পত্থম 13:18 - Chakma Bible

¹⁸ সেক্কে অব্রামে তা তাম্বুলান তুলি নেযেল আর হিব্রোণ চাগালার্‌ মম্রি নাঙে এক্কো মান্‌জোর্‌ এলোন ঝার কুরে সিয়েন ঠাঙেল। সিয়েনত্‌অ তে লগেপ্রভুর নাঙে এক্কো ডালিপূজো বানেল।

পত্থম 13:18 ပူးပေါင်းရင်းမြစ်များ

পত্থম 14:13

পরেদি এক্কো মানুচ্‌ ধেই এইনে ইব্রীয় অব্রামরে সে হবরান্‌ দিলো। অব্রামে সে অক্তত্‌ ইমোরীয় মম্রির্ এলোন ঝাড় কায়কুরে বজত্তি গুরিদো। মম্রি এলদে ইষ্কোল আর আনের ভেই। অব্রাম লগে ইগুনে সমাজ্যে ধোক্ক্যেন এলাক্‌।

পত্থম 18:1

অব্রাহামে যেক্কে মম্রির্ এলোন ঝার কায়কুরে বজত্তি গুরিদো সেক্কে লগেপ্রভু একদিন্যে তাইধু দেগা দিলো। অব্রাহামে সেদিন্যে দিবুজ্যে রোদোত্‌ তা তাম্বুলো দোরানত্‌ বুয়োই এলঅ।

পত্থম 22:9

যে জাগায়ান কধা গোজেন অব্রাহামরে কোইয়্যে তারা সিয়েনত্‌ যেইনে লুমিলাক্‌। সিয়েনত্‌ লুমিনে অব্রাহামে এক্কো ডালিপূজো বানেইনে সিবে উগুরে দার্‌বো সাজেল। পরেদি ইস্‌হাকরে বানিনে তারে সে ডালিপূজোবো দার্‌বোগানি উগুরে রাগেল।

পত্থম 26:25

সেক্কে ইস্‌হাকে সিয়েনত্‌ এক্কো ডালিপূজো বানেল আর লগেপ্রভুরে যগাজ্যে সর্মান দিলো। সিয়েনত্ তে তা তাম্বুলান তাঙেল আর তা চাগরুনে এক্কো কূয়ো খুড়িলাক্‌।

পত্থম 35:27

যেরেদি যাকোবে কিরিয়ৎ-অর্বর, অত্তাৎ হিব্রোণ ইধু মম্রি শহরত্‌ তা বাপ্পো ইস্‌হাক ইধু এলঅ। এ চাগালাত্ অব্রাহাম আর ইস্‌হাকে বজত্তি গুরিদাক্‌।

পত্থম 37:14

ইস্রায়েলে তারে আরঅ কলঅ, “তঅ ভেইয়ুনে আর ছাগল-ভেড়াগুন কি অবস্থাই আগন্‌ তুই যেইনে সে হবরান্‌ আন।” ইয়েন্‌ কোইনে তে যোষেফরে হিব্রোণ কিঝিঙোত্তুন্‌ পাদেল। যোষেফে যেক্কে শিখিমোত্‌ যেইনে লুমিলোগোই সেক্কে এক্কো মানুচ্‌ তারে মাঢ ভিদিরে ঘুরোঘুরি গত্যে দেগিনে পুযোর্‌ গুরিলো, “তুই কি তগর্?”

পত্থম 8:20

সে পরেদি নোহ লগেপ্রভুর্ নাঙে এক্কো ডালিপূজো বানেল আর পত্তি জাদর গম্‌ য়েমান্‌ আর পেগত্তুন্ কয়েক্কো নেযেনে সে ডালিপূজোবো উগুরে পুজ্যে-উৎসর্বর অনুষ্ঠান গুরিলো।

২ শমূয়েল 2:1

পরেন্দি দায়ূদে লগেপ্রভুর ইদু পুযোর্‌ গুরিলো, “মুই কি যিহূদা চাগালার্‌ কনঅ এক্কান্‌ শঅরত্‌ যেম্‌?” লগেপ্রভু কলঅ, “অয়, যাহ্।” দায়ূদে পুযোর্‌ গুরিলো, “মুই কুদু যেম্?” জোবত্‌ লগেপ্রভু কলঅ, “হিব্রোণত যাহ্।”

গীতসংহিতা 16:8

মঅ চোখ্‌কুন আমিঝে লগেপ্রভু ইন্দি আগন্; তে মর্ ডেনেদি আঘে বিলি মুই থির্ থেম।

গণাণা 13:22

তারা নেগেভর ভিদিরেন্দি যেইনে হিব্রোণ শঅর ইদু আঝিল্ অলাক। হিব্রোণ শঅরান্‌ তুলো ওইয়্যেদে মিসরর্‌ সোয়ন শঅরান্‌ তুলিবার্‌ সাত বজর আগে। সিয়েনত্‌ অনাকর্‌ বংশর্‌ অহীমান, শেশয় আর তল্‌ময় নাঙে তিন্নো মানুচ্‌ এলাক।

১ তীমথিয় 2:8

মুই চাং যেন বেক্‌ জাগানিত্ মরদ্‌তুনে রাগ বা কোজ্জ্যের্ মনভাব ন-রাগেইনে সাব্ মনে দ্বিয়েন আঢ্ তুলিনে তবনা গরন্।

ইব্রীয় 11:9

গোজেনে যে দেশ্‌চান অব্রাহামরে দিবার এগেম্ গোজ্জ্যে তে বিশ্বেজত্যে বিদেশী ইজেবে সিধু বজত্তি গোজ্জ্যে। তা সমারে যিগুনে সেই একই এগেমর্ আশিদ্‌বাদর্ ভাগী এলাক্ সেই ইস্‌হাক আর যাকোব ধোক্ক্যেন গুরি তেয়ো তাম্বুলোত্ বজত্তি গুরিদো;

যিহোশূয় 14:13

এ কধাগান শুনিনে যিহোশূয় যিফুন্নির পূঅ‌ কালেবরে আশিদ্‌বাদ গুরিলো আর সোম্বোত্তি ইজেবে হিব্রোণ শঅ‌রান তারে দিলো।

যিহোশূয় 15:13

যিহোশূয় লগেপ্রভুর উগুম্‌ মজিম্‌ যিফুন্নির পূঅ‌ কালেবরে যিহূদা-গুট্টির জাগান ভিদিরে কিরিয়ৎ-অর্ব, অত্তাৎ হিব্রোণ শঅ‌রান দিয়্যে। অর্ব এলদে অনাকীয়গুনোর পুরোণি মানুচ্‌।