পত্থম 28:3 - Chakma Bible

³ বেগত্তুন্‌ খেমতাবলা গোজেনে তরে বর্ দুয়োক্‌ আর তরে ভালোক্কুন্‌ ঝি-পুয়োর বাব্‌ অবার্‌ খেমতা দুয়োক্‌। তে তঅ বংশর্‌ মানুচ্চুনোরে জনেদি বাড়েই দোক্। সেক্কেনে তারা অবাক্‌ এক্কো ভালোক্‌ গুট্টির্‌ জাদ্।

পত্থম 28:3 ပူးပေါင်းရင်းမြစ်များ

পত্থম 1:28

গোজেনে তারারে বর্‌ দিইনে কলঅ, “তুমি বংশবাড়েবার খেমতালোই ভুরি যঅ, আরঅ নিজোর মানুচ্চুন বাড়েইনে পিত্‌থিমীগান ভোরেই ফেলঅ আহ্ পিতথিমীগান্‌ নিজোর্‌ শাজনত্‌ আনঅ। ইয়েনবাদে তুমি দোজ্যে সাগরর মাছ, আগাজ পেক্‌, আর মাদি উগুরে ঘুরি বেড়েইয়্যে বেক্‌ জেদা পরাণবলাগুনো উগুরে রাজাগিরি গরঅ।”

পত্থম 13:16

মুই তঅ বংশর মানুচ্চুনোরে পিত্‌থিমীর ধূল্যেচর-ধোক্ক্যেন গুণি ন-পুরেইয়্যে গুরিম। পিত্‌থিমীর ধূল্যেচরুন যুদি কনজনে গুণিনে শেজ্ গুরি পারন্‌ সালে তঅ বংশবোর মানুচ্চুনোরেয়ো গুণো যেবঅ।

পত্থম 17:20

শুনিচ্‌, মুই তারেয়ো বর্ দিম্‌ আর ভালোক্কুন্‌ পুয়ো দিইনে তা বংশর্‌ মানুচ্চুনোরে বোউত্‌ বাড়েই দিম্‌। তেয়ো বারবো গুট্টি-নেতার্‌ আগ বাপ্‌ অবঅ আর তা ভিদিরেত্তুন্‌ মুই এক্কো দাঙর্‌ জাত্‌ বানেম্‌।

পত্থম 24:60

তারা রিবিকারে বর্ দিইনে কলাক্, “বোন, তুই ভালোক্কুন ঝি-পুয়োর্‌ মা ওস্‌। তর্‌ ঝি-পুয়োগুন্‌ যেনে শত্রুগুনোর্‌ বেক্‌ শঅরানি জিদিনে নেযেই-পারন্‌।”

পত্থম 26:24

সে রেদোত্‌ লগেপ্রভু তারে দেগা দিইনে কলঅ, “মুই তঅ বাপ্পো অব্রাহাম গোজেন। কিচ্ছু ন-দোরেবে, কিত্তে মুই তঅ সমারে আগং। মঅ চাগর্‌ অব্রাহামত্তে মুই তরে বর্ দিম্‌ আর তঅ বংশবো বাড়েই দিম্‌।”

পত্থম 26:4

মুই তঅ বংশর মানুচ্চুনোরে আগাজ তারা ধোক্ক্যেন ভালোক্কুন্‌ গুরিম আর এ দেজ্‌ছানি তারারে দিম্‌। তঅ বংশর ভিদিরেন্দি পিতথিমীর্‌ বেক্‌ জাদ্‌‌‌তুনে বর্ পেবাক্‌,

পত্থম 27:33

এ কধাগান শুনিনে ইস্‌হাক কিয়্যেত্‌ গির্‌গিরানি উদিলো। তে কলঅ, “সালে যে মইধু শিগের্‌ গোজ্যে য়েরাগান্ আন্যে সিবে কন্না? তুই লুমিবার্‌ আগেদি মুই সিয়েন্‌ হেইয়োং আর তারে বর্‌‌‌অ দুয়োং, আর সে বর্ দেনার ফল্‌ তে পেবগোই।”

পত্থম 35:11

গোজেন তারে আরঅ কলঅ, “মুয়ই বেগত্তুন্‌ খেমতাবলা গোজেন। তুই ভালোক্কুন্‌ পুয়ো-ছার্ বাপ্‌ ওইনে জনেদি বাড়ি উদ্। তঅ ভিদিরেত্তুন্‌ এক্কো জাদ্ উদিবো, আর উদিবো এক্কো ভালোক্ গুট্টির্‌ জাদ্। তঅ বংশত্‌ ভালোক্কুন্‌ রাজার্‌ জর্ম অবঅ।

