যিশাইয় 33:6 - Chakma Bible

⁶ যুগে যুগে তেয়ই তারার্ রোক্ষ্যে গরানা, উদ্ধোর্, জ্ঞান আর বুঝিবার খেমতার ভান্ডাল্ ওই এজের্। লগেপ্রভু উগুরে ভোক্তিবলা দরান্ অলঅ তারার্ ধন।

যিশাইয় 33:6 ပူးပေါင်းရင်းမြစ်များ

২ রাজাবলী 18:7

লগেপ্রভু তা সমারে থেদঅ। তে যে কনঅ কাম্‌ গুরিলে ফোলেদ। আসিরিয়ার রাজা বিরুদ্ধে উল্লোমি গুরিনে তে তার তলেন্দি অস্বীগের্‌ গুরিলো।

ইয়োব 4:6

তুই যে গোজেনরে ভোক্তি গুরিনে দরাজ্‌ সেক্কে কি তুই আশ্বাজ্ ন-পাজ? তুই যে নিদ্দুযি সিয়েন্‌ কি তর্‌ আজা নয়?

গীতসংহিতা 140:7

ও লগেপ্রভু, মর্ খেমতাবলা উদ্ধোর্‌গুরিয়্যে, যুদ্ধোত্ তুয়ই মঅ মাঢাবো ঢাগি রাগাচ্।

গীতসংহিতা 28:8

লগেপ্রভু তা মানুচ্চুনোর বল্; তেয়ই তার্ অভিষেগ্ গোজ্যে মানুচ্চুনোর রোক্ষ্যেগুরিয়্যে তাম্বুলো ধোক্ক্যেন্।

গীতসংহিতা 45:4

সত্য, নম্রতা আর ন্যায়র পক্ষে তুই নিজোর মহিমালোই বিজয়ি ধোক্ক্যেন্ যাত্রা গর্; তর্ ডেন্ আঢ্‌‌তানে দর্‌‌বুক্-লাগাইদে ধোক্ক্যেন দাঙর্ দাঙর্ কাম গোরোক্।

গম্ উপদেজ্ 14:24

জ্ঞানীগুনোর্ বক্‌শিজ্ অলঅ তারার ধন, মাত্তর্ জ্ঞাননেইয়্যেগুনোর ভুলানি আরঅ ভুলোর জর্ম দে।

গম্ উপদেজ্ 14:26

লগেপ্রভু উগুরে ভোক্তিবলা দরত্তুন্ দোল্ আজা এজে আর তা ঝি-পুয়োগুনোত্তে আশ্রয়র জাগা থায়।

গম্ উপদেজ্ 14:27

লগেপ্রভু উগুরে ভোক্তিবলা দর্ অলঅ জিংকানির পয়নালা ধোক্ক্যেন; সিয়েন মান্‌জ্যরে মরণ ফালত্তুন্ দূরোত্ রাগায়।

গম্ উপদেজ্ 15:16

অশান্তি গুরিনে জদবদে ধন পানাত্তুন্ লগেপ্রভু উগুরে ভোক্তি গুরিনে দরানা এক্কেনায়ো গম্।

গম্ উপদেজ্ 19:23

লগেপ্রভু উগুরে ভোক্তিবলা দরানে পরিপূরোন জিংকানি ইন্দি নেযায়; যিবের সেই জিংকানিগান আঘে তে ভর্‌‌পুনোং থায়, কনঅ দযা তাইদু এই ন-পারে।

গম্ উপদেজ্ 2:5

সালে লগেপ্রভু উগুরে ভোক্তিবলা দরানাগান্ কি, সিয়েন তুই বুঝি পারিবে আর গোজেন পৌইদ্যেনে জ্ঞান পেবে;

গম্ উপদেজ্ 28:2

দেজ মানুচ্চুনোর ভান্ন্যেয়র্ কারনে বোউত্ শাজন্‌গুরিয়্যে অন্, মাত্তর্ জ্ঞানী আর বুদ্ধিবলা শাজন্ গুরিয়্যে সুদোমান ঠিগ্ রাগায়।

গম্ উপদেজ্ 29:4

ন্যায়বিচেরলোই রাজা দেজ্‌‌ছানরে থির্ রাগায়, মাত্তর্ যে ঘুষ্ হেবাত্তে গম্‌‌পায় তে দেজ্‌‌ছানরে ভস্ত গুরি ফেলায়।

উপদেশক 7:12

টেঙা-পোইজ্যে ধোক্ক্যেন্ জ্ঞানানে রোক্ষ্যে গরে, মাত্তর্ জ্ঞানর্ সুবিধেগান্ অলঅ ইয়েন্, জ্ঞানী মান্‌জ্যর্ জ্ঞানানে তা জিংকানিগান্ রোক্ষ্যে গরে।

উপদেশক 7:19

দশজন শাজন্‌গুরিয়্যে শঅরানরে যেত্তমান্ দরমর গুরিবাক্ জ্ঞানানে এক্কো জ্ঞানী মান্‌জ্যরে তাত্তুনো বেশ্ দরমর গরে।

যিশাইয় 11:9

মঅ পবিত্র মুড়োবোর কনঅ জাগাত্ কনজনে খেতিয়ো ন-গুরিবাক্, ভস্তয়ো ন-গুরিবাক্, কিত্তে বড়্ সাগরানে যেধোক্ক্যেন্ পানিলোই পেলেং পেলেং থায় সেধোক্ক্যেন্ লগেপ্রভুর পৌইদ্যেনে জ্ঞান্দোই পিত্‌থিমীগান পেলে পেলে অবঅ।‌‌

