেনাপতি নবূষরদনে বন্দী গুরিনে বাবিলত্ নেযেল।

যিরমিয় 52:9

তারা সিদিকিয়রে বন্দী গুরিনে হমাৎ দেজর্ রিব্‌লাত বাবিল রাজার ইধু নেযেলাক্ আর সিদু তারে সাজার্ উগুম দিয়্যে অলঅ।

যিহিষ্কেল 33:28

মুই ইস্রায়েল দেজ্‌‌চানরে এক্কান মানুচ্ নেইয়্যে পড়ি থেইয়্যে জাগা বানেম্; তার খেমতার বাহাদুরি শেজ্ ওই যেবঅ আর তার মুড়োমুড়িগুন এমনভাবে খালি ওই পড়ি থেবঅ যে, সিয়েনদি কনজনে যানা-এযানা ন-গুরিবাক্।

মীখা 4:10

ও সিয়োন-ঝিবো, পুয়ো-ফুদোইদ্যে দুঘ্ পেইয়্যে মিলে ধোক্ক্যেন তুই পীড়েলোই এগুর্ উগুর্ হা, কিত্যে ইক্কিনে তত্তুন্ শঅর্ ছাড়িনে খুলো মাদত্ যেইনে থাহ্ পড়িবো। তুই বাবিলোত্ যেবে; সিয়েনত্ তুই উদ্ধোর্ পেবে। লগেপ্রভু সিয়োদোই তঅ শত্রুগুনো আঢত্তুন্ তরে উদ্ধোর্ গুরিবো।

দ্বি’লম্বর বিররণ 28:36

যিবেরে তুমি রাজা বানেইনে তমা উগুরে বোজেবা লগেপ্রভু তারে আর তমারে বোন্দী গুরি নেযেবাত্তে এমন্‌ এক্কো জাদর্‌ আদত্‌ ফেলেব যিবেরে তুমিয়ো ন-জান আর তমার পুরোণি মানুচ্চুনেয়ো ন-জানন্‌। সিয়েনত্ তুমি তক্তা আর পাত্তরর্‌ দেবেদামূত্তির পূজো গুরিবা।

দ্বি’লম্বর বিররণ 28:64

“সে পরেন্দি লগেপ্রভু পিত্‌থিমীর এক দুঝিত্তুন অন্য দুঝি সং বেক্‌ জাদর্‌ ভিদিরে তমারে ছিদি দিবো। তুমি সিয়েনত্‌ তমার আর তমার পুরোণিমানুচ্চুনোর হবর্ ন-পেইয়্যে গাজর আর পাত্তরর্‌ দেবেদামূত্তির পূজো গুরিবা।

দ্বি’লম্বর বিররণ 4:26

সে সময়ানত্তে মুই এচ্ছ্যে এ দিনোত্‌ আগাজ আর পিত্‌থিমীগান্‌ তমা বিরুদ্ধে সাক্ষী রাগেইনে কঙর্‌, তুমি যর্দন গাঙান্‌ পার্‌ ওইনে যে দেজ্‌ছান কারি লবাত্তে যর্‌ সে দেজত্‌ তুমি কয়েক দিনে শেজ্ ওই যেবা। তুমি সিদু ভালোক্‌ দিন সং বজত্তি গুরি ন-পারিবা, হামাক্কায় ভস্ত ওই যেবা।