পত্থম 41:52

সে পরেদি তে তার দ্বিলম্বর পুয়োবোর নাঙান্‌ রাগেল ইফ্রয়িম (যিয়েনর্ ভেদ্‌তান্ “ফলবান”)। তে কলঅ, “যে দেজত্‌ মুই দুঘ্ পেইয়োং সে দেজত্‌ গোজেনে মরে ফলবান গোজ্যে।”

পত্থম 43:14

বেগত্তুন্‌ খেমতাবলা গোজেনে যেন সে মানুচ্চো ইধু তমারে দোয়্যে দেগায়, আর তমা সে ভেইবো আর বিন্যামীনরেয়ো তমা আদত্‌ ইরি দে; আর যুনি মত্তুন পুয়ো আরেয়্যে উয়ো পরেদে অয়্‌ সালে নয়ত সিয়েনোই অলুং।”

পত্থম 48:3

সে পরেদি যাকোব যোষেফরে কলঅ, “বেগত্তুন্ খেমতাবলা গোজেন কনান দেজর্ লূস শঅরত্‌ মরে দেগা দিইনে বর্ দিয়্যে।”

পত্থম 48:4

তে মরে কোইয়্যেদে, মুই তরে ভালোক্কুন্‌ পুয়োর্‌ বাব্‌ অবার্‌ খেমতা দিলুং আর তঅ বংশর্‌ মানুচ্চুনোরে বাড়েই দিম। মুই তঅ ভিদিরেত্তুন্‌ ভালোক্কুন্‌ গুট্টির্‌ জাদ্ বানেম, আর তঅ পরেদি এ দেজ্‌ছান্‌ মুই উমরর্‌ সোম্বোত্তি ইজেবে তঅ বংশর্‌ মানুচ্চুনোরে দিম।

পত্থম 49:25

তঅ বাবঅ গোজেনে তরে বল্‌ দিবো। বেগত্তুন্‌ খেমতাবলা গোজেনে তরে উগুরেত্তুন্‌ আগাজর্ বর্ আর মাদি তলেত্তুন উইফুদো বর্ দিবো। মিলেগুনো পেদত্‌ পুয়ো দিইনে আর তা বুগোত্‌ দুধ দিইনে তে তরে আশিদ্‌বাদ গুরিবো।

পত্থম 9:1

গোজেনে নোহ আর তা পুয়োগুনোরে বর্ দিইনে কলঅ, “তুমি বংশবাড়েবার খেমতালোই জনেদি বাড়ি উদো আর পিত্‌থিমীগান ভোরেই ফেলঅ।

গীতসংহিতা 127:1

লগেপ্রভু যুনি ঘর ন-বানায় সালে মিস্ত্রীগুনে মিজে মিজে দুঘ্ গরন; যুনি লগেপ্রভু শঅরানি রোক্ষ্যে ন-গরে সালে চুগিদারুনে মিজে মিজে চুগি দুয়োন্।

গীতসংহিতা 127:3

পুয়োগুন লগেপ্রভুর দিয়্যে সোম্বোত্তি, পেদ ভিদিরে পুয়ো-ছাগুন তার দিয়্যে বক্‌শিষ্।

যাত্রা 1:7

মাত্তর্‌ ইস্রায়েলীয়গুনোর্‌ বংশবাড়েবার্‌ খেমতা কম ন-এলঅ; তারা জনেদি বেশ্‌ ওইনে চেরোকিত্তে ছিদি পড়িলাক্‌ আর অমকদ বোলিবন্দ ওই উদিলাক্, আর তারাল্লোই মিসর দেজ্‌ছান্‌ ভুরি গেলঅ।

যাত্রা 6:3

বেগত্তুন্‌ খেমতাবলা গোজেন ইজেবে মুই অব্রাহাম, ইস্‌হাক আর যাকোবরে দেগা দিদুং, মাত্তর্‌ লগেপ্রভু ইজেবে মুই যে কন্না, সিয়েন্‌ তারা ইধু ফগদাঙ্‌ ন-গুরিদুঙ্‌।

২ করিন্হীয় 6:18

ইয়েন বাদে “বেগত্তুন্ খেমতাবলা গোজেনে কয়, ‘মুই তমার্ বাপ্ ওম্ আর তুমি মর্ পুয়ো-ছা অবা ’ ”

ফগদাং পেইয়্যে 21:22

মুই সেই শঅরর্ কনঅ উবোসনা-ঘর ন-দেগিলুং, কারন বেগত্তুন্ খেমতাবলা প্রভু গোজেন আর ভেড়া-ছবোই এলাক্ সেই শঅরানর্ উবোসনা-ঘর।

রূত 2:4

এমন্‌ সময়োত্‌ বোয়সে বৈৎলেহমত্তুন এলঅ‌ আর যিগুনে ফসল কাবদন্‌ তারারে কলদে, “লগেপ্রভু তমা লগে থোগ্‌।” তারায়ো ফিরিনে তারে কলাক্‌, “লগেপ্রভু তরে বর্‌ দোক্‌।”