যিশাইয় 26:1

সেদিন্যে যিহূদা দেজত্ এ গান্নো গাহ্ অবঅ: আমার্ এক্কান দরমর শঅর্ আঘে; গোজেনর্ দিয়্যে উদ্ধোরান্দোই উদ্ধোর অবঅ তার দেবালান আর রোক্ক্যের্ বেবস্থাগান।

যিশাইয় 32:17

সততাগানর্ ফল অবঅ শান্তি, আর সিয়েনর্ কারনে জনমত্তে থিদেবর্ আর নিশ্চয়তাগান এবঅ।

যিশাইয় 32:18

মঅ মানুচ্চুনে সুগে-শান্দিয়্যে থেবার জাগানত্, গমেডালে ঘর-বাড়ি আর যাগুলুক্ নেইয়্যে জিরেবার্ জাগানত্ বজত্তি গুরিবাক্।

যিশাইয় 33:20

আমার বেক্ পরব্‌পুন পালেয়্যে শঅর্ সিয়োন ইন্দি রিনি চাহ্। তঅ চোগ্‌‌কুনে দেগিবাক্ যিরূশালেমানরে, এক্কান সুগ্-শান্দিয়্যে ভরা থেবার জাগানরে, এক্কান তাম্বুলোরে যিয়েন্ সরা ন-অবঅ। তার খুদোগুন্ কনদিন্অ তুলো ন-অবঅ আর সিয়েনর কনঅ দুড়িয়ো ন-ছিনিবো।

যিশাইয় 45:17

মাত্তর্ গোজেনে ইস্রায়েলরে উমরত্তে উদ্ধোর্ গুরিবো; তুমি কনঅ কালত্ লাজত্ ন-পুরিবা বা অগমান ন-পেবা।

যিশাইয় 51:14

বন্দীগুনোরে যাদিমাদি ইরি দিয়্যে অবঅ। তারা তারার্ জেলখানা গাদত্ মুরি ন-যেবাক্, তারার হানার্‌অ অভাব ন-অবঅ।

যিশাইয় 51:6

তুমি আগাজ ইন্দি রিনি চঅ আর তলেদি পিত্‌থিমীগান ইন্দি রিনি চঅ। আগাজ্‌‌‌চান ধূমো ধোক্ক্যেন অদাদত্ লুগিবো, পিত্‌‌‌‌থিমীগান কাবড় ধোক্ক্যেন পুরোণ ওই যেবঅ আর তা আদাম্মেগুনেয়ো মুরি যেবাক্। মাত্তর্ মর্ দিয়্যে উদ্ধোরান উমরত্তে থিদেবর্ অবঅ আর মর্ সততাগান উমরত্তে থেবঅ।‌

যিরমিয় 31:34

নিজোর পাড়াল্যেবোরে আর নিজোর ভেইবোরে কনজনে ইয়েন কোইনে আর শিক্ষ্যে ন-দিবাক্, ‘লগেপ্রভুরে চিনিবাত্তে চিগো,’ কিত্তে বেক্কুনে মরে চিনোন্। সেনত্তে মুই তারার অন্যেয়ানি খেমা গুরিম, তারার পাপ্‌পানি আর কনদিন্‌অ ইদোত্ ন-রাগেম। মুই লগেপ্রভু এ কধাগান ।” কঙর্‍‍‍‍‍‍‍‍‍‍

হবক্‌‌‌‌কূক 2:14

সাগরান্ যেবাবোত্যে পানিলোই ভরা থায় সেবাবোত্যেগুরি পিত্‌‌‌‌থিমীগান লগেপ্রভুর মহিমার জ্ঞানে ভর্‌‌‌পুনোং অবঅ।

মথি লেখ্যে গম্ হবর্ 6:33

মাত্তর্ তুমি পত্তমে গোজেন রেজ্য পৌইদ্যেনে আর তা আওজ্ মজিম চলিবাত্তে মনান্ দুয়ো। সালে সেই বেক্ জিনিস্‌চানিয়ো তুমি পেবা। কেল্যেত্যে চিদে ন-গোজ্য;

২ করিন্হীয় 6:10

আমি বোউত্ দুঘ্ পেইর্, তো আমার মনানি নিত্য হুজীয়ে ভরা। আমি নিজে নাঢা, তো আমি ভালোক্ জনরে থাগোইয়্যে গুরির্। আমার কিচ্চু নেই, তো আমি বেক্কানির্ অধিকারী। এবাবোত্যেগুরি আমি প্রমাণ গুরির্ যে, আমি গোজেনর্ সেবা গুরিয়্যে।

১ তীমথিয় 4:8

কিয়্যেগানদি ব্যায়ামত্ কিজু লাভ অয় সত্য, মাত্তর্ গোজেন-ভোক্তিলোই বেক্কানিন্দি লাভ্ অয়; সিয়েনত্যে এ জিংকানিত্ আর পর জিংকানিত্যে আজা আঘে।

১ তীমথিয় 6:6

মাত্তর্ আসলে হুজী মনে খ্রীষ্টীয় ধর্ম-বিশ্বেজ্ মজিম চলিলে বিরেট্ লাভ অয়।