বিচের গুরিয়্যেগুন 6:4 - Chakma Bible

⁴ তারা ইস্রায়েলীয়গুনোর দেজ্‌চান আক্রমণ গুরিনে গাজা সং পুরো জাগানর খেত্তানি বর্‌বাত্‌ গুরি দিদাক্‌। ইস্রায়েলীয়গুনে খেইনে বাঁজি থেই পারন্‌ এধোক্কেন্‌ কন কিচ্ছু মিদিয়নীয়গুনোর্‌ আঢত্তুন্‌ রেহাই ন-পেদঅ, এন্‌ কি, ভেড়া ছাগল, গোরু আর গাধাগুনেয়ো ন-পেদাক্‌।

বিচের গুরিয়্যেগুন 6:4 ပူးပေါင်းရင်းမြစ်များ

পত্থম 10:19

সীদোন শঅরত্তুন্‌ গরারত্‌ যেবার পদথ্‌ গাজা সং আর গাজাত্তুন্‌ সদোম, ঘমোরা, অদ্‌মা আর সবোয়ীমোত্‌ যেবার পদথ্‌ লাশা সং কনানীয়গুনোর দেজর্ দুযি এলঅ।

পত্থম 13:10

সেক্কে লোটে রিনি চেইনে দেগিলো যর্দনর্ বেক্ সংজাগানত্‌ বোউত্‌ পানি আঘে আর জাগায়ান্‌ চাদে পেরায় লগেপ্রভুর বাগান ধোক্ক্যেন, আর সিয়েন্‌ ন-অলেয়ো প্রায় সোয়রত্‌ যেবার পদত্‌ মিসর দেজছান ধোক্ক্যেন। সেক্কেয়ো লগেপ্রভু সদোম আর ঘমোরা শঅরান্‌ ভস্ত গুরি ন-ফেলায়।

গম্ উপদেজ্ 28:3

যে নাঢা মানুচ্চুনোর নেতা নাঢা মানুচ্চুনো উগুরে অত্যেচার গরে তে এমন ঝড়র্ নালা ধোক্ক্যেন্ যিয়েনর পরেদি আর কনঅ খেত্‌‌খেত্তি ন-থায়।

যিরমিয় 5:17

তারা তমা খেদ্‌তানি আর হানাগানি গজক্ গুরিবাক্, গজক্ গুরিবাক তমা ঝি-পুয়োগুনোরে; তারা তমার গোরু-ভেড়ার পালুন গজক্ গুরিবাক, গজক্ গুরিবাক তমার বেক্ আংগুর আর ডোমোর্ গাজ্‌চুন। যে দেবাল্-ঘিজ্যে শঅর উগুরে তুমি বিশ্বেজ্ গোজ্য সিয়েন তারা যুদ্ধো গুরিনে ভস্ত গুরি দিবাক্।” ‌

লেবীয় 26:16

সালে মুই তমা উগুরে যিয়েন্‌ গুরিম সিয়েন্‌ এই-মুই তমা উগুরে অদাদৎ কনঅ কিয়্যে ক্ষয় যাইদে রুগ্‌ আর সাংগাদিক জ্বর্ আনিম। এদক্কানি রুগ্‌কোই তমার্‌ চেবার্‌ খেমতা আর কিয়্যের্‌ বল্‌ কমা ধুরিবো। সেক্কে তুমি বীজ ফেলেলেয়ো কনঅ লাভ ন-অবঅ, তমার ফসলানি শত্রুগুনেই হেবাক্।

ওবদিয় 1:5

“ইস্‌, কি দযাগান্ তত্তেই বাজ্জেই আঘে! যুনি চুরুনে তইদু এজন্, ডাগেত্তুনে এজন্ রেদোত্, মাত্তর্ তারার্ যেত্তমান আওজ্ বানা সেত্তমান তারা চুর্ গুরিবাক্। আংগুর তুলিবার মানুচ্চুনে যুনি তইদু এজন্ সালে তারা তত্তেই কিজু আংগুর থোই যেবাক্।

মীখা 6:15

তুমি বীজ্ ফেলেবা মাত্তর্ ফসল কাবি ন-পারিবা; তুমি জলপাই মাড়িবা মাত্তর্ নিজে সিয়েনর্ তেলান বেবহার গুরি ন-পারিবা; তুমি আংগুর মাড়িনেয়ো সিয়েনর রস্‌‌চান হেই ন-পেবা।

দ্বি’লম্বর বিররণ 28:33

তমার ন-চিন্ন্যে জাদর্‌ মানুচ্চুনে তমার ভুইয়োর্‌ ফসলানি আর কাম্‌গোজ্যে ফলুন ভোগ গুরিবাক আর তমার পুরো জীংকানিবর্‌ তুমি বানা অত্যেচার আর ভান্ন্যেই বেবহারানি ভোগ গুরিবা।

দ্বি’লম্বর বিররণ 28:51

তারা তমার য়েমান ছঅ্‌গুন আর ক্ষেদর ফলুন হেই ফেলেবাক আর যেরেন্দি তুমি শেজ্‌ ওই যেবা। তারা তমাত্তে কনঅ ফল, নুয়ো আংগুরো-রস বা তেল বা গোরুর ছঅ বা ভেড়ার ছঅ বাগি ন-রাগেবাক, আর যেরেন্দি তুমি শেজ্‌ ওই যেবা।

বিচের গুরিয়্যেগুন 6:3

ইস্রায়েলীয়গুনে যেক্কে তারার্‌ ভূইয়ানিত্‌ বিজ্‌ ফেলেদাক্‌ সেক্কে মিদিয়নীয়গুনে, অমালেকীয়গুনে আর পূগেন্দি দেজর্‌ মানুচ্চুনে এইনে তারার্‌ দেজ্‌চান আক্রমণ গুরিদাক্‌।