যিরমিয় 39:1 - Chakma Bible

¹ যিরূশালেমান এবাবোত্যেগুরি গজক্ গরা ওইয়্যে। যিহূদার রাজা সিদিকিয়র রাজাগিরির নঅ বজরর্ দশ মাজত্ বাবিল রাজা নবূখদ্‌নিৎসরে তার বেক্ সৈন্যদলুন্দোই যিরূশালেমান বিরুদ্ধে এইনে শঅরান ঘিরি রাগেল।

যিরমিয় 39:1 ပူးပေါင်းရင်းမြစ်များ

২ বংশধর 36:17

তারার্‌ বিরুদ্ধে লগেপ্রভু বাবিলোর রাজারে লোই আনিলো। সে রাজাবো উবোসনা-ঘরত্‌ তারার্‌ গাবুজ্যেগুনোরে মারে ফেলেল আর গাবুজ্যে-গাবুরী, বুড়ো বা বয়স ওইয়্যে কাররে দোয়্যে-মেইয়্যে ন-দেগেল। গোজেনে তারারে বেক্কুনোরে সে রাজাবোর্‌ আঢত্ তুলি দিলো।

যিরমিয় 32:1

যিহূদার রাজা সিদিকিয়র রাজাগিরির দশ বজরত্, অত্তাৎ নবূখদ্‌নিৎসরর রাজাগিরির্ আদার বজরত্ লগেপ্রভুর কধানি যিরমিয় ইধু ফগদাং ওইয়্যে।

যিরমিয় 34:1

বাবিলর রাজা নবূখদ্‌নিৎসর, তার বেক্ সৈন্যদলুন আর তা অধীনোত্ বেক্ রেজ্যগানি আর জাদর্ মানুচ্চুনে যেক্কে যিরূশালেত্ আর তার কায়-কুরে শঅরানির বিরুদ্ধে যুদ্ধো গোজ্যন্ সেক্কে ইস্রায়েলর গোজেন লগেপ্রভু যিরমিয়রে কলঅ যেন তে যিহূদার রাজা সিদিকিয় ইধু যেইনে কয়, মুই লগেপ্রভু এ কধাগান কঙর্, মুই এ শঅরান বাবিলো রাজার আঢত্ তুলি দিবাত্তে যাঙর্ আর তে ইয়েন পড়ি দিবঅ।

যিরমিয় 34:22

মুই তারারে উগুম দিইনে এ শঅরত্ ফিরেই আনিম। তারা এ শঅর বিরুদ্ধে যুদ্ধো গুরিবাক্ আর সিয়েন গজক্ গুরিনে পুড়ি দিবাক্। মুই যিহূদার শঅরানিরে ভস্ত গুরিনে মানুচ্ নেইয়্যে গুরিম।”

যিরমিয় 42:18

ইস্রায়েলর গোজেন বেগত্তুন্ খেমতাবলা লগেপ্রভু কোইয়্যেদে, যিগুনে যিরূশালেমত্ বজত্তি গুরিদাক্ তারা উগুরে যেবাবোত্যে মর্ অহুজি আর রাগ্ ঢালি পোজ্যে তুমি মিসরত্ গেলে সেবাবোত্যেগুরি মঅ রাগ্‌কান তমা উগুরেয়ো পুরিবো। তুমি অবা ঠাট্টা আর ঈচ্ গরা হেইয়্যে মানুচ্; তমা অবস্থা দেগিনে মানুচ্চুনে আমক্ অবাক্ আর তমা নাঙানিলোই মান্‌জ্যে অভিশাব্ দিবাক্। তুমি আর কনদিন্‌অ এ জাগায়ান ন-দেগিবা।

যিরমিয় 52:1

এগোজ্ বজর বয়জত্ সিদিকিয় রাজা অলঅ। তে যিরূশালেমত্ এগার বজর্ রাজাগিরি গোজ্যে। তা মাবো নাঙান্ অলদে হমূটল; তে এলদে লিব্‌না শঅরর্ যিরমিয়র ঝি।

যিরমিয় 6:6

বেগত্তুন খেমতাবলা লগেপ্রভু তারারে এ কধাগান কোইয়্যেদে, “তুমি গাজ্‌চুন কাবিনে সিয়েনিলোই যিরূশালেমর বিরুদ্ধে তার দেবালান সমারে ভিদেকুড়্ বানঅ। এ শঅরানরে সাজা দিয়্যে পুরিবো; ইয়েন অত্যেচারে ভুরি যেইয়্যে।‌‌‌‌

যিহিষ্কেল 33:21

আমা বন্দীদজার্ বার বজরর্ দশ মাজর্ পাচ্ দিনোত্ এক্কো মানুচ্ যিরূশালেমত্তুন্ ধেইনে মইধু এইনে কলঅ, “শত্রুগুনে শঅর্ গজক্ গোজ্যন্।”

যিহিষ্কেল 4:3

সে পরেদি লুয়োর্ এক্কান পাত নিইনে সিয়েন তর্ আর শঅরর্ সংমোধ্যে দেবাল ধোক্ক্যেন রাগা আর তঅ মুয়োন সিয়েন ইন্দি ফিরেই রাগা। সেক্কে শঅরান ঘিরে ওইয়্যে বুঝো যেবঅ; এধোক্ক্যেনগুরি তুই দেগেবেদে যে, শঅরান ঘিরে ওইয়্যে। ইয়েন অবদে ইস্রায়েল জাদত্তে এক্কান চিহ্নো।

যিহিষ্কেল 40:1

আমা বন্দীদজাত্ পোজোস্ বজরর্ আরাম্ভত, মাসর্ দশ দিনোত, যিরূশালেম শঅরর্ পতনর্ চৌদ্দ বজর পরেদি লগেপ্রভুর আঢ্‌তানি মঅ উগুরে এলঅ। ‌‌

যিহিষ্কেল 5:2

যেক্কে শঅরর্ ঘিরি থোইয়্যে দিনুন্ থুম্ ওই যেবঅ সেক্কে সেই চুলোর তিন ভাগর্ এক ভাগ চুল নিইনে শঅর ভিদিরে পুড়িবে। তিন ভাগর এক ভাগ চুল নিইনে ছুরিলোই শঅর চেরোকিত্তে সিয়েনি কুজি কুজি গুরি কাবিবে, আর তিন ভাগর্ এক ভাগ চুল নিইনে বোইয়্যেরত্ উড়েই দিবে। যেরেদি খুলো তলোয়ারলোই মুই মানুচ্চুনোরে লোড়েম্।

সখরিয় 8:19

চের্, পাচ্, সাত্ আর দশ মাজর্ উবোস্ থানা যিহূদাত্তে ফুত্তি গরানার্, হুজির্ আর ভালেদির পরব্ ওই উদিবো। সেনত্তে তুমি সত্য আর শান্তিগানরে কোচ্‌পেবা‌‌।

দ্বি’লম্বর বিররণ 28:36

যিবেরে তুমি রাজা বানেইনে তমা উগুরে বোজেবা লগেপ্রভু তারে আর তমারে বোন্দী গুরি নেযেবাত্তে এমন্‌ এক্কো জাদর্‌ আদত্‌ ফেলেব যিবেরে তুমিয়ো ন-জান আর তমার পুরোণি মানুচ্চুনেয়ো ন-জানন্‌। সিয়েনত্ তুমি তক্তা আর পাত্তরর্‌ দেবেদামূত্তির পূজো গুরিবা।