যিরমিয় 49:31 - Chakma Bible

³¹ ও বাবিলীয়গুন, তুমি উদো, সেই আরামত্ থেইয়্যে জাদ্‌‌তুন যে গমেডালে বজত্তি গরদন্ তারারে আক্রমণ গরঅ। সে জাদ্‌‌তোর্ গেইট্অ নেই, লাগারায়ো নেই; তারা গায় গায় বজত্তি গরন।

যিরমিয় 49:31 ပူးပေါင်းရင်းမြစ်များ

গীতসংহিতা 123:4

আরামত্ থেইয়্যে মানুচ্চুনোর ফেচ্ কারানিগানি আর বাড়্‌বো গুরিয়্যেগুনোর ঈচ্ গরানা আমা তাল্লোত্ সং লুম্মেগোই।

গীতসংহিতা 73:12

ইগুনে অলাক্ সেই পাজি মানুচ্চুন যিগুনে আরামে থেইনে ধন-সোম্বোত্তি বাড়েয়োন্।

যিশাইয় 32:11

ও আরাম গুরি-থেইয়্যে মিলেগুন আর চিদে-চজ্জা নেইয়্যে মিলেগুন, তুমি দরে গির্‌‌গিরো; তমা কাবড়-চুগোড়ানি খুলিনে কমরত্ বস্তা পাদা পিনো।

যিশাইয় 32:9

ও আরামত্-থেইয়্যে মিলেগুন্, তুমি মঅ কধানির্ বাধ্য অ। ও চিদে-চজ্জা নেইয়্যে মিলেগুন্, তুমি মঅ কধানি শুনো।

যিশাইয় 42:11

ধূল্যেচর-চাগালা আর শঅরানিয়ে জোরে জোরে নাঙ্ গিনোক্; কেদরীয়গুনোর্ আদামানিয়ে সিয়েনি গোরোক্, শেলার মানুচ্চুনে হুজিয়ে গিদ্ গাদোক্, মুড়োগুনোর্ মাঢাত্তুন্ হুজিয়ে রঅ ছাড়দোক্।

যিশাইয় 47:8

ইক্কিনে, ও ভোগ্ গুরিয়্যে মিলেবো, শুন; তুই নিশিদে আরামে বোইনে মনে মনে কত্তে, বানা মুয়ই আগং, মুই বাদে আর কনজন নেই। মুই কনদিন্অ রাণিমিলে ন-ওম্ বা পুয়ো-ছা আরেবার দুঘ্‌কান্ ন-পেম্।

যিরমিয় 48:11

এক কুমোত্তুন্ আর এক কুমোত্ ঢালা ন-অলে মদ যেবাবোত্যে তা গাদ উগুরে পড়ি থায় সেবাবোত্যেগুরি মোয়াবে তার চিগোনত্তুন্ ধুরি নিশিদেগুরি পড়ি আঘে; তে বন্দীদজাত্ ন-যায়। সেনত্তে তার সুয়োত্তান্ আগ ধোক্ক্যেন রোইয়্যে, তা তুম্বাজ্‌‌চান্ ন-বদলে।

যিহিষ্কেল 30:9

সেদিন্যে আরামে থেইয়্যে কূশরে দর্ দেগেবাত্তে হবর্ কোইয়্যেগুনে মর্ উগুমে জাহাজত্ গুরিনে নিগিলি যেবাক্। মিসরর শেজ্ দিনোত্ কূশর্‌অ যন্ত্রণা অবঅ, কিত্যে সেদিন্নো তা উগুরেয়ো এবঅ।

যিহিষ্কেল 38:11

তুই কবে, তুই এমন এক্কান দেজ্ আক্রমন গুরিবে যে আদামানিত্ দেবাল্ নেই। তুই সুগে-শান্দিয়্যে আর নিচিদে থেইয়্যে মানুচ্চুনোরে আক্রমন গুরিবে যিগুনে দেবাল্, গেইত আর লাগাড়া নেইয়্যে গুরি বজত্তি গরন্।

যিহিষ্কেল 39:6

মুই মাগোগ উগুরে আর যিগুনে দূর দেজ্‌‌‌চানিত্ গমেডালে বজত্তি গত্তন্ তারা উগুরে আগুন পাদেম্; সেক্কে তারা হবর্ পেবাক্, মুয়ই লগেপ্রভু।

মীখা 7:14

ও লগেপ্রভু, তুই মুগোর্ আঢত্ গুরিনে তঅ মানুচ্চুনোর গরগ্‌‌‌কুনোরে চরাচ্। তারা দঅ তর্ নিজোর্ পাল। তারা চেরোকিত্তে বোল্‌‌‌বোল্যে চড়াইদ্যে ভূই থেলেয়ো তারা গায় গায় ধূল্যেচর চাগালাত্ বজত্তি গরদন্। ভালোক্ দিন আগে যেবাবোত্যেগুরি চড়িদাক্ সেবাবোত্যেগুরি তারা যেন বাশন আর গিলিয়দত্ চড়িনে বেড়েই পারন।

নহূম 1:12

লগেপ্রভু কত্তে, “ও যিহূদা, যুনিয়ো আসিরিয়গুনে বলেদি ঠিগ্ আগন্ আর জনেদি বেশ্ তো তারারে মারে ফেলা অবঅ। মুই তরে দুঘ্ দৈং ঠিগ, মাত্তর্ আর্ দুঘ্ ন-দিম।

সফনিয় 2:15

ইয়েনই সেই নিচিদে থেইয়্যে শঅর্ যিয়েন গমেডালে আঘে। তে মনে মনে কইদ্যে, “মুয়ই আগং, মুই বাদে আর কনজন নেই।” তে কিবাবোত্যেগুরি ভস্ত ওই গেলঅ, ঝার্‌বো য়েমানুনোর আশ্রয়র জাগা অলঅ! যিগুনে তা কায়কুরেদি যেবাক্ তারা ঠাট্টা-মশ্‌‌‌‌কারি গুরিবাক আর তারার্ বুজ্যে আঙুল্ দেগেবাক্।‌‌

গণাণা 23:9

মুড়ো উগুরেত্তুন্‌ মুই তারারে দেখ্যং; তারারে মুই মুড়ো উগুরেত্তুন্‌ দেখ্যং। মুই এন্‌ এক্কো জাদরে দেখ্যং যে অন্যগুনোত্তুন্‌ দূরোত্‌ থায়; অন্য বেক্‌ জাদ্‌তুনো সমারে নিজোরে এক গুরি ন-দেগে।

দ্বি’লম্বর বিররণ 33:28

ইস্রায়েলে সিয়েনত্যেই গমেডালে থেবঅ। যাকোবর থান্‌জাঙান্‌ থেবঅ দজাগানর্-দুযির্‌ বারেন্দি; সিয়েনত্‌ থেবঅ ভালোক্কুন্‌ শোজ্য আর নুয়ো আংগুরো-রস, তা উগুরে আগাজর শিরোপানি ঝুরি পুরিবো।